20180407 - ✈宜蘭台北親子之旅(8)鼎泰豐@台北101✈

4月7日星期六，

今日原本係打算去台北花博公園。但因為天氣不好，由昨晚開始下雨到早上。雖然到中午開始停雨，但因為之前不停下雨，令到地下都濕透，公園是戶外活動，好似不太合適。
所以我哋就去咗台北101，因為本身打算今日去鼎泰豐食午飯，咁順便行吓，一去台北101的鼎泰豐就拎飛，大約要等一個鐘，於是我哋就四周行吓，初初BB入咗去蘋果度搞搞震，但APPLE STORE當日有Presentation，所以唔好阻住人，
 

一出去商場就麻煩了。暴走，又唔俾人拖，又要成日衝去扶手電梯，見到人哋試食又想食，捉都捉唔住，捉到就發脾氣，拗腰，坐地下，想出去出面love地標影吓相，又周圍擒，嗚嗚想去對面馬路影幾米都唔敢啦。
好唔聽話呢，激死我。

好多人去鼎泰豐食嘢，尤其大陸人，不過好過成日都食火鍋同烤肉啦。呢間多人去食，亦都有好多位，預咗大約的輪候時間可以行一陣。

點了黑醋排骨。

醉雞好濃酒味，好入味，不過唔算好滑，但勝在脂肪少，酒味濃得嚟又唔苦。可能因為切得好薄，所以感覺份量都唔少，

乾扁四季豆，四季豆脆脆嘅口感，肉碎炒得好。

唔知叫咩名的前菜，但好食。涼拌汁酸酸辣辣，豆乾絲、海帶絲、芽菜帶來不同的口感。

炒飯，炒得好味，好香。

小籠包，皮好薄，有好多汁，夾起都不易穿，真係幾高質，加醋好好食好鮮味，不得不吃。

紅油抄手，個汁有濃郁既麻油香味，幾入味，唔算辣呀，仲有少少酸甜味，啲皮又好滑，好開胃。

擔擔麵真係幾好食，麵質彈牙，軟硬度適中，湯汁比平日吃的濃稠一點，花生香味得濃郁，唔算太辣又幾有麻味。

最後仲加點了煎鍋貼同埋豆沙鍋餅，但冇影甜品，煎鍋貼外形像日式餃子。餃子包著的蝦經過煎香後還有肉汁在裡邊，底下脆皮好脆口幫他增加了口感，咬一口裡面又有汁，好正。


爸爸媽媽我同熊人都好喜歡食上海嘢呢，呢間比起翡翠拉麵小籠包真係高幾皮，鼎泰豐點解咁多人食，因為食物真係幾好，KEEP到水準，食物唔會太濃味，清淡，食完唔會口渴。如果屋企附近可以成日食到呢啲嘢食就好啦。