20170130 -✿｡◕‿◕｡✿ 深涌

1月30日星期一

年初三開始冇地方去，我哋同姐姐買咗兩日假期，今日就可以兩個人出去行吓，想去行吓山，可惜昨天年初二下雨，而且雨都幾大，到年初三凌晨時分都有雨，所以行山都打消了念頭行要上落斜的地方。因為怕天雨路滑，山澗石頭容易跌倒。

最後熊人決定行去深涌。

OASIS 的路線如下。

深涌在昔日原是濕地，後來擬發展高爾夫球場，土地被移平再植上草皮，惟及後有關計劃暫時終止。

企嶺下老圍榕樹澳深涌深涌碼頭

在巴士站下車後，循車路往企嶺下老圍村屋下走。接上梯級後於公廁旁再下降車路右走。不多久走到分支，左轉（右方車路可接回西沙公路）海傍的車道，經幾個休憩處便僧到達榕樹澳的村屋。由此朝昔日農地間的水泥村徑行走，再沿岸而走便可抵達深涌碼頭。先直走往深涌的草坪，及後返回碼頭再乘船離開。

 

我們坐99，之後勁行兩個小時左右就到，雖然昨天下雨，但今天天氣都可以，陰天，沒有太陽，不過濕度頗高，幸好沒有太陽才不太熱。全平地沒有上落斜，所以走路大約兩小時，其實有接近8.5公里，由於街渡疏落，最後都是走路回程，共走了十七公里。

 

草地很大很美，我們在草地休息，吃點東西，但約了姑姐來拜年，所以早點走，想坐街渡往馬料水，兩點半有船，但兩點去到碼頭已很多人，怕上不到船，(下班 要六點了)，最後都是用雙腳回程。

希望日後可帶BB豬來一起玩玩。

回到家昤姑姐走了，沒有來看BB豬。BB豬冇人探佢啦。

20170129 - ☆★年初二見太婆☆★

1月29日星期日

今日年初二，先去媽媽家，之後再同哥哥媽咪等一起去婆婆家，

BB一起身就七點幾，之後大家再瞓，到十一點幾沖完哂涼就餵奶，點知，BB豬唔食奶，完全唔肯食，到最後差不多一小時，接近一點先肯食奶，宜家餵奶就好似同佢角力一樣，唔知幾時先肯食。

本來想食媽咪啲清清地的齋，但原來已經冇哂，再加上BB豬搞咁耐先食奶，等得過去都餓死人。

今日BB豬牛仔LOOK，呢套衫喺MONTHER CARE前一輪半價買的，宜家二百蚊到，呢套衫已經買到9個月了，都唔係好鬆咋，BB大得好快呢。

去到太婆度，BB豬最細當然成為焦點，婆婆(太婆)見BB咁肥大，仲話佢似一歲仔，話我湊得好。人多BB又唔肯豬。

回程等巴士時又扭眼瞓，吵鬧咗一陣。最後在車上豬了，不用吵吵鬧鬧。

 

20170128 - ✿｡◕‿◕｡✿ 大年初一

1月28日星期六，

大年初一，同bb豬過年，俾利是bb豬，bb豬好開心呢。bb笑笑。

今年為了bb豬買了全盒，仲有蛋黃哥立體揮春。

bb豬著得好靚仔，仲有bb豬樣的利是封。

要長征去嫲嫲家拜年，

食好多唔同款的齋，好好食。有十款齋。有啲冇影相。

樹懶大年初一都黑面。:p，成日想借啲意寸我，話我暗唔到個仔瞓，你咁叻，你自己暗囉。無端端寸我會多忽肉嗎？我忍你係俾面你個仔咋，唔係俾面你。唔好以為自己真係大支嘢。

20170127 - ☆★年三十跑跑☆★

1月27日星期五

今日年三十晚，我同熊人都放早，去攞個蛋糕先，之後返家換衫就落街跑步，天氣都幾熱吓，我哋跑長廊，返到五點左右，再落街5點半跑，有太陽係黃昏的太陽金黃色好舒服呀。

差不多跑哂六公里，只有回程頭三百係行。勉強跑哂，但之後肌肉痛，跑完六點幾七點，沖涼就回家團年。

團年之後俾bb豬交俾姐姐，我哋十一點幾就拎蛋糕去媽咪家同佢慶祝年初一生日。

今年終於回到媽咪身邊慶祝生日，好開心。

20170122 - ✿馬鞍山公園✿

1月22日星期日。

星期日就是我們最忙的一日，因為沒有姐姐幫忙，姐姐七點出門口，幫唔到我哋餵早奶，如果bb早起身，我哋都要早起架，最多七點幾食完奶，大家再瞓多一陣。有時bb食完奶擾攘好耐先會瞓，趁佢瞓一兩個鐘到十一點我哋又瞓到十一點。想bb豬瞓晏啲，除非佢開始食到固體。

熊人會照整早餐兩口子一起吃，我就湊住bb豬，有時bb豬會自己玩玩，我哋可以安心食早餐，有時佢扭扭，就要抱住食啦。

今日冇咩事做，叫bb豬練吓拎利是，都勉強可以拎一陣，bb新年要搵食啊。

今日見天氣好，有太陽，又唔太凍，於是同bb豬去馬鞍山公園heahea，先去譚仔食lunch，再去公園，原本諗住一家三口坐吓，hea吓有草地，好溫馨，點知bb豬唔多好心情。

扭眼瞓，去到公園一陣就大吵大鬧，最好要我哋兩個輪流抱bb豬。

原本溫馨的畫面，變成吵鬧畫面，所以呢有小朋友之後咩都係唔可以預計到，日日都有新的驚喜。

20170121- ◈◈我係身屎◈◈

1月12日星期六

今日去嫲嫲家團年，BB豬要著靚仔啲，GMarket 買的，70都係僅僅夠，唔多足碼。

不過幾靚仔啊。仲有鞋仔著，bb都幾乖豬。長長車程都係覺豬仔。

由於車程覺得多所以去到嫲嫲度都頂到一陣，之後又想豬，bb其實鍾意豬。

 

件衫好好睇，不過食食吓奶屙屎又上背啦，結果一陣又成身衫換過哂。

bb好攰時都要搵我豬。 hehe

20170120 -▣ 試車厘子▣

1月20日星期五

哥哥佢哋買了Tasmania 的車厘子吃吃，貴貴，我就唔會駛呢啲錢。

益我哋有得飯後食，我哋俾bb豬試少少，俾佢lam吓，佢個樣衰衰呢，可能有少少酸，估唔到第一樣試就係車厘子，仲要貴貴的，bb真厲害，仲有拍片留念。

20170119 - ❤️❤️辦年貨❤️❤️

1月19日星期四。

搵啲時間辦吓年兵5，買海味，買全盒等。

生咗bb之後未試過兩公婆晚上出街食飯，今日丟低bb在家同姐姐一齊，我哋兩個就出街買嘢。

上次去沙田太多人，等唔到食pizza，今次終於可以食到eurogogo，而且天氣ok，可以坐戶外，以前成日去葵芳食呢間，生完bb之後出去食晚飯真係少之又少。

我們必食百寶pizza，次次都咁好食。鍾意佢可以半份咁點，茄味同腸仔芝士好夾，剛剛好，唔會好漏，pizza皮薄薄地，

煙肉芝士焗焗磨菇，同張poster個樣爭好遠，菇咬落去仲有好多蘑菇汁唔會乾身，同煙肉一齊食更香口，只可惜有啲偷工減料，比較少煙肉同芝士。

香腸煙肉茄汁意粉，茄醬夠多，好食。

今晚冇返家吃，哥哥嫂嫂用橙bb，看來bb都有興趣啊。

今日因為熊人係咁睇波鞋，唔夠時間睇嘢，最後都買了海味俾家人，安記福袋，蛋黃哥揮春，全盒，係欠賀年禮品未買。

 

最後去到一田下面賣童裝睇吓，減價呢，可惜太夜都關門了。
公司要tele conference，要在街打電話，好討厭。

20170116 - ♥ 花串日本料理♥

1月16日星期一

今日約了vyvy LUNCH ，目的係交收個冰塘燉檸檬，同埋個圓肉無花果，佢會過嚟中環，順便食飯，我因為星期五上北京，之前又好忙，唔記得BOOK 枱，臨時先BOOK就冇得BOOK翠亨村，不過我忽然記得M88有間日本嘢叫花串日本料理 ，比較貴應該有位，我兩三年前食過，今次再去都幾貴，好多SET接近200元，唔少仲貴過200蚊，

VYVY想食牛肉，但話要等8個字，痴線咩，結果我哋都食吞拿魚飯，我宜家喺香港少食咗魚生，最多係食吞拿魚，魚生飯都係留喺日本食好了。個賣相好靚，都幾新鮮，但唔太喜歡有少少筋，好UN，而且200蚊都冇咖啡或茶或甜品。

中環威靈頓街2-8號威靈頓廣場M88 8樓

 

呢兩樽就係VYVY整的，無花果好好食，自從坐月就好鍾意食，加埋圓肉就潤又清甜。

檸檬沖水好清，又食埋啲檸檬好正。

仲有佢拎咗原本兩年前已準備好的結婚禮物，係一對心心杯。

另外佢又買咗被仔俾BB，好正呀，呢張被仔又靚又實用。好多謝VYVY呢。

20170115 - ✿｡◕‿◕｡✿ XO

1月15日星期日

星期日又是忙一整天的日子，由於出差太早起，十分疲倦，昨晚冇沖涼十一點就睡了。今朝BB八點半喊醒，熊人餵完奶，我就暗瞓覺，bb豬了之後又俾返熊人，我跳舞之後洗頭沖涼。

十一點左右幫BB剃頭，好肉酸呢，好彩媽咪一早買定帽俾BB。帶咗帽就靚返哂。

 

之後沖涼，早餐都未食，沖完涼食完奶就同BB落街，行落街時BB豬了，去食潭仔米線，食到一半BB起身，但冇扭，因為周圍望嘢，好開心，不過之後差不多食完之際，BB扭計了，好彩已經食完。之後就行街街。
新港城有XO好得意，我同熊人BB想自拍發覺係好難的事。

不過同BB周圍行吓都好，宜家好近農曆新年，好多人出去購物，氣氛好好呢，千色店新裝修完都幾多嘢睇。抱住BB周圍行，行咗個幾鐘就買餸，出一出街兩個鐘就好攰。

20170113-14 - ⊕北京出差⊕

1月13日至14日星期五至六。

無端端要上北京，因為兩年冇去過北京，本來要去兩晚，最後講數成功去一晚，我會掛住BB豬架。

香港天氣麻麻，天氣轉涼有少少雨，八點機，朝早五點九就出門口。

去北京有樣好，係可以住五星酒店，一個人住咁大間房係OK的，落機放低嘢，食LUNCH就去公司，好眼瞓呢，放工就行去食晚飯。當日好好天，藍天白雲，能見度好高，上星期仲話霧好嚴重，估唔到當日咁好天氣，未降落已經見到陸地大廈，去過五六次北京第一次咁好天。

天氣好凍，日頭有太陽都只係1,2度，晚上收咗太陽行過去得負一負二度，真係凍，不過行去都係十分鐘內，之前在公司有暖氣個身都夠暖，所以都OK，回酒店，香港同事教我哋經商場過，都唔凍，本來想自己行吓FEEL吓凍凍，不過太攰啦，而且以前都行過哂，最後番酒店在房間跑步。

點知跑完步就瞓唔著，好慘十二點想瞓要一點先瞓到，聽日仲要九點半機架。

一早起身係負七度。

今次酒店包早餐，但七點半前要走，七點落去匆匆忙忙食完早餐飲杯啡就走人。

真係好好天架，。

北京個安檢好似傻咗，要等好耐，我八點二至到機場，好彩有一兩條龍係快啲，不過同機有好多人遲上，結果上機都遲了，再排隊等飛足足遲一小時，好彩回到香港有機場巴士夾到時間，但返家都三時多了，好慘，好掛住BB豬。

返家想同BB豬小睡片刻，但BB唔瞓覺，我都冇瞓，結果當晚十一點冇沖涼就瞓咗。

20170111 - ♥♥100日♥♥

1月11日星期三

今日BB豬100日了，好感恩呢一百日BB豬出現在我生命中，真係好愛好愛BB豬，佢嘅出現完整了我的生命，令我們的家也熱鬧起來，也變得圓滿了，人生可以有自己的小孩，是一件好開心的事。呢一百日雖然辛苦，但亦有好多甜蜜的時刻。

BB豬兩個多月就戒夜奶，好錫媽咪，不用媽媽上班掛心。宜家開始食手手。鍾意望住人笑。越來越多表情呢。

我前兩日喺公司附近訂咗蛋糕俾豬仔，好耐冇食茫果流心蛋糕啦，一樣咁好食。當日咁橋哥哥放星期三，好多人同BB豬慶祝呢。

BB boom你要乖乖地呀，爸媽好愛你。