20180430 - ♣♧三四月跑跑♧♣

三月底開始懶跑步，因為復活節假期，之後又去旅行，之前說好的一星期10K呢？

點解會跑得咁差呢，因為天氣開始熱，我耐力唔夠。

三月底，easter前都仲可以，因天氣唔算熱，而且盡量一星期跑10K，有操開，仲可以，成績不俗。唔算快，但跑得長。

原本復活節假期想跑一次，點知M到跑唔到，之後就去了五天旅行，去完旅行好攰，攰到冇哂力，係日日都好想瞓嗰隻，但都諗住勤力跑樓下，點知跑完就大件事，已經只跑4.5k，但跑完之後瞓唔著，其實已經唔止一次跑完之後瞓唔到覺，但今次因爲去完旅行之後特攰，再瞓唔到真係死人。

咁星期三跑完之後就打算星期五又跑，當晚天氣好熱，開始入夏，晚上都25度，慘啦，熱到死之外可能前幾日瞓唔到本身冇乜氣力，跑幾跑就熱到冇氣力，停咗幾十次先跑到5公里，成績雖然仲好似幾快，但我一唔跑就按停，當然唔慢啦，跑完呢次之後真係冇哂信心，原來一入夏就大跌。


跑完一次係咁停之後又成個星期先跑，點知狀態又可以呢，幾快啊，冇停到，不過當日天氣又涼返少少，冇咁熱，但比起之前冬天時跑少了5分鐘，草草跑夠5公里就收檔，天氣熱好難頂呀，唔知點先可以提升返呢。

4月27日星期五本來想跑，點知扭到條腳筋，休了一日始終想跑，同熊一起跑，點知我原來宜家已超越了熊人，除了比之前速度快了之後，長度亦不俗，熊人跑了三公里都要抖一抖，我就為了熊人也慢下來，其實另一原因是天氣好熱25/6度，熱到我都想慢下來。所以31.44才5公里，成績是近來最差的一次，不過其實比好多人好，我呢幾個月的努力是沒有白費的。


最後是51前自己跑，當日好熱，熱到開冷氣，耐力不夠，慢慢，但都可以30分5公里，宜家入夏成績會下降，要操返密啲，希望可以提升返。宜家跑完唔會腳痛，因為肌肉是有的，只是太熱成日好似抖唔到氣，而且跑過了5公里之後真係唔多夠氣。近來見自己唔太肥又怕跑完睡不著，而且有時又落雨，一星期只跑一次咋，要努力跑返多啲啦。

20180427 - •●❀中環鐵皮檔零食❀●•

4月27日星期五

近來為咗唔肥，除了運動之外，食飯時間仲迫自己出去行唔係hea行架，係行得幾遠的。食晏時間大約行3000步左右。

一係往東走去金鐘，天橋駁天橋有冷氣，怕熱之選，直去再去埋太古廣場，足足行3000多步，不過會成日忍唔住買東海堂抹茶咖啡，

另一路徑係去玩具反斗城，呢度真係堅遠。而且要買玩具，其實都幾趕，次次睇耐啲嘢返來到兩點鐘了，如果想買咖啡就去麥當當買。不過真係會搞好耐先返到公司。

第三個路徑係去近利源東街的麥當當買平平的14元咖啡，只有細的cappuccino small size係最平14元，其他都要27蚊或以上，而金鐘海富同一杯咖啡要賣多兩元即16大元。麥當勞間間價錢唔一樣架，如果介意價錢要留意一下先好買。

只去麥當當其實唔係太遠，唔夠步，於是根據阿嫂介紹有個鐵皮檔賣零食要行到去聖安娜咁遠架。我第一次買零食係買蔬菜條同蝦條俾個仔。8元4包的價錢真的驚為天人地平平，於是我宜家一星期都要行去睇一次。

買咗比較少有的小倉pancake。

差不多食完之後再買了小蛋糕。啲零食係幾好食，因為係日本進口，呢類蛋糕都係大約20元左右一包，由於日本進口，味道有保證，我仲見到有迷你豆沙餅，不過唔想食咁多肥肥要忍忍手。

補張唔關事的相4月16個星期班大帝出差，幾個大帝都飛哂，於是發起食下午茶，不吃飯吃tea，由於兩點半就送到公司，只係餓一陣咋。

食咗兩日，一日煎蘿蔔糕，另一日係熱狗加奄列，食了兩日肥肥，都係不能成日食呢啲嘢。

20180426 - ♪♬♩♫ 玩隧道♪♬♩♫

4月26日星期四

上年以朗未識行時去開宜家傢私度行街買咗條隧道俾以朗玩，當時以朗都有玩，但唔係話玩得好開心嗰隻，可能因為未識行，超過半年前體能嗰夠宜家好，未有宜家咁靈活，好似唔知點玩咁，反而表哥有次打風冇地方去過嚟我哋屋企玩玩得好開心，玩到好癲，以朗當時只你傻傻咁望住表哥咋。

近來我又拿出來玩，佢玩得好開心，連埋啲波波玩到好癲。初初拎返出嚟玩玩成半粒鐘，宜家玩得密又冇玩到咁耐啦。不過就算佢玩完唔玩都好，你都唔可以收佢檔架，明明見佢都唔玩，玩第二啲嘢你收佢檔都發脾氣，好嬲好嬲架。只有睇電視先可以收檔架。

個樣古古惑惑咁，收埋時係一個圓圈，以朗成日要坐喺裡面，

近來多咗掉啲波波入隧道俾佢玩，佢梗開心啦😍，好high，難為我同佢玩都好熱架。而且咁多波真係想執死人咩。

小朋友真係好鍾意玩呢啲可以匿入去的東東，大盒，被，將自己收埋就好high.


宜家返到屋企好少同以朗影相，因我每次拎手機出來佢都以為係睇電視時間，成日吼住我部手機呢，搞到我唔敢拎手機出來，冇得同佢影相呀。

20180423 - 😷病病😷

4月23日-4月28日

星期一至星期六

唔知係唔係上星期打完針弱弱，以朗上星期打針之後發燒了幾個鐘，可能比平日弱，又星期六去面試去咗open area玩了一輪車車同滑梯，當時唔覺有人病，但當晚就有乞痴，第二朝（星期日）就開始咳同埋鼻水。本身屋企有藥俾佢食，不過本來星期日同佢去狗公園都冇去，因為佢第一日起而且當日都好曬好熱，怕以朗唔理自己病周圍跑同追狗狗，會令佢出一身汗更熱，更病。

星期一二最厲害，開始到氣管咳咳，只好食埋氣管藥，雖然唔係大病，但我都好心痛。宜家佢好憎人吸鼻同食藥之外，仲連抹鼻水都唔俾人抹。真係激死人。佢比平日攰，但都尚算生猛，胃口麻麻地。

因為以朗病病，呢幾日熱到high higb都冇開冷氣，唔想焗住啲病菌同埋因爲房個冷氣開唔到個控制蓋，更加唔想開廳冷氣。咁為了以朗要忍忍忍。

星期六好熱呀，同佢著背心好啲，我哋要去拜山唔帶得以朗去，出門口無佢份好可憐，好彩佢只係喊一陣。

20180421 - (⊙＿⊙)interview 不合作

4月21日星期六

以朗今日第二次interview，諗住佢呢排見得多人冇咁怕生保，而且又去完旅行應該識多咗嘢會好啲，應該大膽啲，點知今次表現好差，完全唔合作。去玩都好地地，一去到課室對住老師就唔出聲，最慘佢仲成日想離開張枱，要捉返佢返嚟，望都唔望老師一眼。成日想玩老師其他玩具，老師係要以朗講爸爸媽媽，佢點會識講，肯定唔會收了。
 

見以朗乜都唔識不得不報playgroup 。當日食完嘢同佢報咗小蜜蜂。
 

因為我要取消寬頻，所以走咗去頌安，同以朗行一陣有十二蚊店但沒濕紙巾賣，經過日本城有個阿姐企喺門口攞膠手拍拍吓，以朗又想攞嚟玩，阿姐見以朗行行吓就送咗個汽球俾以朗，係店內裝飾嚟架，估唔到佢咁肉酸都呃到嘢呀。佢拎住個汽球好開心，會乖啲聽話啲。

我哋之後喺頌安食越南嘢，一般啦，勝在個位幾舒服。

之後就去雅濤居報名參加playgroup。 當然會喺個商場度同佢玩玩入錢車車，宜家玩慣咗，一見幾架車車自己衝過去爬上去玩啦。

今次三架車都玩哂呢。

呢架似揸跑車都幾型吧，著住件恤衫似金融財俊。靚仔😚





其實只係歲半人仔，點可以要求佢INTERIEW好好表現，依家只希望有學校收佢，同埋希望佢肯講多啲嘢啦。

20180419 - •●❤Ladies talk@Havana Bar❤●•

4月19日星期四

約了伴娘放工在中環飲嘢兼食嘢，兩位人妻吹吹水。

伴娘比較熟中環飲嘢，佢提議去蘭桂坊德己立街 的Havana Bar 飲嘢食嘢，聽聞嗰度出名飲Mojito。而且happy hour 買一送一。啱我哋呢啲精打細算的C9。

環境幾好，4樓的open area，有音樂但唔嘈，有梳化坐。可以傾到計架。

原來呢度啲Classic Mojito係好出名，好多comment 都話係best Mojito in HK，

Mojito是一種傳統的古巴高球雞尾酒。傳統上，Mojito是一種由五種材料製成的雞尾酒：淡蘭姆酒、白砂糖（傳統上是用甘蔗汁）、青檸汁、蘇打水和薄荷。最原始的古巴配方是使用留蘭香或古巴島上常見的檸檬薄荷。萊姆與薄荷的清爽口味是為了與蘭姆酒的烈性相互補，同時也使得這種透明無色的調酒成為夏日的熱門飲料之一。這種調酒有著相對低的酒精含量(大約10%)。Mojito是最有名的蘭姆調酒之一。其配方也有許多版本，其實我Mojito對我嚟講係冇酒精，有次介紹了熊人飲，佢又話飲完好醉。


如果想食嘢就可以叫樓下Cafe Siam的泰國嘢，因為係同一個集團的。呢間泰國嘢喺蘭桂芳係出名好食架。
我哋只點了兩樣嘢，點了柚子沙律清清地，柚子肉多又多汁，加埋炸椰子絲同炸蒜片，惹味開胃，幾好食。

另一樣是拚盤，泰國小食併盤都幾多嘢食，而且味道香口，
值得一讚嘅係炸春卷，炸到好脆而且足料，口感好豐富，
炸蝦餅 的蝦膠打得很滑身，入口軟滑，蝦肉又係用新鮮蝦打做而成，所以入口彈牙非常。可以加埋泰式醬汁一齊食。
拚盤中比較少食的是香蘭葉包雞 - 雞肉本身醃得好入味，仲吸收晒班蘭葉香味，雞肉係超級嫩滑厚肉，出色！
燒豬肉串：豬肉不但燒得香口，而且肉質非常鮮嫩，油份不多，所以唔會好肥好油


吹水吹到8:50，其實仲有好多嘢想傾。我坐地鐵再轉的士返家，趕及9:45前回家陪寶寶，間中同朋友傾傾偈又可以見到寶寶湊佢睡前奶睇電視係好開心嘅事呀。希望可以間中都可以咁食吓傾吓就好了。

20180418 - 💉💉歲半針竟然合格💉💉

4月18日星期三

呢張相係星期二4月17日天氣忽冷忽熱，一時短袖一時仲著返抓毛，死未，熊成日都會帶以朗落街，一般就去樓下行樓梯睇龜龜，玩滑梯。不過下雨天就只好去商場行行。

商場有電視以朗又睇得好開心。


4月18日星期三，

原本應該月頭先打的歲半針，因為去咗台灣怕佢病所以推遲到今日先打。都係熊人抽時間去打。今次一去到就見到個playing corner ，以朗即時衝過去玩玩，玩到好開心，熊人影張相都俾人鬧。慘。

玩了近一小時才見姑娘，以朗因為好開心所以又唱歌又跳舞，歲半其實有啲嘢問先過關，都係問點食嘢，有冇戒奶樽等。疊積木冇問題，問佢講唔講到廿個字係唔得架，姑娘問咁十幾個字有冇，都有架，不過音唔正，同埋英文多。結果姑娘見以朗跳舞唱歌就俾佢過關，四歲先返健康院驗眼了。

打完針第二日瞓醒晏覺有啲燒，38左右，食一次藥就退了。

不過胃口就麻麻比平日食少好多。

星期四我出街食飯知佢有啲燒我都過意唔去，但我趕到九點九就回到家同以朗飲睡前奶，睇電視。都幾好啦，去街都見到佢。

星期五回家拎畫板俾以朗補償昨天夜返家，塊畫板原本想上月買，但見冇特價要129，唔捨得，諗住等下先，今次俾我等到了，好多畫板都有特價。呢塊由129減到99，足足平了30元即買。師奶就係咁，平少少都咁開心。以朗都好鍾意塊畫板呢。我畫啲龜呀鳥呀俾佢睇，佢都知係乜嘢呢。

20180414-15 - 🍦食雪糕@手作之店🍦

4月14 日星期六

去完旅行攰到傻咗，都冇乜氣力玩同埋影相，但到了星期六日都要出街玩。

今日去嫲嫲度燒嘢食，成三十度熱死人，真係攞我條老命，不過好彩小朋友係唔怕熱的，有人同佢玩有天台走走都好開心，燒嘢食可以食啲豬扒同埋貴妃蚌，啲貴妃蚌大造又平又好食，燒到剛剛熟好鮮甜。

BB咩都食好開心，心情靚靚四圍跑，最開心係食粟米。

非常開心，好好笑容，人人都開心，連晏覺都冇瞓到，最後六點幾就頂唔住，我同以朗瞓到8:15起身，原來差不多要走，我都未食飽，返到屋企熊仲話要開工，我燒完嘢食涼都未沖要同以朗玩到十一點，但佢八點幾先起身點會瞓，我唔理佢啦，交俾姐姐我就沖涼過媽咪度休息吓。

4月15日星期日

今日冇乜事做就同以朗去新港城走走。同佢食手作之店的雪糕，佢食過兩次軟雪糕。一次手佢次店的雪糕，佢唔係好識雪糕，見到未話好興奮，不過見到我哋買都好緊張。

買咗當然都要食啦，手作之店雪糕好平，一個綠茶一球椰子大球都係25元，所以好多一家大細食，以朗咀仔細細其實食唔到幾多，起碼知道咩係雪糕，識玩屋企個雪糕🍦車先啦。

之後同佢去新港城四圍走，佢好hyper,見到嘢食就yum,不過走完一大輪都唔多願瞓啦。

20180408 - ✈宜蘭台北親子之旅(10)台北車站咖啡弄✈

4月8日星期日

眨眼又到了台北宜蘭之旅最後一天，每次去旅行到最後一天都好不捨，因為唔知道幾時再有機會飛啦。

一早在酒店食完早餐之後就放低寶寶同熊人出去西門町走走，原本想食台式早餐蛋餅，但因為食了早餐有啲飽，最後都冇食到，差只飲了苦瓜汁。

之後去台北車站行街，去咗行一間好大好的文具店，有幾層好多嘢賣，以朗乜都想要，之後仲行咗Daiso即係十二蚊店，其實同香港差不多價錢，不過見到有啲合適都買吓，因為Daiso係比較高檔，而且香港間間十二蚊店賣的東西都有啲分別，今日我孭以朗個多小時已好辛苦，難為熊人孭了幾日，最後熊人喺Daiso都找樓梯坐一陣。去了幾日旅行，大家的體力都消耗了不少。

之後返去對面馬路俾我哋發現了咖啡弄，我哋三口子唔離37 21都要離隊去坐吓，佢問我哋有冇訂位，好彩冇都有得入去坐。好似係最後一個位。

地方好窄，枱與枱之間好少位。以朗今日又比較嘈，有啲唔好意思。

試了冰滴咖啡都幾好飲，



另外黑糖咖啡比較甜。不過嚟到咖啡店又想試吓平日比較少飲的咖啡。

個窩夫好食，好大份量，足足有四塊窩夫，熱熱地配雪糕唔錯。雪糕可揀味。兩杯咖啡加咁大塊窩夫價錢都係百多元。

走的時候仲見到開始好多人等位，原來呢間咖啡弄唔單止喺香港大排長龍，喺台北依然係好高人氣呢。所以有幸食到好開心呀，亦令呢個台灣之旅劃上完美的句號。

今日文具店買到軟尺一把。

我哋只坐了約半小時，食完就急急腳走了，約12:45前要回酒店，訂了車送我們到機場。到了機場專登去第二航廈食渡小月，冇出面咁好食呢，而且第一航廈去第二航廈行好遠，苦了媽媽呢。

20180407 - ✈宜蘭台北親子之旅(9) Line Cafe + 叄和院✈

4月7日星期六

去鼎泰豐食完中午飯之後，爸媽回酒店休息，我就去新光三越A11館，因為有Line Cafe。 香港只有Line Friends Store， 沒有Cafe， 台灣一向比較流行Line Friends， 所以對呢度好大期望。

由台北101行過去其實都唔耐，大約八分鐘，不過去到又好失望，因為間Cafe 好細，而且冇乜食物，啲食物唔吸引之外，仲好似整咗好耐唔多新鮮咁，只有Choco，只係影吓相就算，Line Friend Store 都唔係好大咋，啲嘢又唔太特別，你話有日本地區/台灣地區限定就買，冇的話分分鐘香港買仲平啲，所以行咗5分鐘就走得，熊人抱住以朗，佢瞓得好開心，我哋去咗地下food court坐一陣都返酒店抖抖，點知馮以朗一返酒店就醒，反而係間條熊喺酒店豬覺。

約六點九左右。台灣朋友來酒店接我哋，去一間新派台菜度食晚飯，叫叄和院，原來在台北都有點名氣。兩層高，一般是坐上一層的位置。

兩位小朋友第二次見面，開始有點互動，不過馮以朗太粗魯，間中大叫，嚇怕了小妹妹。兩位小朋友比上次見面大個咗，以朗開始自己食飯，菲菲都食固體，以朗喺人面前表演喪食同一分鐘KO一碗湯，真係失禮死人。

講返嘢食啲嘢好食，樣又靚，呢個梅菜扣肉其實係配刈包架，梅菜扣肉燉得軟嫩而不柴絲，扣肉的大小夾進割包也剛剛好，個汁亦都好惹味呢。

啲虎斑刈包勁靚又熱又軟熟呢，黃色部份是添加了南瓜。記得要跟玉子一夜干或五花肉一起包進去，就是道美味的刈包。

仲有呢個似雪糕甜筒的叫五味九孔鮑，其實係薯蓉配九孔鮑，九孔鮑淋上少許的五味醬。賣相同味道都好好。下層還塞著些許鳳梨丁，除了爽口外，也因此讓這道創意菜成功留下了更深的口味記憶。

南台灣炒飯都好好食，有啲似鹹魚香，有蝦同蟹籽，飯炒得鬆散分明，卻吃起來異常的不油膩，整到似金字塔咁上菜，真係好巧心思。

呢個係好熱氣的炸豬肚薯條，好重口味，豬肚比較少。

呢個炒菜因爲配了wasabi，應該唔係人人接受到，不過我本身喜歡食wasabi 當然冇問題。

最後我哋飽到嘔都仲點了甜品熊貓芝麻包，眼睛跟嘴巴也是用竹炭粉做的，麵皮很鬆軟，再包裏富有維他命E的黑芝麻餡，濃稠的芝麻餡實在渾厚又飽滿，又靚又可愛的包，食飽飯都一樣食得落。

兩位小朋友尾段開始冇耐性，吵吵鬧鬧之中離開呢。真係好多謝台灣朋友帶我哋食好西。