20120531 - ☆★小雪園★☆

5月31日星期四

想食上海嘢，熊公司附近食過一間老正興，好平，味道一般，但百幾蚊兩個人算OK，但個環境麻麻，

所以今次試間門面靚啲的叫小雪園。
門面靚，價錢自然貴啲。

點了担担麵，個麵有啲奇怪，唔係我地平日食開的担担麵，唔知邊隻至係正宗，冇花生，冇麻醬，取而代之係雪菜，仲要有一層紅油，幾辣吓，
麵質OK，幾特別。佢個麵其實唔差，只係唔係我心目中的担担麵。

醉雞都幾好食。

雞絲粉皮，青瓜好爽脆。

 小籠包一般，皮未夠薄。

 

其實唔差，不過唔太抵食。



20120531 - (◍•ᴗ•◍)cova cake 兩件

5月31日 星期四

在LUNCH HOUR買了兩件蛋糕，打算放工同熊一齊食。

點知食完飯又飽飽了。
於是叫熊拎返屋企食。
熊食完影返相俾我。
呢個係MANGO CHEESE CAKE，凡最鍾意的COVA CAKE，因為喜歡芒果味，芝士又滑，有芝士味但唔會太濃，每次通常會買一件。

 

 呢個係梨撻，熊話好食呀，
我喜歡梨夠清。
仲有合桃喺上面。

 熊食哂兩件肥肥。

20120529 - ╭。☆CASA☆。╮

5月29日星期二

有同事今日生日，我咃12樓女仔會搞食飯。
今次去了蘭桂芳的CASA 食。
一貫中環LUNCH 模式，可以揀SEMI BUFFET，只揀MAIN COURSE或只要頭盤+甜品都得。
十幾個女仔，唔駛要哂咁多個MAIN COURSE
但人人都要頭盤+甜品，SEMI BUFFET

都幾多嘢食架。有HAM ，三文魚，蕃茄仔。

 

 一早拎定甜品，
質素唔差，意大利芝士整得好食，焦糖布甸夠蛋味。

 價錢都可以接受。

 MAIN COURSE - CARBONANA

 BURGER

 

 

 長通粉。

 蜆肉扁意粉。

 魚扒。

 意大利飯。

 食到好飽，最正係甜品，整得幾好食，可以再翻兜。

飽到死，夜晚仲約人食飯，因為要問人借IPAD過相的USB。肥死鳥。

20120526 - ♤♠家常便飯♠♤

5月26日星期六。

唔記得咗當日做過乜，只記得熊整嘢俾我食，因為有影相。
豉油蝦。
我影得好靚。令到佢好似更加好食。

 欖角蒸魚，我第一次食欖角，因為媽媽從來唔整欖角的，都幾好食，個味好濃，用來蒸魚的時候調味好好。
原來是用新鮮的橄欖制造，而是選用黑欖作材料，黑欖有山蠔豉”之美譽。 我估係廣東人食多。
好味。

 另外有腐乳通菜，原本想椒絲腐乳通菜，但冇椒絲，但又買了樽腐乳回來，所以就用我屋企的方法，當醬咁點。都幾好食架。

兩口子三個餸。

20120523 - §§小金井§§

5月23日星期三，

同熊去了熊公司附近，又係食小金井。
變成我倆的飯堂之一了。

 今次食了豬軟骨拉麵。

 又點了天婦羅。

20120519 - ❤♡一風堂♡❤

五月十九日

星期六要返工，但冇同熊一齊食lunch。
反而同同事食lunch，中環開咗一風堂，星期六下晝應該少人啲啦。
都唔駛點等。


 7,80蚊個拉麵，

 好細碗唔緊要，最緊要好食，不過我覺得好難食，因為好大陣荀味，好臭，好多湯底都有荀味，而且仲有味精，食完口渴到死。
係隻糖心蛋ok。

 因為太細碗麵，所以share叫其他小食，叫了餃子。

仲有墨魚，得幾粒，少到呢。

 夜啲同熊去赤柱的朋友屋企gathering，中間有時間剩，同熊去了舂磡角。
有特別意義的，第一次見熊佢知我喜歡影相就話同我去舂磡角影相，我以為佢係講笑，不以為然。

點知過冇耐熊真係約我去嗰邊行。我就覺得熊有啲嘢了。
到正式拍拖第一日就係去了舂磡角同赤柱。當日我都仲係有啲迷惘架。

5月19日天陰陰的一天。

當晚同熊有爭吵，不過好快冇事，仲話去睇歐聯冠軍為名去了熊屋企呢。

20120517 - ♪♬♩♫Wing's Kitchen♪♬♩♫

5月17日星期四

同熊去了尖沙咀。
行吓行吓去了Wing's Kitchen
好似啲嘢唔錯，不過都貴貴地。
間嘢暗暗地，好似幾好氣氛，仲可以開酒飲，不過冇開到，因為熊唔飲酒，一個人飲冇咩意思，唔想浪費，

沙律好食。

 青口，唔好太高期望，只係不過不失

 Parma ham pizza 都唔錯，好似話大力水手pizza最出名，

我地去食當日冇咩人，得一半人，後來經or 賣過廣告之後，好似好多人喎。
食物一般，唔差，但未去到話好好食。
一試無妨嘅。

20120516 - ☆★心粥館★☆

5月16日星期三

以前好少食粥，因為怕味精，同熊一起後就食多咗，好喜歡舊區的粥，油條，腸粉。又平又抵，
在沙田火車站呢啲地區，唔會有平粥食，
但又想食粥喎，就試吓連城廣場的心粥館，好貴的粥
百五六蚊一個二人粥餐。

不過除了粥之外，也有其食食物，例如米線。
米線都幾清〝什錦咩都有，但三哥米線就平好多。

 仲有小食，揀了炸雲吞。
都幾新鮮，唔會林哂。

 粥都幾好食，唔會話好重味精。

 糖水- 木瓜雪耳，但舊雪耳唔靚。

20120514 - ❤❤小金井❤❤

5月14日星期一

熊通常星期二四夾band。星期一三五就通常同我一齊食。
我哋有時會去熊公司hea，傾吓坐吓，hea hea 咁。
好多閎晚飯就在熊公司附近的小金井食日本嘢。

今次點了二碟壽司。

 同埋拉麵，豚肉生薑燒拉麵。

 平平淡淡但充滿愛，咁就一日但開開心心。

20120513 - •●❤母親節❤●•

5月13 日星期日

母親節

因為母親節外出食飯貴，所以往年都唔會外出晚飯。
今年一早同媽媽去金滿庭食午餐，仲帶多了熊一起吃，
一早叫熊幫忙去花墟訂了扎花俾媽媽。
當日熊先去花墟取花再到來呢。

人生第二之送花俾媽媽。
第一次送係小學花了九十大元，當年已經好貴了，大概是4,5年級左右吧。
宜家就熊負責送了，現在少了時間陪媽媽，希望媽媽開心吧。
粉紅色玫瑰花是熊的意思，希望唔好咁娘呢。
我想係女仔收到花都會開心，雖然好浪費，但間中收到會好開心。


 之後同熊買了個朱古力蛋糕去探熊媽媽，希望自己媽媽開心之餘，也希望熊媽媽都開心。

其實早在幾日前即星期五，阿嫂在聖安娜都買咗個母親節蛋糕俾媽媽。
木糠布甸蛋糕，諗住實好食啦。
點知完全唔得。
似普通蛋糕，得啲餅碎係面。
大佬呀199一個蛋糕架，俾多少少heart銖喎，唔好整個普通蛋糕然後放啲餅碎喺面就算咁離譜至得架。

 個樣好ok，但唔好食，食個普通忌廉蛋糕好過。

20120512 - •●❀ 又是鳳凰木的季節❀●•

5月12日星期六，唔駛返工。
因為天氣開始熱就冇得行山了。
同熊去了黃金海岸HEA HEA。

又係Pantry on Broad

香蕉窩夫都幾好食。

 三文治。

 唔知算係批定蛋餅正呀，我本身好like 食批，蛋餅之類。

 之後同熊hea 行屯門公園，天氣好好，開始熱了，屯門公園好多老人家，有人唱曲，有人下祺，但眼前最吸引我的是一片橙色。
春夏樹特別青綠，心情都好啲，每年春天會見到洋紫荊，之後會有木棉花，大紅的木棉花開過後，就會見到橙紅的鳳凰木。

 太陽好猛烈，散步過後已滿頭大汗。
之後我倆去街市買菜。

又是熊喜歡的海鮮。
好食的螺仔。

 蟹，

西蘭花，

 

 

 

 

 

 

 

 

 

 

 

 

 

 

 

 

 

 

 

 

 

粉絲當飯食。

全部都是熊整俾我食的。