20151231 - ㊣㊣半熟工房芝士蛋糕㊣㊣

12月31日星期四

今日又有得放早，放四點三，但未病好，要趕住返屋企附近睇醫生。

今晚會出街睇煙花，但先在家吃飯。

話哂都除夕夜，當然想慶祝一下，於是路過見有芝士蛋糕就買嚟試吓。

半熟工房芝士蛋糕幾貴呀。75元得五件細細件，味道不俗，都是日式芝士蛋糕的味道。但有一層好creamy的在中間。

幾好食，但真係好細件，一啖可以食一件。

20151228 - ❤茄汁蜆肉天使麵❤

12月28日星期一，

 

放完幾日假，要返工，其實唔多精神，食埋啲藥好辛苦，

放工想快啲返家。

熊煮意粉，今次是天使麵，熊人不太喜歡天使麵，因為佢話好難處理，質地幼身，好似好易吸汁會過腍，

但我其實好幾喜歡食幼幼的天使麵，感覺似好幼滑。

西蘭花是另外渌的，上碟時先放上去。有煙肉，蜆肉同雞肉。

第二日帶lunch返公司食又真係腍咗啲呢。

20151223 - ☹☹大病一場☹☹

12月23日星期三

無端端病呀。

上星期六去咗愉景灣咳咗幾聲已覺得唔多妥，之後又聲沙，星期日唔知係唔係去完大棠落雨凍親，就開始咳。

星期一睇公司醫生唔得，之後星期二開始勁鼻塞，又攰到c，先意識到唔係鼻敏感，而係大傷風，嗚嗚，星期二冬至明明放早4:15，但大辛苦，叫熊在葵芳接我返家，返到家就只有瞓覺，瞓醒就食粥，已經食咗幾日粥....

 

星期三就sl，真係頂唔住了，又傷風又晚晚都半夜咳醒，無覺好瞓。看來聖誕假期應該泡湯了。

有個同事話抽到大獎，財多身子弱，算啦，都兩年冇試過大傷風。病吓都無法子。

20151220 - ☁ ☂┋落雨睇紅葉@大棠☁ ☂┋

12月20日星期日

想去大棠睇紅葉，因為本身當日要去元朗，既然都揸開車去，唔好浪費，點知落雨，人亦很多。警察開始在附近戒備，如果燒烤場隔離個停車場爆滿，上山的路就會封閉。

可能當日都幾大雨，所以我哋仲上到停車場，行少好多路。

天氣比較暖，正式只凍過一次，又成日落雨，唔夠乾燥。所以紅葉唔算好多，

幸好整個大棠都種滿不少楓香樹，每年不停生長，不少原本好細棵的樹都開始成長，數量夠多，總會有幾棵好紅。

呢幾棵最紅，所以超級多人，雨越下越大都無損遊人的興緻。

由於暫時入冬以來都成日落雨，太潮濕，儘管呢幾棵楓香很紅，但近看楓葉好多都爛，唔完整，唔可以影近鏡。

雨越下越大，可能因為咁，之後病咗呢！

20151219 - ヾ(◍'౪`◍)ﾉﾞ愉景灣

12月19日星期六

Xmas party之後同熊坐船入愉景灣，我同熊人都未去過愉景灣呢，非常之期待同興奮。但船費要三十五元，好貴呀，果然是有錢人的地方。

一落船係碼頭附近，感覺幾清幽的地方，有不少外籍人士，不過此行的目的係想去睇吓近來整好的教堂，似韓國/日本俾人專舉辦婚禮的白色教堂，

原來都幾遠，要再坐巴士去，經過好多樓，純住宅區的感覺真係好舒服。

落車見到個鐘樓，雖然人工化啲，不過可能當日天氣好，個天藍藍地，影相都幾正。

有馬車坐，不過其實咩人會坐呢？自己行吓好過啦。

見到個教堂啦，好靚啊，尤其當日有藍天。裡面都好靚，好似拍劇啲婚禮場地咁，當日都有人結婚，所以冇得入去睇。

圍住教堂是一個水池仔，所以令影相增加不少可觀性。呢張個倒影我好喜歡。

20151219 -(⊙＿⊙)中大獎

12月19日星期六。

 

 

公司聖誕party，今年抽到大獎，是頭獎啊。

 

其實幾奇妙。 因為我是執三攤的。

第一次抽到的是一個Senior manager，她去年都冇要到份禮物，好有大將之風，今年也不例外。

第二次抽到的同事是去年也同樣中了酒店機票的同事，他又話唔要份禮物。

老闆於是話，再抽到果個唔可以唔要份禮。

最後竟然我抽到，其實讀我個名果刻都不太相信。直到講埋我個姓先信。

老闆叫我要開心啲，同埋其實可補錢轉飛其他地方，同埋加多幾日。

20151217 -☆★沙田新城市★☆

12月17日星期四

今日去沙田新城市廣場，七樓戶外的聖誕燈飾，每年都好有心思，今年有聖誕浪漫璃光大道，有玻璃花海，有幾種色的玻璃鬱金香。勁靚勁多人影，不過手機就比較難影得靚。如果人想同花海影更加難。

仲有玻璃大道。好多玻璃製成好似花咁掛係上面，唔同顏色的玻璃我覺得好靚。

另外亦有唔少玻璃裝飾，好特別，比起其他所謂大商場的聖誕裝飾來講好特別，真係未見過，好有特色，值得睇吓。

呢個紫色燈海都好浪漫。

除了去年迷宮唔靚之外，連續幾年都好有驚喜特色。

之後唔知食乜好，想起想去麥當勞換Woodstock cushion。於是食麥當勞好過，飲吓咖啡食吓甜品，平平。

整得唔太靚，不過算啦。

20151213 - ⊕⊙得意斑紋貓⊙⊕

12月13日星期日，

好開心，又完成一個羊毛氈貓貓。

上兩個月工作忙爆，心情惡劣，冇咩心機拮公仔，因為拮公仔都幾花時間，完成一隻小動物要六七小時，

畫畫就快少少。上兩個月工作忙碌，所以畫畫多。

月底去完旅行轉轉運，暫且忘記一部分心底的鬱結吧。

工作量回復正常，長假期將至，係時間整吓公仔。

今次呢個又係西九龍中心買的，教學好詳細，而且都有啲經驗，所以幾滿意，啲班紋好花時間，但可以作遮醜之效。

一份幾十蚊可整兩隻貓，仲有一隻未整好，一份份係貴少少，但樣樣色都有，好過樣樣色都要買，有時要用到不織布都唔駛自己樣樣買完用少少。

呢隻貓貓玩的冷球得少少毛冷，自己買就煩死，個冷球冇拮實，隨時可以拎走架。

20151213 - ♨♨再遊鳳坑谷埔♨♨

12月13日星期日
上年去過鳳坑之後，原來熊一路都喜歡，念念不忘好想再去呢。
於是今日我哋食完早餐就去行吓。
可惜當日整路，有啲塞車，成三點幾先入到去。

在鹿頸小巴總站起步，朝著停車場方向行走。在支路左轉，經過雞谷樹下後踏進山徑，很快便又接回水泥徑。
沿岸而走，看見鳳坑家樂徑的牌扁需左轉(右方往鳳坑家樂徑) ，踏上梯級，跨過一個山崗後輕降至岸邊。此後一直沿岸邊水泥徑走至鳳坑，續走過堤壩至谷埔。
在谷埔的士多右轉(沿岸直走可往榕樹凹及鎖羅盤)，走過荒廢田間小徑與村屋，每遇支徑均需右走，及後橫過小河道返回堤壩。

一段易行的行山徑，上斜好少，唔會點出行，有一大片紅樹林，亦可遠望沙頭角，亦有士多可作補給。
HEA 行之選。

我們在回程的部分路段跑步，先出吓汗，有所運動。

20151211 - ☆★小小聖誕樹★☆

12月11日星期五。

想買棵聖誕樹放家中，雖然屋企好亂，但想有啲聖誕氣氛。

於是去深水埗睇吓。深水埗玩具街最好文具玩具，中秋有燈籠，聖誕節有聖誕樹同聖誕飾物。

但要早啲去，因為八點左右就收。

估唔到咁熱鬧，有唔同大小的聖誕樹，聖誕圈，飾物，大大小小，應有盡有。

而且好多人，個個都穿插在唔同小店中，聖誕氣氛仲濃厚過尖沙咀。

 最後買咗棵小小聖誕樹，幾十蚊有交易，本身已有雪decoration。啲雪會甩到成地都係。但都幾靚吖，有聖誕氣氛。

20151208 - ♪♬♩♫疏乎蛋主題餐廳♪♬♩♫

12月8日星期二。

葵芳上個月的Izumi Curry咖哩店改為疏乎蛋主題餐廳。終於迫到熊人陪我試。

好多蛋黃哥呀。

點餐紙，枱墊張紙。

張枱都係蛋黃哥。

點了一個SET，有嘢飲，有甜品。

牆壁四面都有疏乎蛋啲圖案。

熊人食咖哩飯，由於蛋黃哥個樣似係透明膠紙，所以回點走樣，

我就食個類似大阪燒的東東。

最後有甜品。好多嘢都成一百蚊或過百蚊，熊人話好唔抵食。

門口

隔離當然有shop買嘢，好多都好靚，但熊人唔俾我買。

蛋黃哥好受歡迎。

20151207 - ♪♬♩♫捧熊人場♪♬♩♫

12月7日星期一

今日拍拖紀念日，點知隻熊人要出去灣仔玩音樂。樹懶唯有做跟得夫人捧場。熊人喜歡音樂夾band,看到熊人開心我就開心，熊人喜歡我就喜歡。

結婚之後都未出過show。所以都想去聽吓熊人表演，

呢間係灣仔一間酒吧，樂隊可以排隊玩，每半小時一節。客路都是外國人為主。熊人佢哋今次唱英文歌都幾受落。

同以前改咗風格，幾好聽。

20151206 - ╭❤╯兩口子飲茶+打邊爐╰❤╮

12月6日星期日。

天氣終於涼涼地似冬天。

兩口子見天陰陰(昨晚下雨)沒有打算去行山。

於是在家HEA鳥。

 

十一點左右起床，1點左右先去飲茶。近來又喜歡去富臨飲茶。

叉燒腸好食又夠滑。

迷你間條熊都有去

芝麻流沙包都幾流沙。

鮮蝦菜苗餃好多菜，而且好晶瑩剔透。

燒賣唔及稻香好食，稻香仲有大大隻蝦放上面。

蘿蔔糕都好食，好多蘿蔔絲之餘個面仲脆脆地。

之後返家HEA一會，(今日全日都好HEA) 之後去了熊貓酒店間AEON行，12蚊店好多收獲呢，仲有好多聖誕嘢賣，聖誕節氣氛好濃厚。

行咗好耐，差啲唔記得係要去街市買嘢打邊爐，可能晏咗去，好少嘢賣，好難先搵到蟹賣，百幾蚊兩隻好貴，但好好食。另外亦有食泥鯭。好鮮甜，凍凍地，打邊爐好正。