20180131 - §馬鞍山神醫§

1月31日星期三
自從星期六晚之後咳到死死吓。
星期日開始仲失聲，越夜越咳得緊要。又痛。
第二朝即係星期一早上都冇返工，熊車咗我去石籬睇醫生。
初初食頭兩次藥，好似有啲效，但係到咗星期一夜晚又係咳到就死。
星期二成日都咳到甩肺，
原本係要同老闆食升職飯都唔食，因為真係咳到收唔到聲。
七點九返到家食飯，嫂嫂介紹我睇馬鞍山出名的神醫鄧柏生醫生，剛巧星期二五收新證，現正叫緊46籌，我就78籌，於是食完飯就落去等。
預咗姑娘態度差，所以冇咩嘢，醫生態度OK，入去問簡單問題，做咩職業，有冇食煙飲酒，有冇小朋友，有冇入院之類，最好笑佢問我有冇小朋友我話有佢問係仔嚟？我心諗生仔是否有樣睇？我個樣唔似會生到女？
之後只係聽咗氣管一下就話我好嚴重，接近哮喘，問我聞唔聞氣，我當然想聞啦。
係呀仔入院時的霧化蒸氣，聞咗十分鐘左右，只收30元咋，聞時即刻咳少咗好多。
之後攞埋藥大約九點二三走得。收390三日藥。
返去十一點幾食第一次藥，戴口罩瞓到六點半先咳醒，之後兩晚可以唔戴口罩瞓有咳，但唔會咳醒，宜家日頭冇刺激到氣管就唔會咳太多，估唔到咁嚴重的咳都可以好得咁快，真係神醫呢。

20180128 - •●❤原來生仔都好sweet❤●•

1月28日星期日

自從聖誕節幾日假之後，bb成日都要我，星期日一瞓醒就要我同佢玩。平日我去廁所關門佢就喊，起初以為佢係扭計只係詐嬌，點知有次出嚟見佢有眼淚，好淒涼咁，有時玩玩吓又會走過嚟攬攬，開心死。

上星期專登喺BB面前同熊人攬攬睇佢有咩反應啦，BB即時扁咀同埋唔開心，仲走埋嚟撥開熊人隻手手。

琴日同BB表哥玩孭孭，孭完BB孭表哥，BB一見到我孭表哥就好唔開心，舅父孭BB都唔肯呢，之後我孭住BB佢仲要痴到實，怕有人搶咗佢媽咪。

估唔到生仔都可以咁SWEET，雖然呢段冇咗我唔得的日子可能只係好短暫，但我有經歷過有記低已經好開心了。

20180127 - ♡ ❤爸爸生日❤ ♡

1月27日星期六
今日爸爸生日打邊爐，因為想去楊屋道街市買海鮮，所以揸車去，媽咪又想去荃灣買茶葉，所以我同熊人同埋媽咪一齊去綠楊坊。
而BB因為仲病緊，唔想佢同圍去，所以冇帶佢去。
我哋先去綠楊坊英記，之後去咗北海道牧場餐廳食嘢，其實同香港啲茶餐廳嘢食差不多，冇咩特別，我點的蕃茄濃湯雪菜魚蛋米粉薑味好重。我就麻麻地喜歡。

之後行咗一陣，有間美樂士多，好多懷舊嘢。


好喜歡呢個。



仲有水壺。

之後熊去街市買了鮑魚仔，蝦，但我病咗都冇乜點食。
夜啲同BB表哥玩玩，玩玩吓孭完BB孭表哥，點知BB豬一見我孭表哥就好嬲，之後唔知回解表哥又扭阿嫂抱，最後搞到又喊又魚口魚面咁。

夜啲回家忽然喪咳，咳得好辛苦，最後食咗粒氣管藥就好啲。

20180125 - ❁兩餐tea，兩件cake@ Cova and L'Eclair de Genie❁

1月24日至25日星期三至四

兩個Senior manager 都升職，請食Tea，由於唔止一個部門有TEA 食，所以只係食CAKE 就方便派發。

第一日食係COVA，唔知點解款式唔多，我揀咗士多啤梨撻，但麻麻地，好似有蘇味。

同事們的CAKE，款式同賣相麻麻，唔揀得落手，原來因為買指定款式有買二送一優惠。
唔怪之得咁少款揀啦，而且啲款又唔討好，真係好CHEAP~

第二天吃的閃電泡芙，原本真係冇咩好感，因為得個樣五顏綠色好靚，但好甜好甜，係得個甜字。今次揀咗綠茶又幾好食呀，因為綠茶啲苦苦地味蓋咗甜味。我今次好欣賞，直情想買個俾熊人同埋媽咪試。

另一款話係新款的櫻花味，由於唔知櫻花咩味，而且又係白色，怕好甜，唔敢揀呢。

一連兩日有食神，又要努力運動啦。

20180122–25 - ☹生病了☹

1月22日至25日星期一至四
馮以朗病了，唔知係唔係因為星期六去西貢公園玩時有個小朋友咳咳，所以中咗招，
星期一開始有鼻水，熊人話唔多鼻水，但黃昏開始多了，
好彩仲幾生猛，而且冇發燒，希望唔會好嚴重啦，因為下星期又話好凍，怕佢未病好又再冷親，病好耐，


過咗一兩日開始咳咳，都咳得幾辛苦，本身有唔少舊藥，但有一種都食哂，又見BB咳得幾緊要，所以都係去睇一次穩陣啲。
婆婆帶姐姐BB去睇醫生。
都係差不多的藥水，不過黃色收鼻水藥轉成紅色，即係紅色支收鼻水藥係勁啲。
同埋以前食2ML，到11月食2.5ML，宜家大個豬要食3ML了，佢表哥都係食3.5ML咋，點解追得咁快呀。


呢幾日BB好扭，睇完電視唔肯覺豬仔，宜家完全唔俾我暗豬覺了。我不得不放手了。

20180121 - ヾ(◍'౪`◍)ﾉﾞ 元氣@悅來坊

1月21日星期日，
之前連續兩個星期日六七點醒了就唔肯再瞓的以朗，今個星期竟然又肯瞓到十一點呢，同BB喺屋企玩一陣。


俾個背囊仔BB孭住，好似好大個豬，似兩三歲仔，得意，本來想同佢出一陣間街，但因為要等技術人員嚟睇吓電線跳掣的原因，等到5點都冇地方好去。

由於電線跳掣了幾天，要長關廚房廁所燈，所以都唔能夠煮飯食。
出去同爸媽，俊廷吃壽司，由於上次喺馬鞍山5點半都等成個幾兩個鐘，搞到BB失控，今次寧願揸車出去熊貓酒店食好過。BB冇瞓晏覺，好彩靠車上豬了大約半小時，爸媽下車先，大約等兩三個字，七點前入座，咁先正常食晚飯架，星期日住喺鬼地方搵食真係慘過做狗。

點了烏冬俾BB豬。
我哋食加洲卷。

玉子，又分啲飯俾BB。

坐BB凳睇住啲壽司架，如果有高速線我估BB會好開心。


熟蝦，

炸蝦。

鰻魚。

里魚。

吉列炸花蠔。


鰻魚again, 腐皮，炸蝦反卷，仲有俊廷都食了不少三文魚，同魚生片，5個大人，一個bb，620元，都ok吧。

之後經過悅來坊，bb一見到新年報置就好開心，以為有得玩，宜家仲識得企定定影相。


之後仲行咗一陣aeon同埋十二蚊店，人人都買到啲嘢，大家都幾開心呢，行吓百貨公司覺得好似好近新年，好有新年氣氛，
bb今日全日只豬了半小時晏覺，回程發癲收場呢，haha，始終都衰收尾。

20180120 - ◈西貢遊◈

1月20日星期六

飲完早茶再瞓都成六點半，樓下班人又耍太極，瞓好少。不過因為約好同表哥佢哋一起出去行吓，所以都唔會太晏起身，以朗都瞓到十一點九個字，大家齊齊遲起，起身就表埋英文班放學的表哥仲有哥哥嫂嫂駕車去西貢走走。
佢哋成日都話一起果醬好食，又有BB凳，所以一齊食吓。

表哥鍾意同BB坐呀

仲餵BB食包包，好似好FRIEND呢。唔爭嘢玩時都真係幾FRIEND的。


兩父子開心豬。

All day breakfast唔包嘢飲，點杯雪梨茶啦，點知又唔似果醬茶咁成個壺上，得一杯仔咋。

我點了最愛的benedict egg，熊話佢整得仲好食。但佢有煙三文魚呢，又唔同食法的。

 熊因為飲了早茶仲飽緊，所以只點了鬆餅。

 同牛角包，配果醬又幾好食，啲果醬係幾鮮。

 哥哥佢哋的all day breakfast，偏食的表哥竟然冇一樣嘢想食，係都要食提子包。

 哥哥點的burger，大大個都好精彩，我的小吃貨望到眼甘甘，只有得睇冇得食。

 再encore 多一個 scone

食食吓隔離枱有隻狗狗，好乖，BB好有興趣，但因為第一次咁近見到狗狗又好驚。注視咗好耐先敢行近呢。


之後兩老表去公園玩玩，玩完再買少少海鮮返屋企，唔知係唔係因為人多，又有表哥喺度，BB回程唔肯瞓覺呢。

20180120 - ☼☀ 早茶@客香邨☀☼

1月20日星期六
前兩日熊人話發現大圍原來有得飲夜茶，仲話同我去。
都好呀，佢半夜返嚟屋企拉我起身去飲茶。
去到都五點幾，應該叫早茶吧。
呢度應該是全大圍唯一可以通宵的飲茶吧。

地址: 大圍積存街74-76號地下A舖

有唔少點心可以揀，自己出去拎，
熱辣辣又新鮮，未必係好精緻的點心，但起碼新鮮蒸住。但有舊式酒樓風味，大大件點心。
有懷舊的春蛋燒賣。

大大碟的鳳爪。



足料的雞扎。有齊魚肚，冬菇，鮑片，雞肉。

幾爽口的蝦餃。當然唔好同美心比較啦。

仲有馬拉糕。我哋點了普洱茶，都叫做水滾茶靚，茶幾香。

由於通宵都開，有好多夜間的士司機呢。係一個宵夜既好去處。

兩口子清晨去飲茶，好得意呢。

20180117-18 - ◇◆LeCreuset + 跑◆◇

1月17-18日星期三四

7-11又有新嘢玩，都係Line Friends X LeCreuset 的東東，今次是「竹福糖果盒」
由1月17日起，22個印花可以免費換一個，我有差不多50個印花可以換兩個。先換一個係圓形SALLY~

長出長有的7-Eleven與LINE FRIENDS及LE CREUSET聯乘產品又有新搞作，就是新年別注版「竹」福糖果盒。糖果盒形狀採LE CREUSET經典的圓形、花形、心形鑄鐵鍋設計，盒身以竹纖維製，盒蓋則用塑膠物料製，由即日（1月19日）至3月6日（二）於7-Eleven分店購物滿二十元即送印花一個，購物滿三十元送兩個，如此類推。二十二個印花可換領隨機一款糖果盒，或儲五個印花加＄26換購，

初初以為可以當碗仔咁用，點知玩咗返嚟又唔係太靚咋，如果儲齊唔同色而且加個托盤就靚。所以換咗返嚟都係俾馮以朗當玩具玩，個SIZE都OK，幾合佢玩架。

1月18日星期四就去咗跑步，兩個星期冇跑步，但自己又谷到行，谷到6K先收手，快係幾快，因為有落斜冇上斜，6K唔休息咁跑，結果對腳痛了兩日幾，宜家跑步唔一定要減到肥，可以KEEP住同健康已好開心，當然減多兩三磅會更好啦。


補一張之後星期日又抽多個竹福糖果盒，今次係CONY 花花型，靚啲，但可唔可以係粉色呀，兩個都係藍蓋綠綠同色系，想多少少色呀。