20170831 - ♣♧成交+永樂園熱狗 ♧♣

8月31日星期四。

今日成交日，終於成交了。我放下午，四點上律師樓，中間沒事做，於是先去東亞入40元報PN班之用，之後又行返去永樂園買食雙腸熱狗當午餐，之後再上去歷山大廈的星巴克坐坐。

一直坐到四點先去環球大廈成交。

 

坐下食住永樂園熱狗再 配咖啡，不錯。
永樂園的熱狗要趁熱吃，在昭隆街的永樂園，他們買東西的方式，仍然停留在以前的年代，在櫃位先付錢買票，雙腸熱狗HK$17，阿姐給我一張HK$15和一張HK$2的票，只要拿到專出熱狗的前台，就可以換取熱狗，簡單、懷舊。

 麵包外面焗到有少少脆，腸仔味濃，味道似雞肉腸，不過肉質實啲，超細條，但唔緊要，因為入面好多醬😍。入面熱狗醬先係佢既精粹，酸酸甜甜，又似沙律醬，配埋熱辣辣麵包真係一流。

想不到下午二時後的中要STARBUCKS，過了午市時間都是坐無虛席，空位不多，找到一個有梳化的就坐，就開始不停寫BLOG，一個小時有多，只是完成了六篇，還有很多篇未完成，又要等下次有空了。

成交了之後就走到HSBC入票，之後再去坐681，回到馬鞍山，就去千色買了一個膠箱讓BB放玩具。
回到爸媽家，BB食晚飯了，我可以餵餵呢，BB見到我好開心呀。我都好開心可以見多BB兩個鐘。

20170826 - ☼去游水+ 表哥生日☼

8月26日星期六

難得熊人不用夾band，今日寶寶食完早餐之後再豬了早睡，吃完兩點奶就起程去游水。

第一次游水，其實沒有游，只是在嬉水池玩水，希望讓寶寶感受吓游水的感覺，我因為見到太陽太猛烈，所以冇去游，只在看台看著他們兩父子玩水，熊人話寶寶起初好驚。因為泳池多人，而且環境陌生，但熊人帶著寶寶適應地方之後又喜歡水水了。只是寶寶不想離開熊人，所以唔肯坐水泡車，我乾等了九個字之後，接了熊人他們又到迎濤灣吃麵。回程時寶寶豬了一陣。

晚上是寶寶表哥生日大食會，熊整了意粉，我們仲有沙律，雞翼，魚，牛等食物，仲有反斗車王的蛋糕。

表哥好開心呢，熊人之後同佢哋玩玩好攰。

祝表哥生日快樂，快高長大。

20170827 - ★☆又打風（帕卡）★☆

8月27日星期日

又打風，五日內第二次掛八號風球，半夜已經被風吹到掠衫個架，熊人起過幾次身，冇覺好瞓，六點半大風大雨，阿姐都出去，真好嘢。

個風都幾勁，吹到幾正，我覺得大風過十號風球當日。BB可能因為落雨涼涼地黑黑地，肯瞓到8:50，感恩。

一如平日朝早整好食物俾BB之後就我哋食早餐，BB宜家好憎人放佢喺床上，因為似個監倉困住嘛。

初初喺監倉好開心 ，都仲有玩吓。

之後唔耐煩就孩啲玩具出床床。

再過幾分鐘就要扭出來。

扭到塊面變成紅色，成個關公咁。 HAHA~

我哋照食早餐，同BB豬一陣，都仲好大風大雨，等到兩點幾轉三號波就即刻同BB去行街，行吓行吓BB瞓咗，我哋就去街市食腸粉魚蛋豬皮，之後又上婆婆屋企，BB喺街瞓半小時就唔肯再瞓覺啦。我哋晚餐食埋昨晚食剩的意粉，爸爸整菜心，簡簡單單又方便，

由於BB唔肯再豬，同佢提早九點半瞓好了。

20170824 - ◤朗豪坊貓貓◥

8月24日星期四

今日有口福，下午茶有cupcake ，因為IT dept 有人last day買了 cupcake 作散水餅，但有同事放假或外出工作，所以有多就俾我哋。有一個red velvet，但面係白朱古力，冇揀到。我揀咗個上面有黃色topping 的。好耐之前食過呢間嘢覺得好甜好甜，今次有心理準備係甜到核爆。

點知又唔係啊，幾好食，蛋糕鬆軟，而黃色的醬似是檸檬味檸檬味好鮮而且酸酸甜甜，好好食，因為檸檬酸味所以唔覺得甜。不過同事食的就聽聞好甜啦。

晚上去寶星睇一睇層樓，因為昨天打風管理處打過來，幾驚跌咗隻窗落街呀，諗諗吓下星期都交樓，要上上去睇吓有冇關好窗。

我哋約咗朗豪城等，坐小巴去，我早少少到朗豪坊影貓貓。好彩冇特登去咋，因為只係貓貓相展覽，雖然我都覺得靚，但我唔係貓痴，唔覺得好正。

如果星期六日又熱又迫去就唔需要了。

啲貓貓相係好靚，但我其實係想有得同bb影相的影相位。

有店舖賣貓貓嘢，但未行完就趕去同熊人會合了。

晚上找朋友吃飯，又係尚品小廚，好耐冇食過重口味嘢，今日好開胃呢，吃了不少椒鹽鮮魷，正，晚上回家又吃了一點自家製芒果芝士凍餅，好耐冇食凍餅，芝士襯芒果好味。

今日嫂嫂影寶寶拉屎的樣子，好肉酸呢，回家已經十一時了，寶寶豬了，今日一整天見不到寶寶。

20170823 - 十號風球✿｡◕‿◕｡✿

8月23日星期三

今日打風呢，原本話凌晨時分掛八號架，點知個風行慢咗去到五點幾先掛八號，我哋因爲都唔肯定係唔係八號，所以照較鬧鐘，七點前醒過一次見到八號就再瞓返啦。

到差不多九點起了見到九號風球。

九號風球又叫烈風或暴風增強信號，所以估計過多一陣會掛十號，因為颱風天鴿已增強成為強颱風，而且仲會喺香港近距離掠過。結果0910就掛起五年來的首次十號風球。

吹10-12級風，好少見吧。

BB因爲打風落雨，天黑黑，所以比平日遲了一點起身。差不多九時才起床。剛起床的BB眼腫腫呢。

之後趁BB豬了，就過去爸媽家坐了一會兒。回家就吃午餐，打風的麵，有菜，午餐肉，磨菇，黃椒，BB則吃菜心素麵。今日寶寶食少了一餐奶。只吃早晚兩餐而已。

八號風球到下午三時之後才除下，所以今天不用上班，多了整天的假期。

晚上雨停了，而寶寶因爲不肯睡覺，所以提早九時半飲夜奶，我們趁寶寶豬了去跑步呢。大風雨過後天氣涼了很多，跑步很舒服，也完美地結束了一日額外的風假。

20170822 -◆ 鴻福堂line friends 飲品◆

8月22日星期二

因為星期日食壽司，所以星期一冇帶飯， 今日去金鐘廊間ok買嘢食，順便儲印花，金鐘廊有coupon可以廿蚊平十蚊。所以排哂大隊。

上次食過疏乎蛋的蛋黃醬栗米煙肉三文治幾好食，今日又想食加支咖，好味。

可以換到支筆。車車筆。

星期二又去ok，因為仲有一張coupon23/8到期，聽日應該會打風。今日唔用冇得用。

俾我發現咗有鴻福堂line飲品，13.8兩支，好靚又唔貴，即買。仲買了蛋黃哥玩具。

之後發現，原來除了熊大仲有兔兔同莎莉，第二日打風在屋企附近買到兩支。

原來有啲仲有磁石貼送。但唔係間間有呢隻有得送的磁石貼賣，所以只買到一枝莎莉有得送咋。

另外仲有月餅，好似送保溫袋，但熊人好似唔想買。

20170820 - ★☆元氣壽司★☆

8月20日星期日，

之前幾個星期日都唔肯瞓。今個星期日終於都肯瞓到八點幾。

一如平日星期日，熊人整早飯俾BB，沖涼，我哋自己食早餐，然後BB豬一陣覺仔。

同BB豬覺，望住BB豬真係一件好開心同幸福的事。

之後同BB玩一陣。到三四點佢有啲想豬，但唔肯瞓，我哋由得佢啦，同佢去元氣食壽司，

今日只有我熊人，同爸爸媽媽，人少少食壽司都平啲。宜家好少食壽司，對上一次好似係2-3月，BB都未識坐，宜家BB已經係一個識坐同識食少少嘢的小人兒，由於佢好眼瞓，所以嘈生哂，我哋只好俾飯佢食。

 

今日我哋食咗墨魚仔。

八爪魚。

我最愛的帶子。

好鍾意呢個熊仔FIGURE，如果有得賣就好啦。 似熊人。

爸媽至愛軟殼蟹手卷。

仲飲了三文魚頭湯。鰻魚壽司。

至愛的腐皮。

去東京之後喜歡食的玉子。

媽媽今日忽然吃三文魚。

清清地的青瓜卷。

爸媽的牛油果軟殼蟹卷，牛肉。熊人的油甘魚。

BB一直都想瞓，所以好嘈，好彩餐廳都好嘈咋。我哋唔夠六點就俾字母粉BB食，食完我哋輪流抱佢出去行，我抱到咁上下佢已經想豬，最後埋單時，公公抱住佢就豬了，我睇住呢個場片覺得好溫馨，想像到三十幾年前爸爸都係咁抱住我，爸爸媽媽係我人生最錫我的人，永遠冇人可以取代。

 

返到公公屋企，BB又醒了，於是喺度玩一陣。之後返家，見BB仲好眼瞓，想暗佢，佢唔肯仲要喊，嬲到我鬧BB。最後佢攰到癲癲得得，提早九點半飲奶，早啲瞓。

20170820 - ♥ 好味字母粉♥

8月20日星期日

Day 321

 

逢星期日係大廚熊人整好嘢俾馮以朗的日子，
平日工人姐姐都係整粥仔，爛飯之類，
到星期日就會食吓麵，由於睇健康院本書仔發覺BB可以試食三色椒同菇類，所以我哋琴日買咗啲磨菇，而晚飯又食剩了一些三色椒，
所以今日就整咗個蕃茄三色椒磨菇比目魚字母粉，由於三色椒好夠色彩，所以好靚，而字母粉用電飯煲煲，有蕃茄，三色椒，磨菇味，有啲湯汁濕濕地，好似雜菜湯咁，無論色香味都💯。馮以朗當然好鍾意食啦😍😍

用個碟裝，影相影得靚靚，好多人勁讚。

食剩啲仲俾我食埋。

 

BB跟住我冇得好食，因為我唔識煮，跟住熊人先有好嘢食呢。

20180819 - ◐大門食堂@禾輋行街街◑

8月19日星期六

今日去禾輋行AEON。

想去12蚊店買嘢。

出門口BB好醒神，今日又帶BB車又帶孭帶，天氣好熱好曬，BB坐巴士好嘈，最慘又成車滿座，好多人望BB，可能BB太熱，車內面又熱，所以好無耐性。

 

AEON超市都行咗一陣，買了日本麵。行了一圈唔知食乜，但買了水泡。

之後行返落地下見到有間食日本嘢。當時三點幾唔多人。

熊人食了漢堡扒，

BB係咁吼住啲白飯，有得食又開心大叫，張BB椅冇扣有啲危險，好彩BB有得食嘢都幾定。

兩父子好溫馨，兩位姓馮的男士都係我喜歡的。

我自己就點了一個沾麵，沾面是一碗面和一碗湯分開上的，湯里有紫菜同埋叉燒，很濃厚。挑一匙面浸入湯內，讓汁掛上後送入囗中，味道不過不失，不過係得兩舊好細的肉。不過早餐飽都冇所謂，因為沾麵係分開上，所以可以倖淨麵BB食，BB又食飯又食麵都好開心。

之後由禾輋行去新城市，BB開始想豬，爸爸孭BB，行過去唔耐，但天氣好熱。最後行到有冷氣的新城市BB豬了，我哋喺冷氣地方休息了一陣仲買了兩個泡芙上車食， 一個原味，一個TIRAMISU味，食埋甜品，一天很完美。
BB落車先起身，佢用孭帶先瞓，BB車唔瞓，佢坐車瞓覺，我哋舒服好多呀。