20130831 - ◈◈食食食◈◈

 8月31日星期六，

放工入屯門找熊。同熊食日本嘢，一個SET有冷麵同埋壽司，都算抵食，不過冷麵麻麻，麵質唔夠幼，似油麵。

 另外仲有壽司，都OK，好似$5X都算抵食。

另外點咗個鰻魚飯，幾好食，鰻魚夠多，鰻魚汁都夠多。



之後瞓一陣晏覺，就去食晚餐，去翡翠潮人潮食，以為佢係只食潮州嘢，原來仲有星加坡嘢，因為係翡翠拉麵小籠包的集團。

點了兩樣咋，包括方魚肉碎蠔仔粥，不過麻麻地，竟然有啲腥，同埋比較稀。

另外點了鵝片三拼，有一味鵝片，另外兩樣自選，118元，如果點鹵水三拼就88元，不過唔包鵝片，我哋點了大腸同埋豬脷，少食豬脷。
鵝片唔似平日食開咁薄，不過好鬆化，好少食到咁好食，而且有豆腐墊底，都好好食。

之後同熊去了大連排道的樂人地帶睇BAND SHOW，好激的BAND，好憤怒呢，好大聲架，熊都頂唔住，未睇完都走了。

之後去了福來村食甜品。

淺草甜品手藝，

有綠茶心太軟。都幾好食，綠茶味都幾好，唔會太甜，不過配雲尼拿雪糕不太夾。唔知配咩雪糕至夾。

我哋一人一個心太軟。熊係朱古力。雖然皮唔算太脆，不過好多朱古力漿，好流心。

20130830 - (￣▽￣)~*blog要搬家了

8月30日星期五

blog要搬家了，個yahoo blog 用咗七年，估到佢唔玩得好耐，但冇諗過真係話摺就摺，
成千篇blog，冇可能搬到過來，唯有由宜家開始，寫呢度。
最怕的係唔知呢度又可以捱幾耐。

盡量會keep住寫，因為一定會有一個讀者睇的。 :D

yahoo，快啲執笠啦。

20130830 - ◐跑快咗◑

8月30日星期日，

又跑步，呢個星期跑兩次。本身有少少頭痛。

朝早好大雨，以為跑唔到。點知晏啲都冇雨，照跑，可能落完場好大雨之後涼咗好多，海濱長廊仲好大風，跑到過一公里之後先覺得好熱。今日估計好好狀態，點知都係爭二百米先跑到終點。因為頭痛呀，呢排成日頭痛呢，不過去完洗手間之後再跑又唔痛啦。星期三四仲有少少感冒，但跑完又好似精神哂。

回程都冇跑哂，都係爭三百米左右，不過好似跑的時間短了，跑快咗。而且一個星期都跑到兩日，已經好好了。

20130829 - ♪♬♩♫ 上海婆婆♪♬♩♫

8月29日 星期四

今日放工同熊去尖沙咀睇結他帶，因為想買皮製的，睇通利的要四百幾蚊八五折。於是去買Isquare柏斯度睇，有條平啲270。

買完都冇周圍行，因為有少少唔舒服，朝早好頭痛，有少少作病，所以在isquare食吓嘢就算，我地揀咗上海婆婆。

每樣野細細碟，一啲都唔平。

揀咗個頭盤四小拼，一次過食四樣冷盤。每樣得幾啖，但都要98蚊。有肴肉，烤夫，脆鱔，糖醋排骨。

另外點了葱油開揚伴麵，同平日食開的唔同，伴麵即是撈麵，不過都係暖的，如果想要冷麵就要點寫明冷麵的。

小籠包的皮好薄，熊話始終覺得肉汁啲味唔及台灣鼎泰豐。我冇食過就唔知道了，其實呢間小籠包都幾好食，仲有塊薄薄的瓜墊在小籠包底部，幾精緻。

最後是玫瑰菜炒魚絲，唔知咩係玫瑰菜。魚絲幾滑，但食完都唔明咩係玫瑰菜。

Overall都好食，而且食物精緻，但偏貴。

20130828 - (◍•ᴗ•◍)探BB

8月28日星期三

琴日阿哥個仔出世，大家都好開心呢，今日我同熊放工去仁安醫院探阿嫂同bb，放工時間好多人呢，最遲七點九前要到。

好多BB一起推出來，好多都瞓緊覺，好彩姪仔冇瞓到，都幾精神，仲有打瞌睡呢，好細個的BB，大家見到都好開心。

哥哥八點至到，睇完b了，但可以陪阿嫂食飯。我哋四個人去了西餐廳食，因為之前食過職員餐廳麻麻地。呢間啲野好食好多，裝修又正。

食咗個西蘭花炒斑球飯，幾新鮮，有水準呢。

仲食咗個辣肉腸pizza,雖然pizza的芝士一般，但勝在pizza夠薄。算係咁。

最後係燒豬仔骨，得三條咋，個味道都可以。呢間餐廳喺醫院嚟講算你幾過質素，同埋多款式揀，不過價錢一啲都唔平，只有三樣野夾埋已經要47x元。不過要探b就冇法子。

20130826 - ☹跑得差☹

8月26日星期一

又跑步了，天氣已經冇咁熱，不過都唔係好跑到。已經遲了起跑，未跑完三公里就停了。唔知點解唔係好夠耐力，跑到二千幾之後個頭好熱都有點痛，所以冇跑足三公里就要行，行多咗先再跑過，

回程跑到仲有一千米左右就行，之前差不多跑足全程，唔知係唔係差咗？定係因為時間快咗，所以唔夠力？因為雖然遲了起步，同行多咗，但回程時間又唔係遲好多。

算啦，宜家跑一次其實好大運動量，就算行多咗都係流好多汗，keep 住跑已經唔錯。努力。

20130825 - ☼☼汀九日落☼☼

8月25日 星期日

熊星期六同朋友打牌，好早至返，的都唔打攪佢，由得佢瞓，所以熊成三點先到。我想影日落，不過咁早，所以行吓先，去了荃新天地行吓，有好多熊貓呢，影吓先，好多細路仔，所以求其影。

唔知食咩好，反而去了如心廣場見到有熱狗店，買熱狗食。

熊食隻熱狗有牛肉，係一個餐，有沙律同飲品，

另外點個德國熱狗，唔要餐，德國熱狗個包好細，有兩條腸任揀，仲有我最喜歡的酸瓜，不過唔放在包裡面，自己整，揀左豬肉腸，同香辣腸，兩隻都好食，加mustard 。唔錯，沙律都有腸仔呢。

今日間條熊都出街。

食完就去汀九影日落，但天氣麻麻，好大舊黑雲，冇落雨，但遮了太陽，冇鹹蛋黃，最慘連magic hour都唔magic就有點失望了。唯有影其他野，成日逢星期六日就天陰，整整下又夏天快過去了，好難再有靚雲影啦。

 有人釣魚呢。

樹中透出太陽。

 雲太厚，只有散射光。

magic hour 唔magic

影完同熊成七點幾至去街市買海鮮煮，熊又整到身水身汗了，次次都好唔忍心。每次熊煮俾我食我都好感動，因為世上除了父母之外，竟然仲有人會無條件咁愛自己。

熊整咗蒸蒜蓉蝦，豉汁蒸蟶子，仲有炒蜆，兩個人食三碟海鮮，所以冇食飯。

20130823 - ♠♤Cafe Habitu♤♠

8月23日 星期五

約了vyvy 同chanc9 食晚飯，預早好多同Vyvy 慶祝九月份生日。因為佢地都有小朋友，九月份開學會好忙呢。

去圓方食，我好似接近兩年冇去過圓方。因為冇野好行，全部名店。又唔太方便。今次去Cafe Habitu table，之前食過係自己serve，但宜家改左有人serve,因為有table呢個字。在溜冰場上面，可以睇住人溜冰，但啲嘢食會凍得比較快。

我哋點了素菜寬條麵，好好食，同埋比較特別，平日多數有牛肉，好少有素菜，但唔會因為素菜而冇味。因為有芝士同茄醬等，一樣好香，芝士唔會過濃。

另外點了Parma ham pizza,薄薄脆脆的，但Parma ham 比較少。個人覺得pizza express 的好味啲。

仲有漢堡，我唔食牛，所以只食少少包同埋煙肉，薯條，份量十足，而且制作需時，等咗幾個字。但應該唔錯。

佢地一人一杯咖啡，我因為肚屙唔敢再飲啦。甜品點了心太軟。好食，熱辣辣咁上，而且好大個。最好幾個人一齊食，好多朱古力漿。

食完都只係九點唔夠，知道熊仲喺公司未走，於是就買蛋糕俾熊食。Chez Shibata三四十蚊件蛋糕，但就麻麻地啦。一件係酥皮，呢件ok,酥皮脆，吉士香，不過甜左少少。

另外一件成個白色雪山，以為好食，問店員話白色係唔甜的cream,中間是香蕉。但唔好食，有熱情果，但熱情果太少，唔香。香蕉都冇咩味，最大問題是椰絲，好憎椰絲，椰絲唔甜都好，但同件蛋糕唔夾。幾十蚊買件蛋糕想熊開心吓，但唔好食。好失望。