20180930 - ♡❤超市玩具❤♡

9月30日星期日

今日冇帶以朗去玩，因為佢病好之後，都怕佢身體麻麻，而且十月又話要開學了，希望唔好再惹病，可以乖乖地返學。開咗學之後，好多地方變得高危，例如市政局playroom,D Park， 室內又多小朋友就好易出事。都係少去為妙。

今日熊為明天燒嘢食啲食物做準備好，整完都晏咗，我哋落街食完嘢就周圍行，今日去麥當勞食，食麥樂雞，粟米，之後去佢好喜歡uniqlo出面地下的報置度勁跳。跳到出哂汗，宜家啲天時，冷氣地方涼，同佢著外套怕凍親，跳兩跳又熱到出哂汗。

今日去千色主要係想同以朗買啲返學嘢，例如手巾仔，拉鍊袋，襪仔，撞著千色一年一度十一國慶大減價，乜都有九折，甚至指定貨品有大特價，我哋十二蚊店買嘢已經排一次排好耐，之後童裝要買襪又排了半粒鐘有多，我見排咁耐，乘機買份玩具俾以朗，超市玩具，有收銀機，碌卡機，購物scanner,好多收銀機賣到百幾二百蚊，呢份119仲有九折算抵玩。

返到嚟屋企拆完盒，如果入好電都幾好玩，可以用個scanner嘟啲product,有嘟一聲，有光，而收銀機可以open,㩒啲制又有聲，個卡機又可以刷卡，幾得意，唯一差啲係個收銀機係唔識計數，只識嘟嘟聲，宜家以朗開始識玩玩具，唔似以前個多士爐咁，一玩就爛，佢知道嘟嘟聲好開心，第日帶佢去買嘢要解俾佢聽先。

20180929 - ☽ ☽ 提早慶祝生日+we go mall兔兔

9月29日 星期六

哥哥炒了姐姐，變咗我哋呢邊煮飯，我哋個姐姐未好識整中國嘢，所以只好熊人整，今朝一早屋企冇電，唔知咩事，熊人都冇心機整早餐，同以朗熊三個落街食，好彩十一半仲有早餐食，又係唔係食太多，有啲玩嘢，可能剛病完冇乜胃口啦。食完早餐要行惠康買水果，撞到表哥，即刻好癲，亂跑亂玩。

今日嫲嫲嚟，我哋見多個人睇住就落街買餸，冇帶以朗，因為買十人餸而且仲要拎蛋糕，唔帶好啲，

今日食完飯順便切蛋糕，提早慶祝以朗兩歲生日。

之前在十二央店買了數字汽球，mother care賣25蚊個。有個汽球好似靚啲。呢個係黑森林蛋糕，以朗勁喜歡食，又要自己叉蛋糕吃，唔俾我餵，唔俾我掂，由於黑森林蛋糕內有車厘子，表哥又唔鍾意食，食到苦口苦面，俾以朗食埋佢個半件。

之後我哋去we go mall睇兔兔呢，第一次同以朗專登出夜街，由於同表哥嫂嫂一起，兩個小朋友都好開心。
We Go Mall 頂樓空中花園有一百隻兔兔，中秋時22/-25/9 6:00-10:00pm 開放，本來都想去，但中秋當日同以朗表哥喺附近玩燈籠冇去，見同事啲相好靚呢，本來中秋假期之後是最後一日，不過可能見反應好，9月29日至10月1日又重新開放，呢一百隻兔兔有大有小，係膠兔兔，可以騎，可以變唔同顏色，仲有個月球做背景呢，晚間上去黑黑地有唔多光好靚，

呢度好在係啲兔兔係可以移動，唔係齋影相，即係人人都可以騎，可以推啲兔兔，以朗同表哥可以玩玩呢，佢哋玩得好開心。可惜有啲人好自私，幾個人堆十幾廿隻兔兔影相，唔理小朋友玩緊宦照攞人啲兔兔嚟影相，以朗俾大人拎咗隻兔兔，表哥同圍同佢搵一隻出嚟，表哥好識照顧表弟呢，原來大照顧小的就在不知不覺中培養到呢。





呢度晚上十點收，到九點幾時諗住同以朗影相，初初都奇怪佢點會企定定俾你影，原來佢屙55，笑死人，見已經9:45，唯有提早走，表哥仲想玩架。






WE GO MALL好似幾多親子嘢，似想打造成一個親子商場，不過地方有啲細，同埋我哋去好唔方便，我哋坐的士來回都用了成7-80元，不過毗連有個爛地停車場，可以泊車，如果第日再去要自己揸車比較好。

20180928 - ╭。☆圃公館☆。╮

9月28日星期四

今晚出街食，但有散水餅食，肥死，但係Cova散水餅，又冇理由唔食架。

今晚餐飯係慶祝舊同事九月三十日生日，但睇真啲地點忍不住要小，帝盛酒店的圃公館喺皇后大道東尾，近伊館，灣仔同銅鑼灣之間，去程喺中環坐10號，由6:50上車坐到7:35先落車，皇后大道東果然係日日都慢流的。

好彩回程行返出灣仔消防局又唔會太耐，一條直路十分鐘就到。

由於當日是星期四，而地點比較唔方便，當日得三台客，應該主要做酒店客為主。
火鍋前的調味料盤出場，九格盤 !

金牌酸菜筍殼魚鍋$368，大量酸菜，起初以為成煲個湯底會好酸，但原來酸菜應該有預先浸過水，所以唔會令整煲魚湯過酸喎。有大量荀殼魚片，筍殼魚肉鮮甜幼滑，入口柔軟，仲有好多薯粉，好入味，湯底都夠香魚味，不過筍殼魚骨刺較多，吃時要注意啊，而且好多胡椒粒，仲有好多辣椒，我個人覺得好辣，食魚仲得，飲唔到個湯呢。

農圃糯米雞翼 78 蚊，內有乾坤，入面既雞肉挖走左一部分，主要淨番香脆既雞皮😈 ，入面釀滿香濃既糯米飯，夠哂香甜同口感🍚 好味😄。較可惜的是雞翼雖大， 但肉質不夠滑。





食完酸菜筍殼魚鍋啲魚肉，潮流大熱一鍋兩吃，佢會幫你再加湯，等你可以淥火鍋配料打邊邊，啲湯都係呢個酸菜湯底。

我哋再點了一啲打邊爐食的丸。特色四式丸 $128 ，價錢好貴，原來係因為分量好大，啲丸一粒起碼等於兩粒，似乒乓波咁大粒，手打丸質素都不錯，食兩三粒粒都KO咗了。

仲有雲吞拚水餃，真材實料，大大隻鮮蝦，又係超大粒，份量係平時一倍，好彩唔係叫太多咋，真係飽到上心口。

最後喺A1買的蛋糕焦糖香梨蛋糕係好好食，估唔到，個焦糖面好滑而且唔會好甜，味道好夾。

20180925 - ლ(•̀ _ •́ ლ)飲茶

9月25日星期二

中秋補假，今日姐姐唔放假，但我哋同以朗出街食晏，hea hea 地去市中心，行吓食吓嘢。又去豪晏飲茶，中秋補假兩點下午茶都係等幾分鐘就入得，地方大，位夠多，而且唔會太迫，我哋三個唔駛同人搭枱。

爸爸媽媽話呢間嘢唔好食，其實好睇你點乜食，唔似美心咁樣樣都好食係事實，而且呢區的海港都唔好食，基本上唔會有酒樓特別好食，如果你食慣，揀好食嘅嘢亦都唔難。

老實呢間蒸點心係麻麻，不過腸粉係好食，今日點咗個頫德煎魚餅係好有驚喜，係平日的鯪魚肉做餡，外面的皮好脆似，炸雲吞咁，以朗喜歡吃。

叉燒酥，佢唔似一般的叉燒醬，個醬好深色，接近黑色，好濃味，有少少怪，唔係好識欣賞。

點都要點個盅飯俾以朗食吓，鳳爪排⻣飯，排⻣汁滲入飯味道OK，三個人都要有啲飯氣到肚呀，以朗食吓飯，唔可以只食點心。

喜歡點鳳爪，呢間啲鳳爪係全統味，而且有成5-6隻，幾多幾抵食，下面只墊住花生，唔會裝太多假狗。

點了粉果，唔係太好食，啲餡太少，又少花生

鮮竹卷，OK，正常味。不過以朗唔多食腐竹，唔識食。

今日以朗入去食的時候都有啲眼瞓了，好彩坐低俾貼紙佢玩又唔扭計，玩到有嘢食到又好開心食食食，食完好耐先有少少唔耐煩，算係咁，兩歲唔夠的小朋友你想佢幾有耐性？食飯正常唔扭計唔喊已經好好，由於佢出面食嘢鬧情緒的情況唔多(試過一兩次)所以帶佢出街食嘢唔算係太難搞的事。





之後同佢訂蛋糕，行一陣都成四點，見以朗仲有啲病尾，都係早啲返家休息，瞓了一小時晏覺，晚上又唔多肯瞓了。

20180924 - (⁎⁍̴̛ᴗ⁍̴̛⁎)中秋節

9月24日星期一

中秋正日，放早少少放4:30， 放工唔算多人，第一班車上到，回家快趣跑步，跑咗一陣，因為上星期俾以朗惹病未好返哂，流住鼻水，狀態麻麻地，廿分鐘左右，好過冇，最緊要跑吓，習慣返跑步的感覺。

今日出面塞車，熊下午回來瞓覺，我就跑步，跑完七點左右過媽咪度，原來哥哥今日都放早呢，今日竟然齊哂人，雖然唔係咩過節飯，但中秋正日成家人一起食飯都唔錯。

食完飯就食水果+中秋特備節目開碌柚之後俾小朋友當帽帶，表哥發哂脾氣唔帶，以朗起初都唔想帶，但我哋帶俾佢睇，佢覺得得意又肯帶，唔知肯帶到幾多歲呢？表哥唔帶又喊，可能過一兩年以朗都係咁。

食完飯本來想去we go mall 睇兔兔，但因為遠路，揸車唔知泊邊，呢度坐車去又煩，不如留喺附近同表哥玩。兩老表你追我逐好開心，上年十一個幾月未識行，今年識行就唔同哂，拎住燈籠追跑，宜家跑得好好，好快啦。公公又整了一個自家制的柚子燈籠，以朗唔知火危險，成日想行埋去呢，見到人打籃球又學人跳，不過中間落了幾陣雨啲人走哂，再過一陣無雨先再有人嚟玩咋。

後來執到枝營光棒即刻唔玩燈籠，其實營光棒唔環保，盡量唔買，執嚟玩就算，其間有個大啲小朋友搶了以朗的營光棒，表哥即刻搶返俾表弟，兩老表一知不覺建立了感情呢。

玩到九點幾十點要返屋企，之後熊人趁以朗睇電視就出去開工，以朗易湊了，習慣了熊人大時大節都要開工(*≧ω≦)

睇返上年張相，之前仲好BB，今年大個咗好多啦。唔知下年會點呢？

20180922-23 - •●❀元朗做節+填色❀●•

9月22日星期六

見昨晚咳得厲害，一早叫熊人早點回來明天去睇醫生，十點鐘一瞓醒就打去約時間了，今日好多人睇醫生，等好耐，好彩醫生話佢冇乜事，只是咳未好焗一焗誘發氣管轉差，唔係再中招，係返頭，咁都好啲，睇一睇醫生又冇700幾但買個安心，醫生話我俾氣佢聞做得好啱，因為效果較好而且唔會好似藥咁服食過量，另外以朗睇完醫生又慢慢好轉中。

今日入元朗做節，點知好塞車，好彩以朗喺車大部分時間都瞓咗，一陣可以精神啲玩，玩燈籠好開心。

今日天氣好熱呀，原本四五點燒嘢食搞到六點幾冇太陽先燒，但都28度，太熱了，頂唔順，我冇乜燒嘢食呀，咁熱仲對個火爐會死人，以朗就可能食了太多藥，唔肯食嘢，今日帶埋姐姐去元朗，可以姐姐睇住，我on and off 同佢玩吓冇咁辛苦，





最後同嫲嫲一起切今年第一個蛋糕。美心的流心芒果蛋糕，唔太好食，好甜呀，東海堂的流心芒果好食好多啦。

9月23日星期日

昨天去元朗做節時，姑姐買咗啲衫仔同埋填色薄俾BB，啲填色薄好HIGH TECH，用支水筆畫喺特定的填色薄先有色，畫出界就冇食，啱哂以朗亂畫，佢去控制到小手肌，好易畫出界，呢啲填色最好，而且仲係反斗車王，佢見慣表哥啲車王，一見到車就開心。

畫得好開心，唔駛擔心佢出界，趁佢唔覺收埋本部好嬲呢，一本得20頁左右，一朝早已經填了四頁，慢慢玩嘛。

咩都唔肯食，反而試蛋王酥，佢以為呢啲係蛋糕。

今日去附近行吓，有SHOP俾咗個氣球佢，佢一路行一路玩，成日想拋出個欄杆，最後拋出欄杆跌落下層，我哋唔同佢執返，好唔開心，好扭，好彩之後喺商場的地方見到彩色動物，跳飛機，佢勁跳先冇嘢。走時又係唔肯走，返到屋企又勁扭唔肯瞓覺，係咁作對呢，三個困喺間房迫佢瞓，最後喊到癲哂瞓咗，唔知點解喊得咁慘，最後我抱住佢，佢好激動又喊又攰咁，好可憐呢，可能今次食咗個幾星期藥，好暴燥呢，佢宜家仲有咳，唔敢俾咩七星茶佢飲住，希望佢病好之後正常啲。TROUBLE TWO係麻煩啲，要接受佢啲情緒。

今日去了CATALOG買了冬季傻豹衫同以朗母子裝，送了小手袋俾以朗孭住，好女仔九唔搭八，佢又鍾意，玩緊時開心係好得意的樣子，但呢幾日脾氣臭起上嚟好得人驚呀。

20180920-21 - (ಥ_ಥ)唔跟我瞓+咳到嘔

9月20日星期四

好唔開心，今晚唔知乜事睇完電視入房，姐姐伸手抱以朗，佢竟然跟佢瞓覺，唔要媽咪了，昨天先去完街街，今日竟然咁快就跟姐姐，發生咩事變得咁快？好失望。原本一心諗住重新湊以朗瞓覺，再親多幾年時間，點知一下子我不被需要了，感覺好難受。

雖然我可以再有時間做運動減肥，但我一下子真係接受唔到咁樣呢。

9月21日星期五

自從去完觀塘海濱公園之後覺得佢鼻水同咳冇好轉之外好似仲差咗少少，唔知係傷風返轉頭定再中招，密切留意住。

今晚由媽咪度返嚟覺得佢咳多咗好多，鼻水亦都冇乜收到，好似再中多次招咁，臨瞓覺仲越咳越密，佢一睇完cricket就自己熄電視同衝入房瞓，唔駛我陪，但我好唔放心佢，因為臨瞓已經咳得好密，我冇落街跑步，喺廳聽住佢咳，兩分鐘咳一次，好密，瞓了半小時左右，聽到佢勁咳一排，一分鐘幾次咳得好大聲，我忍唔住倒啲水俾佢飲吓，點知一開門時已見姐姐著咗燈，原來以朗剛剛瞓著就咳到嘔，堅嘔，奶都嘔埋出嚟，佢同姐姐一身都係嘔吐物，好恐怖吓，姐姐都嚇到呆咗，以朗見到我時好驚要即刻過嚟攬住我，我就抱住以朗叫姐姐自己整理一下自己同換床單，我抱住以朗安撫佢一陣令佢安心，佢慢慢定過神嚟先同佢換衫。

點知嘔完之後好精神，要我陪玩三粒鐘，係咁玩呢樣玩過樣，好似平日夜晚咁，又上床玩又玩單車，完全唔停，最後都唔係好頂到佢，再播電視俾佢睇多幾個字再播cricket 俾佢瞓，最後成兩三點先瞓，又要我暗佢瞓，可憐姐姐又唔敢瞓，要我陪瞓時又要出房，兩個搞到成三點，熊人回來先有得瞓。

另一個問題係佢咳得好勁同有鼻水，但係佢食哂啲藥，雖然嘔了但又唔知嘔幾多藥出嚟，再食藥又怕佢或食過量，我唯有俾佢滴安鼻靈，之後係好咗少了鼻水，而咳又點算呢，好彩我俾佢聞氣，聞咗氣之後神奇地成個鐘冇乜點咳，最後一覺瞓到天光，我就快成為對付咳嗽的專家。😆

20180919 - (◕ܫ◕) 補祝silk wedding

9月19日星期三

918是我哋結婚周年紀念，原本想918影相請假順便慶祝結婚四周年紀念，不過因為當日攝影師要影婚拍，原來918成日都係好日嚟，咁我就唯有遲一日慶祝，918放工專登落車去拎蛋糕，之前諗咗好耐揀咩蛋糕，我成日都好想試綠茶或奶茶蛋糕，但上次舊姐姐LAST DAY的美心伯爵茶蛋糕好麻麻地，所以有啲驚，不過最後都決定搏一搏試吓東海堂的皇室奶茶慕絲蛋糕，

外型簡約典雅的「皇室・奶茶」蛋糕，面層是香濃的奶茶奶凍，奶凍層下是細緻幼滑的奶茶慕絲。夾層蘊藏著上等斯里蘭卡茶葉浸泡而成的紅茶寒天，散發著淡淡清幽茶香。配上底層的紅茶蛋糕和榛子杏仁脆，別具心思。

試食之後真係覺得好得，因為好似飲緊奶茶咁香濃，食完好似飲完奶茶咁，有啲回甘，而慕思又整得好香滑，講真係想食完想再食，絕對想翻CHECK。

而影完相之後就近近地去小南國食餐好的，環境好靚，有夜景腸，點了SET，有蔥油海攙頭，烤夫，幾好食。

豆腐青菜鮮魚羹，麻麻地，好淡味，BB都唔多想食。

SET清炒河蝦，新鮮爽脆，味道超級無敵，幾好食，可點啲醋仲好食。

特登點了一個雞煨麵俾BB，都幾好食，不過以朗唔知係病定唔鍾意食，好似唔係食好多。

SET鴨，炸得好鬆化，而且熱辣辣，可以用包片皮鴨啲皮包嚟食，幾好食，

SET的菜，好老的菜，好粗好老好難咬，好多渣，幾百蚊個SET都俾啲好少少的菜吧，最後埋單時我哋同經理投訴啲菜好唔得。

小籠包KEEP到水準，皮薄，汁多，肉鮮餡多。總括來說set 麻麻抵食， 可能因為個豆腐魚羮麻麻地，菜又唔好食，寧願散點菜好過。

晚上影吓以朗套恐龍睡衣，好靚，但做得好細，三歲的碼宜家都只是剛剛合身。趁宜家仲著到就著多啲影多啲。