20160228 - •●✿意樂餐廳✿●•

2月28日星期日

鬼地方中之最鬼地方的大家樂裝修之後個舖細一半，因為有另一間餐廳，對鬼地方來講真係天大喜訊，因為終於除了大家樂以外有其他嘢食，鬼地方廿幾年都有間快餐店，其實大家樂質素唔差，不過廿幾年都會食厭吧。 (我結婚之後附近冇大家樂，反而覺得大家樂好好味，有時專登去食大家樂)，前幾年多一間中菜館，但冇咩人去食，不提也吧，最後十座人都係食大家樂為主。

 

間新嘢裝修咗幾個月，大家等到頸都長，終於等到，原來係意樂餐廳，都有唔少嘢食，意粉，拉麵咁。

我哋五個人點咗雞翼，炸得比較乾，有"之言粉"味，爸媽不太欣賞。

媽媽的磨菇天使麵，ok好食，媽媽好喜歡，

我哋的鰻魚炒飯，鰻魚少咗啲囉。幾濃味。

另點了白汁煮蜆，都幾多蜆。

爸爸點了拉麵，一般啦，當然唔會似日本拉麵咁，

姪仔點了牛肉，但我冇影相，
其實嘢食普通，不過多咗選擇，同埋唔貴，仲有點兩三杯飲品都係二百五左右，以價錢來講算抵食，以後鬼地方有多個選擇。

20160227 - ☼☼Relaxing Sat☼☼

2月27日星期六

唔駛返工就周圍去吓，去黃金海岸，以前好似去過黃金海岸一次咋，同咗熊一起就去過好多次啦，由熊人住屯門去到搬走咗，仲結埋婚，果度唔多人，有海望吓，都幾清幽，揸車又多咪錶位。👍🏼

 

黃金海岸好多嘢食，有唔少戶外可以飲吓啤酒，我哋就偏愛Ebeneezer's Kebabs & Pizzeria食烤雞卷，天氣仲涼涼地，食吓坐吓hea吓，好 relax咁又過咗個星期六。

20160226 - ♣♧Dabyida♧♣

2月26日星期五，
好友生日，我們LADIES' NIGHT
位於棉登徑的一間BAR，食意大利嘢，走高級路線。

環境比較暗，屬於FINE DINING，同老公食飯好啲。點了Cesar salad，味道ok，菜新鮮少少澀味都冇，濃郁的鹹芝士味而且煙肉碎夠香夠脆。

自家製意大利雲吞，餡料不錯，有濃濃的黑松露味，

紅花蟹肉海膽意大利飯。飯粒沾滿晒蟹粉，甜甜地，海膽好鮮甜，份量就真係唔多足夠，呢啲咪係好食唔飽囉。

當天的Chef special, Pan fired black cod fillet ，cod貴貴，而且點煮都好食吧。

parma ham 火箭菜pizza,即叫即整，熱辣辣， parma ham夠多，火箭菜新鮮，pizza夠薄側邊已焗成可口的餅乾底。

 

另外仲有甜品，

 雖然嘢食唔錯呢度食嘢好貴，清水都要$45一支，其實餐廳連水都唔提供係幾差，又話有最低消費，講嘅時候覺得我哋應該一早知，有啲老屈。

 

下圖係熊人一個人的晚餐，佢個紫菜同溫泉蛋都好唔錯。

20160222 - ╭❤╯元宵佳節╰❤╮

2月22日星期一

一早俾隻熊人嚇死，話個電話壞了，開唔到機，點知俾我發現係電池用到盡，自動熄機，仲著唔返，要叉電先開得番......如果唔係有個叻叻老婆(^__^)，佢可能要去又一城間APPLE STORE 等開門整機了。(--____--)

之後返到公司晏晝收到熊人的花(^3^)，今日係元宵中國情人節。四年前第一個中國情人節，第一次收花，之後求婚收過，結婚之後都仲有花收。 (^__^)，其實我都迫咗熊人幾日，出哂口術先有花.....今次熊人好貼心，送埋花樽，可以有得插住靚靚睇幾日。

放工就行咗去灣仔一陣，坐叮叮落車行一陣經過以前囍帖街，宜家好靚啦。

我哋去咗愛家素食食素。味道幾好，有好多選擇，茶水任飲可以飲多幾杯水，簡單的蓮藕，雲耳，唔會太濃味

熊人推介的叉燒好食，脆脆地，出面好難食到。配少少咖哩，菜，好健康。

 

http://www.lovinghut.com/portal/tw/

之後去了尖沙嘴的元宵燈會，冇嘢睇嘅，啲燈迷難猜到嘔。

扮遊客影吓帆船，維港，不過當日好大霧，白濛濛。

早啲坐35A返家吃湯圓團團圓圓，甜甜蜜蜜。

20160220 - •●✿青衣公園✿●•

2月22日星期六

放工同熊人又去青衣公園度hea, 不過啲松葉落哂了，帶了奸夫一齊玩。

光禿禿了，

但去到另一邊竟然仲有啲楓香，雖然楓香都開始落葉，不過有橙有紅有黃都幾靚。當日天氣都幾乾燥，竟然有點前秋天，今年秋天唔似秋天，反而初春仲比較乾燥。

之後我哋又在草地飲吓茶，嘆吓，到五點幾左右就走，因為我約咗中學同學食新年飯，但我冇帶利是呢。熊就自己一個人在家吃了。

20160216 - ( ° ▽、° )LED燈花海

2月16日星期二

 

期待已久的的港版「Light Rose Garden 玫瑰燈海園」將在明晚（14日）正式亮燈，共2.5萬朵LED白玫瑰燈飾，日前已錯落有致「種」於金鐘中西區海濱長廊草地，組成一片連綿不斷花海，開闊景觀襯托全球獨有維港夜色，製作人稱比韓國原版更加壯觀。

Light Rose Garden花海於2月14日(情人節)至22日(元宵節) 於金鐘中西區海濱長廊每晚6時亮燈，17日起會逐步遷移到較高位置的添馬公園。

Light Rose Garden（玫瑰燈海園）
日期及地點：
1) 首階段2月14日至16日 - 中西區海濱長廊
2) 遷徙期2月17日至19日局部開放 - 中西區海濱長廊
3) 次階段2月20日至22日 - 添馬公園
亮燈時間：每晚6時至11時 (雨天將會暫停)

之前14/2迫爆，好彩冇去迫，放工熊人來接我，之後一起去金鐘，本想食好啲，但人好多，咩都等位，最後食CANTEEN算，都唔平，起碼有位坐一陣。

諗住放工去睇花，希望少人啲，點知都係爆多人，初初迫入去勁多人，天氣又幾凍吓，但人多都不太覺。

但我覺得好去睇吓都值得，尤其我未睇過首爾的花海，睇吓都好，好多花，係幾浪漫。

當日仲帶咗大機勁影咗一輪。

之後走時經過AIA嘉年華，雖然免費入場，不過都夜了，聽日要返工，入去玩就好似太夜。

 

20160212 - ❁❁Apple Green❁❁

2月12 日星期五

約了好姊妹新年之後聚一聚。

今次地點好方面，在葵芳的apple green

食牛油果辣雞沙律。有啲薄脆好好食，不過朋友點了炸雞我覺得太熱氣，不夠清新，唔食到幾多。

好喜歡的薯皮，一向喜歡食薯皮，覺得好好食。

另外仲有點pizza，係長方形。薄薄勁脆好好食。個醬似日式沙律，唔錯。

 

另外佢哋點咗牛扒，我就唔食。

大家傾吓傾吓又到十點，要返家啦，祝大新的一年順順利利。

20160210 - ☆★年初三★☆

2月10日星期三

熊人約了朋友今晚在家打邊邊，我返娘家瞓覺好了。

不過中午都同熊人飲茶先，稻香就算在年初三都有位架，雖然等一陣，但算快，我哋呢頭啲茶記好多都在初四或之後先開門。

今次試新嘢，試個全盒，32蚊咋。有三隻煎餃子，腐皮，煎腸粉定薄撐少量，紅油抄手三隻，仲有豆，雖然唔係好好食，但抵食囉。

之後同熊買一陣打邊邊的食物，返家坐一陣之後，熊人送我搭車返馬鞍山，元氣五點半都等好多人，痴筋，唯有轉食pepper lunch，我唔食牛架陪爸媽食咋。佢哋食牛餐好貴吓，三個人食四百幾蚊，但冇辦法啦，新正頭搵食艱難。

食完先六點半，同媽媽行一陣。

商場有大口仔布置，點都影吓啦。

大口仔

和大口妹，

想叫媽媽幫我影，但佢唔識影，激死我😤。

20160208 - ⊕自家制日式芝士蛋糕⊕

2月8日星期二

去完拜年之後，熊人想整芝士蛋糕，佢想整兩個，一個俾媽媽，一個俾哥哥。

我又要學整。

用CREAM CHEESE

忌廉芝士室溫放軟備用(最少兩小時)；

麵粉，糖60G，低筋麵粉及粟粉過篩 3次備用；

雞蛋。雞蛋用乾淨的碗分好蛋白及蛋黃備用

 

忌廉芝士加入砂糖用膠刮拌勻，
蛋黃逐隻加入及拌勻，並拌至沒有顆粒。

淡忌廉分 3次加入，用打蛋機低速拌勻，再加入菜油拌勻成蛋糕糊。

將已過篩的粉類分 3次拌入蛋糕糊內，輕力拌勻，檢查沒有粉粒後放一邊備用。

打蛋器及大盆洗淨抹乾，要確保盆內無油無水而且乾淨，放入蛋白用中速打發，40克砂糖分數次加入，打發後提起打蛋機而蛋白呈企立不下垂即可，不可打發過度。

蛋白分 2至3次用切拌(Fold in)的方式拌入蛋糕糊內(即輕力用膠刮從盆底刮上面輕力攪拌，不要把氣泡壓扁，否則會不鬆軟)。

最後將蛋糕糊倒入焗盆，在檯面輕敲兩三下以敲起蛋糕內的大氣泡，外圍注入熱水至蛋糕的高度一半。

焗爐預熱 175度火，20分鐘，下面要放水，好似隔水蒸咁。

日式芝士蛋糕不及NEW YORK CHEESE CAKE heavy，可以當早餐吃。

20160207 -8 ヾ(◍'౪`◍)ﾉﾞ 年三十年初一

2月7日星期日，

年三十是星期日好唔抵呢，無得放早，同爸爸媽媽團年呢，今日無咩做，只係食食食，食完豐盛的團年飯之後，再食湯圓，代表團團圓圓。

夠十二點就會同媽媽慶祝年初一生日快樂。呢個係東海堂的貴貴士多啤梨忌廉蛋糕，竟然要三百幾蚊，我覺得cream 唔及Italian tomato咁好食。有啲穌味。

年初一去熊媽媽家拜年，食素，好多種素菜好好食，呢個藕餅我食唔少。

大家都猴年快樂。