20180109 - (◍•ᴗ•◍)凍凍

1月8日至10日星期一至星期三
呢幾日天氣好凍，星期一朝早仲有成20度，放工返家得返11度，好少咁凍，宜家屋企向北覺得凍咗好多。
BB睇電視時，都同佢冚張被被。
BB一邊嘆奶，一邊睇電視好開心。



星期日同BB影證件相，星期一先記得拎。
好大個仔呀。

天氣凍凍，屋企張地氈好有用啦，坐喺地下HEA腸電視好開心，好C服。

今次氣溫跌到個位數咋，真係唔係講笑。

日間都上唔到十度，好耐冇試過，宜家天氣凍時，夜咗得我一個，都幾凍好淒涼，好彩沖涼有浴室寶。好暖，可以慢慢搽LOTION。

星期二本身食TEA唔想食嘢，但天氣凍都要食個北海道乳撻打底，捱不到4點呢，呢個星期一至買東海堂咖啡/奶茶都會$9，食個撻同嘆杯啡等TEA來。

天氣太凍，冇跑步了，因為太凍，吸冷空氣好辛苦，日日喺屋企跳舞算數。

20170612 - 打風✿｡◕‿◕｡✿

6月12日星期一

今日無端端打風。尋日一號風球，仲話冇咩機會三號，點知今早一瞓醒就幼稚園停課，中午三號，冇咩心機做嘢。因為個風似吹得幾正，唔八號都會大風雨。喺公司食吓同事手信咁。

個風越吹越正，下午兩點左右都估到會掛八。估唔到五點廿分先掛，完全冇諗過六月就打得成風。

諗住坐980x唔太塞，但都係塞，同埋開得晏，結果早一粒鍾放工就坐返兩個鐘車，同平日一樣時間返屋企。

今日熊人唔喺屋企，自己照顧寶寶。結婚之後未試過熊人打風唔係一齊，掛坐熊人。

BB又點會識咩打風，一樣玩得好開心。

又爬又企咁，最衰黃昏前掛咗八號，多數捱到聽日，聽日都要返架啦，如果唔駛返工同BB玩玩係幾開心的事。

20170105 -✿ Annual dinner✿

1月5日星期四

今日係一年一度的公司annual dinner，五點就放工，即刻坐的士過去會場，行行企企都好，總好過坐公司。

早啲去到會場可以影吓相。

年年都係千三蚊禮劵，最想係百佳，我抽到百佳，唔洗同人交換，

自從上年之後啲菜色好咗好多，起碼頭盤是乳豬。而唔係以前的難食拼盤。

呢個就好漏，寧願炸蟹拑好過，

鮑魚大隻好食。翅都好多料。整體食物幾好。

抽獎中獎機會低，有金幣，當然最後都冇中到。九點多就完，可以早啲返家看豬。

20161001 - ❁❃國慶日❃❁

十月一日星期六

八十天悠長假期開始的第一天。在家吃過早餐，同熊人休息一陣就去石籬。

因為要交管理費，而且我哋只係一架車到，唔駛轉車，又可以飲吓茶都唔錯，點知去到發現十一開始稻香執咗。咁就唯有去富臨飲，點知叫咗六個點心只嚟咗四個，食完之後發現平日買開嘢間佳寶又執咗，北葵涌街市扶手電梯又冇咗，好似好多嘢都變咗。

次次返石籬都覺得好熱好焗，好污糟，不過又始終有少少感情，同熊人喺呢度有回憶，而且啲食材，家品比鬼地方平好多。日比都係呢度製造出來Y(^_^)Y

我哋買完嘢只係4:40，原本想叫埋朋友一起返，不過佢哋未得，我哋就坐車返家先。

今晚食意粉，好耐冇食茄汁意粉，好味。

仲有青口，北葵涌街市買40元都有成十幾廿隻。

之後坐到十點幾就出去了。

20160914 - ☽ ☽ 中秋做節☽ ☽

9月14日星期三，

今日是我同爸媽，哥哥一家人做節，之前連續兩年中秋的月份都是發生不好的事，其實我對九月是有陰影，以前覺得7月不太好，因為有兩年都試過入院。近兩年就對中秋有莫名的恐懼。

今年暫時冇咩事，但上星期覆診醫生話我唔夠胎水都令我好煩惱。

 

前幾天哥哥去了日本東京，買了水果，打算今日做節食，有密瓜，有提子有桃。

最好食係提子個味真係好特別，好掛住東京，好掛住日本啊，不過我有更重要的事要做。(!)

呢個係東京手信俾媽媽。在SKYTREE買的PANCAKE 模型。

仲有一個係拉麵模型，但原來係要自己整架，俾咗熊人整。但好似好難，唔知點整。

20160821 - ♪♬♩♫ 郭富城《舞林密碼》演唱會頭場♪♬♩♫

8月21日星期日

今晚去睇演唱會呀。之前好多個月前在家睇城城you tube ，睇好多舊歌，當時諗，如果佢再開演唱會就好了，因為我小時候其實好少迷偶像，城城係唯一一個令我用零用錢買雜誌，買演唱會飛的偶像，如果可以廿年後再同老公同囝去睇，係好特別的事，而上網搜尋之後，發現今年會開演唱會，所以留意時間就買飛。

我哋今日係睇第一場，好早去到附近，好多人睇，好似係拜神儀式，其實咩都睇唔到。

之後去都會置富food court食晚飯。忽然想食八方雲集的餃子。

最平的飛，估唔到山頂中的山頂，由尾數落第二行，四百幾蚊張飛真係好貴。

好彩佢個舞台係精心設計，成日都升到好高，不過手機都係影唔到。如果有帶相機就好了。

以下啲相由網絡copy

廿年後再睇城城是情意結，也還自己一個心願，生仔之後，唔知幾時再有得睇。

郭富城《舞林密碼》演唱會頭場完滿結束，全場勁歌熱舞，歌曲list如下：

1：舞士精神 + 最激帝國
2：神經
3：純真傳說
4：風裡密碼
5：遊園驚夢
6：就是孫悟空
7：我是不是該安靜的走開
8：永遠愛不完
9：個個讚你乖 / 有效日期
10：狂野之城
11：火熱動感LA LA LA
12：木偶襲地球
13：絕對美麗
14：化妝舞會
15：複製靈魂
16：你是未來
17：對你愛不完
18：I LOVE YOU SO
19：脈搏
20：失憶諒解備忘錄
21：雨中感嘆號
22：不老的情歌
23：愛的呼喚
24：臨行
25：鐵幕誘惑 / 唱這歌
26：這夜心情

20160806 - ✿｡◕‿◕｡✿新屋

8月6日星期六

新屋在昨天收埋最後一件傢俬了，真係好遠，比以前早好多起身，不過個鼻敏感好似好少少。

住一輪，到時睇定啲買樓。

暫時都好滿意間屋，因為空間好大，不過遲啲BB出世之後就好多嘢了。

啲傢俬全部在實惠買，有貴有平。

原本星期二已經送埋梳化嚟，點知打風要星期五先送到。

個飯廳櫃同餐椅我都好喜歡。餐椅成六百幾蚊張，好彩當時熊人做會員生日有九折，而且又送$1,200Coupon可以補在啲餐凳上。

而個廳的梳化三千幾，地櫃1299，全部都有九折。hehehe。今次買咗萬幾蚊傢俬，到下次再搬屋時，可以買少啲傢俬。

星期六請假整頭髮，整完之後叫埋爸媽過來屋企食宜士多啤梨吉士Pastry，買咗啲餐墊，靚靚，for整嘢食影吓相。

20160802 - ☂☂8號風球妮坦☂☂

8月2日星期二。

一搬入嚟第二日就打風，上星期傳會打得成，我都唔太信，因為成日傳得越行，就越打唔到。

而且我唔恨打風假，另外原定星期二下午送梳化，唔想又要等多幾日先有傢俬。

點知星期一晚已經打到嚟，晚上845已經八號，公司破例打嚟叫大肚婆早走5分鐘....5分鐘咁多。haha但迫火車時，啲人似世界末日咁走難。因為今次呀風小姐妮坦吹得好正，而且都幾強，好彩佢行得好快，未能增強得好勁，而且今次係東登有山頂住，唔會太勁，不過馬鞍山明顯強過維京好多啦。今次打風三家人都在附近，真係幾warm。

晚上掛波，大家都準備要朝早落波返工，捱到12點益銀行算好。

不過我都預咗早上唔駛返，熊整豐富早餐。all day breakfast有午餐肉，好fusion~

最後我唔想迫車就請了半天假，唔好再打風啦，我唔想蝕假了。

當日熊未駛返工，我哋趁下午冇咩雨就落街買啲家居用品。都幾開心呀。

20160718 - ㊣㊣自家制黑森林蛋糕㊣㊣

7月18日星期一

上次生日整過黑森林蛋糕之後，都幾喜歡食，上次個蛋糕底好硬，似鞋底。所以熊人想再整多次成功的。

今次在大啲超市買到一罐車厘子，係外國的連糖水，味道唔假。所以今次個黑森林蛋糕可以用呢罐罐頭。

今次整好，味道真係幾好，但下次蛋糕面的車厘子最好用鮮車厘子。

20160710 - ☂☂影閃電☂☂

7月10日星期日

星期六天氣好熱，好多地方35度，新界，馬鞍山仲38度，熱死人，，去咗媽媽家嘆冷氣，返家時，馬鞍山落好大雨，好彩我已經回到葵涌，返到去屋企樓下冇落雨呢，我哋仲去麥當當買蘋果批，但媽媽打來叫我快啲返家，急急腳返到屋企落狗屎了，好好彩冇中招。

因為天氣太熱所以做成強烈對流，勁行雷閃電，之後十一二點FB好多人擺閃電相，連手機都影到。我都好想影呀，停雨一陣，大約一點左右又行雷閃電，我就放大機在窗邊影吓，想試影。熊人沖涼出來話咁係影唔到，要整腳架，而且要知道閃電喺邊個方向，唔係亂對住窗口就影到，喺屋企用腳架影了一張，但不太滿意。

於是徹底啲，直情就上街上影。真係影到架。set20-25s快門，光圈大約11，但其實係要講運氣，因為有時閃電唔一定見到條閃電，而且閃當下先按快門根本捕捉唔到，所以只可以守株待兔，每按一次快門，希望呢25秒內有個靚閃電，影完之後，要等部機load張相，為時都有10秒，load 相途中有出現閃電都影唔到了。因為部機忙緊。

就係咁走咗兩次雞，成個幾鐘只有兩張見得人。

但都好開心，因為熊陪我呢個大肚婆癲，我知道點影，但缺乏行動精神，有熊人才會落街影。呢個就係熊人同我有好唔同的地方。

20160702 - ✿｡◕‿◕｡✿生日禮物

7月2日星期六

今年生日係星期六，不過體力不大如前，而且一早約好同哥哥佢哋食飯，所以正日晚上同爸媽哥哥佢哋一起食。

 

嫂嫂買咗一份line 的禮物俾我，好靚呢，淨係個熊人袋已經好可愛，可以俾阿仔用啊。

仲有MISSHA的化妝品，兔兔eye shadow，熊大睫毛液，蜜粉，唇膏，鏡唇彩等，好實用，但我未必捨得用啊。個包裝唔係兔兔，熊大就係莎莉，駛唔駛咁靚先。

 

香港LINE專門店都有得賣，樣樣加起上來應該唔平呢。真係多謝哂。

20160624 - ❃❃全記點心專門店❃❃

6月24日星期五

聽日唔駛返，放工就同熊人去葵芳睇傢俬睇床褥，床褥就唔喺新都會附近，遠少少。
睇完床褥就想食嘢先睇傢俬，諗緊去大家樂食定係食點心，諗起第日有排食大家樂啦，所以都係食點心，因為第日係唔駛旨意飲茶。
我哋去呢間叫全記點心專門店，專食點心，點了叉燒腸，腸粉都幾新鮮，但比較厚皮，

肉餅飯，個碗好薄，所以好得好少1

春卷係新鮮滾熱辣，好脆，幾好食，點沙律醬嗰隻。

奶黃包味道麻麻地，包的質地就唔夠薄，呢個唔好食。


蝦餃拼粉果，粉果同餃都好食，

茶位只是三蚊個，不過係茶包，但係埋單竟然要115元，貴過稻香。另外最大問題係近廚房位好熱，唔夠冷氣食到身水身汗。

食完行過去對面馬路新都會睇傢俬，實惠都幾平，但想睇埋宜家傢俬先。

20160612 - ✉ ✉ 自家制滷肉飯✉ ✉

6月12日星期日

 

熊人睇咗fb有人整滷肉飯的片，又想整滷肉飯，熊人咩都話易整，於是就去街市買肉同材料。

香港食台式滷肉飯好貴，起碼30蚊碗，自己整都唔平，因為啲腩肉貴。

要五香粉同紅蔥，

再加上蒸勝瓜，咁就完成一餐好食的晚餐。