20181008 - (^ω^)大會堂美心飲茶

10月8日星期一

今日同同組同事去飲茶，大會堂美心酒樓，有同事要十二點左右就去攞位。呢間酒樓喺大會堂，如果坐緊窗口有好靚嘅view 睇，可以見到摩天輛同個海。

呢間酒樓有好多特別嘢食，而且點心仲係推車仔，唔係用點心紙架。所以有唔少外國人嚟食架。

點了叉燒酥，好食。

紫菜卷，我好鍾意食紫菜卷，好多年前馬市仲有美心酒樓，差不多個個星期日都去飲茶，成日都會點呢個，冇美心就好似冇紫菜卷食啦。

菠蘿叉燒包，同事話好食，

煎腸粉，我麻麻地鍾意將啲腸粉煎嚟食，滑滑地咪好地地？
好味蝦餃，

仲有鳳爪，其實仲有其他點心例如菜苗餃，叉燒包，牛肉，牛柏葉，素粉果等，但冇影相，美心啲點心真係最好食，樣樣都唔差，最多係你唔鍾意食某樣嘢，而唔係整得唔好食。而大會堂美心又比較其他分店好食啲，可能因為中環區啦。


另外仲有比較特別的甜品如西米焗布甸，出面好似冇呢種甜品啦，我都食咗少少，但呢個個餡係紅豆，我喜歡食紅豆當然好，但其實蓮蓉先係正宗。

以前呢度仲有個經典的的芝麻卷好似菲林卷呢，但聽阿姐講宜家唔出了，可能要去齋舖先搵到啦。