20180830 - ヽ( ^∀^)ﾉ悠閒病假

8月30日星期四

呢幾日以朗都好黐身，我未返就黐公公，返嚟就黐我，如果有表哥喺屋企就好啲，可以兩老表玩冇咁黐身，佢哋玩起上嚟好開心，尤其有汽球就玩到好瘋狂，星期三公公出差去澳門，好彩舅母剛剛下午放假比較得閒，專登陪兩老表玩到好開心，等我可以沖涼，真係好開心好感動，對佢嚟講可能好少事，但都幫咗我好多，唔駛成十二點先沖涼啦。

有時返去唔知同佢玩乜，會俾啲珍藏品俾以朗睇吓，例如LINE的一百張POST CARD，佢好似睇圖畫咁睇得好開心架，佢已經俾毒到一見到熊大就好開心叫BEAR，

之前手術同上環搞到元氣大傷，食了好多止痛藥同消炎藥。個人好乾好燥，又冇乜運動，只有HEA跳鄭多燕咋，原來做開HIIT同跑跑，一停下來變返鄭多燕係唔得，除了膝蓋痛之外，汗出得太少排唔到毒，
結果連好耐冇見的老朋友，風疹都搵上門，星期二晚沖完涼開始起，但又飲中藥止頭痛令情況轉壞，好彩爸爸俾粒抗敏感藥止住了，一直再冇食西藥，星期三晚睇中醫，十點飲完中藥就一點瞓，半夜好痕都知起緊，點知第二朝起身全身都係，星期二都仲係以身為主，今次一發，除了身之外，去到四肢頸都出哂，熊人未見過我出咁勁風疹，佢都覺得幾嚴重，我食緊早餐都痕痕興興，想返但又怕食敏感藥都止唔到，會出得更勁，所以都係唔返工，我都食粒抗敏感藥然後去媽咪度瞓，瞓到十點幾飲兩杯茶就去睇醫生，當時都好返好多，同埋去之前問一問中醫係唔係食完中藥會出得勁，佢話冇問題我就放心再服中藥。

十二點幾先睇完醫生，約媽咪去食LUNCH，今日趁機抖抖唔湊B，以朗唔知我放假，想休息，而且嫲嫲又嚟唔想掃佢興，我又想休息吓，所以今日好悠閒自在，難得媽媽又肯同我食飯，我哋行一陣買咗少少衫，之後又食Italian Tomato，媽媽食Carbonna，我吃菠菜pasta，好味，每人都加蛋糕set，大家都吃皇牌士多啤梨Cream Cake，但我打包了留俾bb一起吃。



今日屈了婆婆買了份玩具俾以朗，有蛋蛋同牛肉，以朗識蛋蛋，一見到蛋蛋就大叫，唔識啲嘢就唔敢講。

 五點幾以朗來到見到我好開心，食完飯等拎中藥俾佢食蛋糕，佢好開心。今日冇幾何嘆了一天。好少可唔湊b都冇罪疚感架，可能呢排幾辛苦，吊頸都要抖吓氣。

20180827 - (✪ω✪) 以朗照片

前兩日收到以前姐姐what’s app個佢仲喺香港，又搵工又想如果有人打俾我做佢reference ，我冇乜所謂，雖然唔信佢臨時先知佢家姐話幫佢搞掂，叫佢搵工，不過本著大家無仇無怨，而且佢呢兩年幫我湊newborn湊夜晚咁好，我幫吓佢都無所謂。

佢仲send 咗好多以朗啲相嚟，仲有啲同表哥合照，留個美好回憶，熊人話如果兩年後舊姐姐返嚟做都會考慮再請返佢，但我覺得佢已經學壞咗啦，而且兩年後以朗都唔記得佢係邊個啦。

同表哥成日跳，間屋玩到好亂。



好喜歡佢穿背心。好可愛，好阿叔。







用大機影相真係靚好多。

20180826 -♪♬♩♫去playroom ♪♬♩♫

8月26日星期日

今日唔打算去太遠，冇乜地方去，因為想喺附近行吓，買吓嘢就算，宜家個新姐姐暫時冇乜好，最好係星期日放假都十點先出去，今日直情冇地方去想留喺屋企。由於阿姐唔起身，以朗可以瞓到九點幾。

一早十二點幾就同以朗去playroom 玩，星期六日好多人，如果喺一點前去到都可以，冇咁多人，好彩第一次直入，之後再玩多次，之後過咗一點就派咗籌俾人。總之一點後就開始多人，三點左右最慘，可能要等兩轉，細路仔邊有心機同你等半粒鐘，所以都係一點前去最好。

睇佢玩時走嚟走去，大個咗好多，之前係全場最細，宜家佢好靈活周圍走，今次有幾個差不多年紀的小朋友，未好識同人玩，但都會玩吓。佢唔會好主動，佢只會主動同大個佢啲哥哥姐姐玩。





玩到最後又唔捨得走，又發爛渣收場。

之後去雅濤居坐入錢車車，本身玩得好開心，唔肯走。點知一同佢講yum yum ，佢就即刻唔玩想去食嘢。




食完嘢行一陣就返歸，今日bb同熊人瞓晏覺，我就趁機跳舞做運動。今日以朗可以瞓晏覺，精神啲，早瞓早起身，夜晚以為會早啲瞓，又要大半個鐘。嗚嗚。

20180825 - ╭。☆食早餐+ DPark☆。╮

8月25日星期六

自從上星期同以朗食早餐之後，覺得同佢間中喺出面食早餐係幾開心的事，我記得以前日日都喺屋企食搽麵包，間中去大家樂食早餐係好開心的事，亦成為了我的童年回憶之一。

你睇，以朗幾認真咁睇menu，人哋唔知以為佢識睇，其實佢連字都唔識多個。

都係叫通粉俾佢食好啲，其他咩煙肉，腸仔，流心蛋都係我哋大人食好啲。

意樂有樣嘢佢平日好少食，就係蒜蓉多士，平日食奶醬多，油占多，蒜蓉多士真係冇乜機會食。佢食得好開心。教佢用叉，其實佢都識用，但好少俾佢用，宜家俾佢用叉會勁開心。


近來都會玩吓呢知蔬菜拼圖，之前唔多識玩，宜家識玩，好多都拼到，拼得幾好，其實爭一個月咋，忽然又識玩，呢段時間學嘢好快，好似唔識，但唔知點解轉頭又識玩識做識講，要急反而急唔嚟，日日操佢未必有用，過一排再俾佢玩，再教可能會有驚喜。

之後返家熊人又瞓覺，等到點幾兩點再出去中染，買咖啡豆，可能因為近來瞓得少比較攰，去程竟然睡了，之後又去dpark 玩，今次個音樂琴玩一陣咋，玩其他嘢，咩都玩，但個滑梯只玩了一次咋，可能因為真係唔好玩啦，由於遲去，玩了一個鐘左右都差不多五點半，要走，以朗唔肯走發脾氣，

去楊屋道買海鮮，以朗冇瞓，但等候時都好乖好定，再開車先再瞓啦，瞓了幾個字又到屋企。其實佢好眼瞓，不過表哥生日佢有得食蛋糕都好開心，以朗知道蛋糕係好嘢，每次食完飯知道有蛋糕佢都唔會離開張枱、直到食到為止，真係好為食呀。

20180824 - ლ(❛◡❛✿)ლ食月餅

8月24日星期五

唔記得記返呢個星期一因爲冇帶飯，所以走去趁墟買麥當勞，因為當日有10蚊九件麥樂雞，我都幾喜歡食麥樂雞架，平日六件又唔夠食，所以九件應該好正，平日美銀間麥當勞好少人，點知當日都好多人排，排到出去店出面，一條隊，排到入去再去收銀排，排咗三四個字再加等嘢食足足成半粒鐘先買到，如果唔係冇帶飯又想食真係唔會排。再嬲係入到去同你講冇醬揀，而我見排咗咁耐又唔想只買一盒，於是買兩盒，我食一盒九件，發覺食到第八件已經唔想再食，好飽，好滯，但都食咗一盒，之後真係唔想再食第二盒，結果九件分俾同事食，佢哋好開心。哈哈，十蚊令人開心都幾好。不過排了半粒鐘，下次唔會再咁玩。

至於今日星期五竟然有得食月餅，因為宜家同秘書坐埋一齊，佢哋成日有月餅，今次好似係香格里拉，雙黃白蓮蓉，食了多黃的1/4，好正，好肥。唔知今個中秋會食到幾多月餅呢？期待。

宜家日日在媽媽家沖涼，成九點先返到去，少咗時間同以朗玩，又冇得做運動，今日星期五，夜啲沖涼都唔怕。早返屋企，同以朗玩好開心，佢宜家又好少搶我手機或扭睇電視，可以同以朗影吓相，宜家犧牲了運動，其實都幾無奈，但係每晚陪瞓都幾好，以前唔知道佢瞓覺時係點，會玩幾耐，點覺係瞓咗，因為佢大個咗唔要我暗之後其實冇幾可夜晚同佢瞓，唔知佢瞓覺係點。

以前唔會幫以朗剪指甲，因為姐姐搞掂而且佢郁嚟郁去剪唔到，宜家因爲新姐姐剪唔到，又係我，好多嘢到兩歲先照顧以朗，好似重新嚟過，但我反而都幾開心有呢個機會，因為小孩每個階段一閃即逝，過去了就無機會返轉頭，宜家可以參與返以朗成長的小節其實幾開心。

講真男仔會黐我黐到幾多年，宜家佢眼中只有媽咪的日子，佢長大了唔會記得，但作為媽咪的我，會呢一世記得，我會好好珍惜呢啲日子，而且更愛他。

20180822-23 - (〒︿〒)恐龍

8月22日星期三

好耐冇買玩具俾以朗，因為天氣一係好熱一係落雨，去玩具反斗城真係超級唔方便，好天氣曬落雨淋之外，人多路又窄，真係好怕多人勁迫同熱，所以好耐冇去亦都好耐冇買玩具俾以朗，今日因爲想去買份玩具俾表哥做生日禮物，見天陰陰冇咁熱就出去睇吓。結果去程時都落咗場雨。

買咗車王俾表哥。

而以朗就買了Dino

同埋旅行畫板。本想買狗狗，因為減價好平39.9。但中環店冇哂啡色只有灰色，灰色狗真係唔到似樣，所以買129的Dino，宜家幾樣夾埋過350，送50元coupon可以下次用，但只有1/9-7/9可以用，又要諗定到時買乜俾以朗了。

今日以朗屙咗人生第一滴尿喺尿兜度，可能因為冇飲水，所以冇尿。唔，可以叫爹D間中同佢試吓。

8月23日星期四

由於以朗星期日星期都好遲先瞓11:40-11:50，我好勞氣，諗住路俾佢瞓晏覺，嫲嫲又嚟睇以朗，以朗唔捨瞓。結果兩日冇瞓晏覺，一日就臭脾氣，另一日即星期四就攰到食食吓飯恰眼瞓。食完即時斷電瞓咗，對以朗嚟講真係從來未試過，係唔會發生的事。佢真係好可憐。
我見到咁真係唔忍心，要再重新執過啲時間，因為唔俾佢瞓實在太殘忍了，佢依家通常早了一小時起身，九點就起身，根本唔似以前咁瞓到成十一點，大把電，宜家每日瞓少咗，係要瞓晏覺，但點先唔影響夜晚瞓覺呢？真係要諗諗計。

20180819 - (◍•ᴗ•◍)睇恐龍@MegaBox

8月19日星期日

熊人話MegaBox 有恐龍，可以同以朗去睇吓。今日同以朗食完早餐就出去，點知去到Megabox塞入停車場似乎要好耐，於是我同以朗落車先，原來megabox的恐龍展是侏羅紀公園的香港站。我同以朗去到5樓就排隊睇吓，以朗見到dino當然好開心，指吓望吓，可惜係輪住條隊參觀想影耐啲相都怕阻住人，而且啲恐龍都欄住哂，只可遠觀，不過以朗都開心。

呢隻間中會拍翼飛飛。

以朗影相唔知做乜，唔識望鏡頭。

有幾隻細恐龍，佢見到都唔係好識，可能因為見慣漫畫啲綠色恐龍，唔係好識呢啲深色恐龍，

另外有個類似太空船可影相，本想等埋熊人一家三口先去排隊影，但最後唔記得排隊影。
仲有個電視仔介紹恐龍，同以朗邊睇邊等DADDY，都未泊好車呀，我又唔想行宜家，知道8/F有玩具反斗城，所以同以朗邊行邊等。

呢間玩具反斗=城都幾大，大過中環店同又一城店，有咗小朋友之後會覺得玩具反斗城係小朋友的天堂。以朗好快又睇中啲狗狗同DINO，又攬住其中一隻玩具PODDLE唔想放手，我後來叫佢擺，我又拎一隻同佢一齊擺，佢好開心，同我一齊擺低之後，我叫佢拜拜狗狗，佢又真係拜拜狗狗呢，於是佢就放低了一隻狗狗。後來睇中啲波波又係咁對付佢，最後我哋咩都冇買。




在反斗城會合了熊，佢話見九樓好似係兒童天地，於是上一層睇吓，有個海底樂園珊瑚魚轉不停，以朗睇得好開心，仲有類似冒險樂園的兒童天地，小型木馬，小小夾公仔機，不過以朗未識玩，冇同佢玩過，佢又冇乜扭。


行過啲有個小小的室內遊樂場，得好少嘢玩，好多小朋友，以朗已經玩得好開心。


呢個室內滑梯佢好鍾意，玩咗起碼5次。佢唔鍾意玩DPARK個滑梯，可能因為太矮，呢個高少少之外，中間仲有個位俾佢人爬吓勁開心。仲有啲圖案光影投射，以朗同其他小朋友見到啲光影就跳跳跳，呢度比DPARK細好多，但總叫做有得玩吓。
熊人同BB洗手時撞到好友，十幾年好友，可以介紹俾熊人識吓。回程以朗唔肯走架，其實佢好攰，喺車度瞓咗啦。