今日有免費飛入迪迪尼，不過要16:00之後才可以入場，因為姑仔公司每人有三張飛，佢自己只用一張，問我哋去唔去。我自從上年大肚時的奇妙處處通到期之後已經冇再續了，因為大肚入去唔方便，生了以朗之後又冇時間玩，最後一次好似係2016年2月入園，其實我好想去，不過又冇錢，因為一日飛已經加到500幾蚊了，太貴，如果去一天，不如買年票。
我打算BB三歲前買年票，因為BB三歲前都係免費，兩張年票可以三個人入園都唔錯。
當日BB瞓完晏覺先出發，BB坐熊人的車，一入隧道就扭計。HAHA。
入到PARK影相佢都唔知咩事。
之後開始俾BB落地行吓，佢好開心，喺美國大街個亭度行。
見到聖誕樹，汽球都手指指，好開心，咩都好新鮮，由於入園都已經成五點，行一陣SHOP佢想玩玩具，玩到唔想走。
捉走去睇飄雪，聖誕樹亮燈，佢冇玩玩具咁開心，不過都好用心睇，人多，好多燈佢都好開心，今日天氣都幾凍，夜晚應該得15度左右，有飄雪時都好好氣氛，我同熊人六年前剛拍拖時都係睇飄雪好開心架。六年後仲有以朗3人行，好感動，今日爆多人。睇完,飄雪想食吓嘢，但等位都有排等，本身唔想去明日世界食炸雞，不過因為城堡的皇家宴會應有EVENT冇得食，只好食炸雞。
食食吓有晚間巡遊，因為媽咪唔肯留得夜，有了幾年的夜間巡遊都係第一次睇。
原本BB食緊飯冇得睇，最後我都忍唔住一個人出去睇吓，用手機都可以影到吓，都唔錯。
BB食嘢好唔專心，成日撩人，專係撩啲後生女，同BB女，真係天生溝女王啦。
佢最後仲同一個17個月大的BB女眉來眼去，情深款款咁，好好笑呢。
最後煙花要九點先有，BB睇到尾段就頂唔住瞓咗啦，一返到屋企又醒，之後唔瞓激死。
今日同BB乜都冇玩過，連城堡都未過到，但我都希望等BB下年識行同佢一起去多次，相信到時佢識玩會好開心。
