20160523 & 30- ◈◈陪熊人跑步◈◈

5月30日星期一

整個四月天氣都差，不停下雨，無跑好耐啦，我宜家都唔跑得，但五月中病咗兩星期，身體好差，又同身痛，是時候運動一下了。

五月中之後少了下雨，於是去跑吓，熊就跑跑，我就半跑半行，都幾好呀，直路跑，轉彎行，唔會唔夠氣，但呢啲天時可以出到汗。

尤其30/5，晚上都29度，就像七八月咁熱，行都有汗，以前跑長廊會有啲風，宜家跑球場好焗，但我都好羨慕人哋可以跑跑。

最慘臨回到家途中，輕微扭到腳，可能有排都唔可以運動。

成個五月都黑，病足兩星期未好番哂，點知最尾幾日都整到腳，好慘。

20160529 - •●❀尋找鳳凰木❀●•

5月29日星期日

今年鳳凰木開得特別靚，五月份開始，滿街都是橙紅色的，不少路旁都被染紅了。

有時在車上經過看到不少鳳凰木都想落車影相，不過上班的日子，何來有閒情日誌？

 

中文大學前。呢棵好細，但形狀好美。

於是趁星期日好好天就去影吓，原本有啲位好靚，不過有大貨車停泊而影響到唔靚。

呢度係富安附近，崇真中學。

近攝的鳳凰木，其實不太吸引。

沙田近宜家一帶好靚。

近攝的花有點像大紅花。

聽聞瀝源邨好靚，不過下年先會去啦。

20160528 - ❃❃Italian Tomato❃❃

5月28日星期六

賣車之後少了回家吃飯，或者返去瞓多啲，琴晚返去瞓，雖然次次好多感觸，但要面對及成長⋯⋯

朝早十點起身，等埋媽咪先一齊落街食。媽咪次次都喜歡Italian Tomato，

仲要次次都食卡邦尼。

我就食菠菜忌廉意粉，都幾好食。

加48元有蛋糕及飲品，呢間蛋糕咁好食，又點會唔加。我食芒果夾心，媽媽食芒果士多啤梨。

之後媽媽陪我買嘢，睇吓衫就再返家，晚上每家人煮幾道菜一起吃晚飯。

20160527 - ☼未完的日記☼

5月27日 星期五

連續兩天回娘家，有時回娘家是因為爸爸到澳門工作，想陪伴媽媽，今天則沒什麼原因，不想明天放假被家附近的工地影響作息。

回娘家通常必要做的事是看信件，或看看自己的物品，懷念以往未嫁的日子。有時會寫寫一本寫了多年仍未完成的日記簿，受哥哥影響，早在中學已有寫日記的習慣，有些日記簿已丟棄了，有些還在。隨著weblog的流行，手寫的日記本很少寫，於是幾年都未能完成一本日記簿。

今天寫日記之餘，竟然翻看了幾年的日記。由未認識熊人到認識熊人的整個十二月都有紀錄，之後兩年過得太幸福，忘了記錄，直到結婚的日記開始，變成報憂不報喜，日記多了不少淚痕。看著看著，我竟然淚流滿面。

百感交集，但，我知道我的日記以後都會有熊人，我要我們永遠在一起，還有很少頁數就完成的日記，最後是否可以盡是幸福的記載？

 

20160524 - 韓國直送<(￣︶￣)/

5月24日星期二。

好朋友由韓國出差返港，佢在出差期間我告訴了他好消息。

佢在韓國買咗好多嘢俾我呢。今專程約在旺角有個break先返家吃飯。

佢買咗好多嘢俾我，有兩支牙膏連膠杯，有牙擦，面膜，

其實我唔捨得用架，欣賞就算啦。

好喜歡熊大呢。

 

 

返家八點半先同熊人食飯。

20160517 - ★☆新煲☆★

5月17日星期六

是日同熊人及熊媽媽行街，行吓荃灣一帶，去荃新天地星巴克飲咖啡，我就飲豆漿，食吓蛋糕，之後行一陣，行到有一間有個煲299咋，但只有呢隻粉紅色先特價，雖然唔係鑄鐵，但設計都可以鎖水，唔知係唔係扮LC，因為宜家隻隻煲都扮架啦，

返去即刻試整紅酒燴豬骨煲，加咗薯仔同蔬菜，原汁原味，唔駛食飯。

20160510 - o(︶︿︶)o 病

5月10日星期二

母親節之後開始喉嚨痛，星期一都係捱住返工，到咗放工先有得睇醫生，都擓定星期二假紙，星期一晚食完飯已經開始想瞓，再沖完涼之後十一點幾就瞓，起身有想過返工，食完個早餐，食藥，好大雨，索性唔返，WHATS APP 甲蟲就再倒頭大睡，唔知點解可以攰成咁，竟然瞓到都市閒情先肯起身，食完碗粥又再想瞓，之後熊人捉我起身行吓同買餸，鼻水繼續流同塞塞吓。
之後食飽飯好似好啲啲。但夜啲都可以照瞓，宜家啲藥好輕，好得好慢，只有瞓覺先可以好得快啲。希望快啲好返。

20160508 - •●✿母親節✿●•

5月8日星期日，

 

母親節，冇車的第一個星期日，其實都冇咩嘢，返媽咪度只需要一程車。唔太耐，個鼻好唔妥。一早約好請爸媽吃壽司，所以都5點左右就落去。

點知五點等車時，都仲冇咩人攞飛，落到去五點三就等幾十張枱，馬鞍山真係唔係人住。

 

熊人見勢色不對，即時過去板長度攞飛，等幾個字就入得了。熊人做到嘢。

元氣壽司款式多啲，但小食就比較少，板長比較多魚生，如果要熟食壽司真係唔多。

由於爸媽同埋我都唔食生嘢，所以就點好多小食。

例如:牛蒡魚餅。

上面海鰻壽司，一般，但鰻魚壽司就超好食，好大件鰻魚又厚肉。所以之後再點多次。

天婦羅有好多款。即整，所以好食。另外仲點煎魚柳，牛肉卷，仲有勁多小食，軟殼蟹就唔好食，兩間各有各特色。

由於食好多，最後四個人食咗910，唔駛等位有代價。

鰻魚芝士一般，食鰻魚壽司好過。

如果等元氣，等到個半鐘都未食到，5:10等幾十張枱，好變態。

 

一早預定了蛋糕在馬鞍山攞，所以有蛋糕食。

個蛋糕賣相好過味道。

返家之後熊人要夾BAND。而我真就喉嚨好痛。

20160507 - ●✿西蘭花湯✿●•

5月7日星期六，
食完個拉麵都好飽，睇吓希慎之後，冇咩行，但怕地盤嘈，就返葵芳行一陣，買啲嘢食咁。
個人唔係好舒服，於是瞓咗場幾個鐘的晏覺，
瞓醒之後，熊整西蘭花湯，又幾好飲啊，熊只加少少CREAM，CREAM味少，冇咁濃味，多啲西蘭花草青味。西蘭花比較多鈣，所以好有益。
仲有啲即食芝士加落個湯食吓，我哋仲食頭先買的豬手。

同埋A1買的無花果芝士蛋糕，原來無花果同芝士蛋糕唔多夾，熊人話似鳳梨酥的味道。-__-

20160507 - ☎☎豚王拉麵☎☎

5月7日星期六，
好耐冇返星期六，因為見五月二日星期一係公眾假期，呢個星期不用返五日半，於是就返星期六，返星期六都唔係差，因為熊會出來中環接我放工。
想去希慎度行吓，因為知道VAN 同LINE crossover 出咗啲鞋，好想買，又想睇吓啲衫仔咁。
我同熊人坐叮叮去銅鑼灣，之後就打算食嘢先，去到登龍街，有幾間拉麵，其中有間叫博多一幸社，我哋去親京都都會幫趁，不過過咗嚟香港開店之後食過兩次，覺得有味精。
於是想試吓豚王，平日都好多人排隊，以前未有一風堂，一蘭等拉麵店時，好似話只有豚王最正宗，而當時佢喺蘭桂坊安和里環境係好麻麻地，但都好多人排隊，冇試過，宜家多咗好多分店。今日見豚王唔算多人，於是就等吓，連埋我哋只係等四個人，好細的店子，唔會坐得舒服，食完就要走。
門口俾定紙你哋揀，麵的幼細度，軟硬度，湯嘅味等，我哋第一次食當然揀原味。熊人就揀小辣。

麵質似一蘭，份量唔算太少，豬骨湯夠濃厚而又不會過火。豚肉冇雪味。

最好食係糖心蛋，佢同日本拉麵的蛋有啲唔同，係有醬油味，比較特別，不過十幾蚊隻，而熊人嗰碗就有少少辣醬，不過好似唔太辣，只是香。

最重要係食完唔口渴啊，喺日本食完拉麵唔口渴係好平常，不過喺香港真係好少會唔口渴。所以值得一讚同再幫襯。

但兩個人食咗二百幾蚊，真係好想再喺日本食呀。

20160506 - ♪♬♩♫自家制豬肉漢堡♪♬♩♫

5月6日星期五，
有時唔想食太飽，想食吓包包，好似冇咁易胃痛，之前同熊講想食吓熱狗簡簡單單。
點知佢整漢堡。 ^__^
我唔食牛肉其實好少機會出街食漢堡，因為出面多數是牛肉。
熊就自家制豬肉，再加芝士，磨菇，我覺得好複雜，見熊人整到身水身汗，但佢又話冇嘢。
磨菇又要煎，肉扒又要煎，好似好複雜。
最後出咗嚟係色香味俱全。
仲呃咗唔少LIKE。

20160504 - ✿｡◕‿◕｡✿掃街

5月4日星期三。

專登去葵芳吉野家打算換蛋黃哥雨傘或者杯，因為儲夠印花，而且要五月一日先開始換領，點知全部換完，於是去荃灣吉野家試試。都係換哂，真係好傷心。

 

去到荃灣就食晚飯，一開始食咗豬腸粉，都飽飽地，再食唔落飯。

之後再周圍行吓睇吓食乜，去咗十八座狗仔粉度食生菜魚肉，不過不失啦。

另外有個火鴨碗仔翅好似好特別，其實俾佢吸引先食，點知都幾失望，佢係有唔少火鴨，不過個味道同碗仔翅唔夾，淨碗仔翅好過了。

 

 

食完之後個胃好唔舒服，痛咗一晚。想點？