20180630 - (✪ω✪)試校服

6月30日星期六

今次長周末，三天假期，由於冇學返，又要諗吓同以朗去邊玩，剛剛冇哂咖啡豆，所以要去Ikea買，上次去愉景新城知道隔離中染大廈有IKea，所以今日去中染大廈。

一早以朗又拎住佢兩隻狗狗兩隻狗都係宜家買，其中深色狗同以朗一起走台灣，但以朗喜歡淺色狗，日日錫隻淺色狗，好多口水，霉霉up up 了。

去宜家其實有啲似一個遊樂場。有啲梳化俾佢坐吓，呢張迷你梳化好得意，好fit 佢坐。呢間宜家分好多層，每層都比較細，冇沙田咁好行，不過食嘢冇咁多人，我諗冇乜邊度會恐怖過沙田啦。泊車一百蚊一個鐘，三百三個鐘，好抵，但要到張單過，我哋食嘢買咖啡豆都過三百，但分開單，要叫宜家手寫發票先可以一次免三小時。


仲有一個位係兒童樂園，以朗入了帳篷好開心，初初有小朋友喺裡面，以為有人同佢玩。


郁嚟郁去唔捨得走。飛啲布生果出嚟又得意。



兒童樂園附近有好多公仔，以朗又揀隻狗狗，但好大隻，同佢差不多大，咁不如俾佢要隻熊貓好過，細啲，屋企冇位啦。

結果熊貓成為以朗新寵。帶埋過去舅父度，

今日同我慶生，食打邊邊，有蟹，蝦🦐，仲有狗狗蛋糕。個狗狗蛋糕普通咋，純粹因為以朗喜歡狗狗先訂。

今日仲問嫂嫂找表哥之前的校服俾以朗穿，如果校服冇改，可以著返，慳好多，以朗穿起來好合身，又唔肯除，仲著住同我影生日蛋糕相呢。



好靚仔呀，諗起好快又返學，自己走入課室有自己朋友仔，我會好唔捨得，到時開學我實喊呢。佢喊我又心痛，佢唔喊又覺得佢大個仔，唔需要媽咪了，好矛盾。

20180629 - 有人收啦ლ(❛◡❛✿)ლ

6月29日星期五

星期五竟然冇波睇，真係好失望。又成日落雨，冇得跑步，happy Friday 結果咩都冇得做，慘。

由於近來發現美銀間麥當當好少人，買咖啡唔駛排隊，現在差不多一星期幫趁三次。沖咖啡個阿叔都認得我，有日仲叫我買coupon送杯。宜家環保啲，去麥當當都可以用自己杯，由於呢個杯係免費，唔似星巴克個杯可以減四蚊。另外因爲咁，用coupon買咖啡冇得四送一。

其實MCCafe啲咖啡係唔錯架，如果咖啡癮起，14蚊買杯細的cappuccino 都可以頂癮。

今日嫂嫂買了珍妮曲奇的球夏威夷果仁可可脆片，以前我都會買曲奇，但自從中環冇店之後都冇買過了，又唔知幾時開始呢間嘢變成大陸人的手信名牌，對香港人態度好差之後，我又冇乜興趣買。


不過嫂嫂買了都要試，好濃的朱古力味，每塊都好薄好脆，加埋塊塊都有唔少夏威夷果仁好香口，講真坐喺度隨時可以食半盒。係睇波宵夜之選，亦係肥爆邪惡之選。


世界盃分組賽話咁快就完了，其實都行咗一半，好開心今年有19場直播，成日可以睇波。唔知四年之後會變成點呢？



今日以朗跟表哥揸筆學寫字個樣好老積呢，揸筆個樣似模似樣，字就當然未識寫啦。宜家唔興太早學寫字。

今日收到個好好好消息，就係以朗有書讀啦。4月尾第一次會搵啲Waiting list 俾Offer 佢，以朗4月一輪落空，聽聞6月係第二個機會搵人，我已經托同事俾信校長，希望校長會俾個機會以朗，六月成日等電話，睇信箱都係一次又一次的失望，今日係6月最後一個星期五，亦是最後一個工作日，諗住都冇機會啦，點知三點幾四點有人打俾我，以朗有書讀啦，講真waiting list的人何其多，點會咁易揀到以朗，好彩靠朋友幫忙俾信校長先有書讀。
我宜家安樂哂啦，唔駛再諗報唔報威寶了，又唔駛成日擔心BB冇書讀，要做超大B啦。
宜家先知做人媽媽真係好多嘢都會好緊張，好著緊呢。

20180628 - ◐剪頭髮+雜相◑

6月28日星期四
呢輪KEEP住LUNCH TIME行行行，日日去金鐘真係好悶，有時行吓去摩天輪，影一影就走，或者去IFC行行行，不過金鐘可以買吓嘢飲，東海堂咖啡正，又或者美銀的MCAFE好少人，買嘢飲真係一流。行去IFC就冇咁熱但就好難買嘢飲，人多冇咁好行。影摩天輪好靚，啲雲日日唔同。

以朗在家樓下去婆婆度，姐姐湊佢過去係行，我湊就要抱。27磅啦，抱死人。



宜家喜歡運動，天氣熱跑步辛苦唔緊要，最憎最憎樓下好多好多曱甴，跑長廊跑5K又會瞓唔著，所以只有星期五六先跑跑長廊。再加上宜家落雨，好多驟雨怕跑跑吓落起雨來冇得避雨，所以近來一星期只跑一次，最多兩次，其他時間做咩運動好呢？
近來瘦身興玩HIIT，我一般做十經左右約15分鐘至20分鐘，比起跳鄭多燕流更多汗，但究竟係唔係WORK呢？所以都好奇想CHECK自己運動後心跳率，所以用COUPON CHEAP CHEAP地買了小米手環，CHECK吓心跳，計步數。
步數比IPHONE 少，唔知邊個準，HIIT/跑完之後心跳CHECK 到14X，如果打個9折都13X，運動嚟講算WORK。

行街見到樹懶想買俾熊人做生日禮物，但屋企好多公仔啦。樹懶少有，其實幾特別。

以朗個八両金頭肉酸咗兩個星期，唔敢再入髮型屋，怕佢又唔肯剪，熊人自己同佢剪，自己剪又OK冇喊冇驚驚冇發脾氣，剪短了頭髮靚仔哂，清爽哂。

宜家成日自己開電視，99台個醫療船佢都睇得一餐。

近日喜歡玩填色APP，好玩好自癒，一開姑咗就好難停，好多圖揀，最喜歡揀食物同埋狗狗。最喜歡多顏色的圖畫。

20180624 - ╭。☆譽粵菜@飲茶+ 上堂☆。╮

6月24 日星期日

又係星期日上堂日，宜家以朗都知道老師想做乜。上堂都唔錯，起碼會自己收拾玩具，放好杯碟等。宜家我哋唔會行埋去，由得佢自己做。

今堂教顏色，以朗唔識呀，我教咗佢好耐架，但佢都好似唔明，我相信佢分到顏色，但唔明咩叫「紅色」「黃色」咁，佢聽中文啲理解力係爭啲。所以佢係唔識分，唯有再努力啲教佢認顏色啦。

另一個環節係喺啲米度揀豆，佢識呢。都揀得幾快。

之後約咗爺爺嫲嫲飲茶。但爺爺又臨時甩底，嫲嫲唔識路去咗新港城間譽粵菜開位。

呢間嘢高級好多呢。啲食物精緻好多，當然價錢都會貴啲。

當然點咗個切雞飯俾以朗食，小朋友點都要食少少飯。加啲切雞算係比較清，冇咁油。

我哋點了春卷，熱辣辣，脆卜卜，蝦都幾多同幾新鮮

另外點了蒸粟米肉丸，粟米當然係俾以朗食。

仲有雞扎，好多料

呢個腸粉又係好食，腸粉包脆脆的金網，再包米卷，餡料係蘿蔔絲酥的蘿蔔，好多汁好食。

仲有粉果都幾精緻，皮比起豪宴係薄啲。


同埋蝦餃都係水準之作。

呢間幾好食，點心係精緻啲，環境燈光都舒服啲。間中食吓都唔錯。

20180623 - ヽ( ^∀^)ﾉ食蟹睇世界盃

6月23日星期六

今日去完D park 就順便去楊屋道買海鮮。未必係最平，但起碼多選擇。可能屯門某啲地方平少少，不過比起馬鞍山就平成1/3或者1/4。

熊人見啲三點蟹開始合時候，所以買幾隻自己食。由於三點蟹比較細隻。所以五十蚊左右有三隻，我哋買嚟睇波食，今日免費電視直播的戲碼麻麻地。係韓國對墨西哥🇲🇽，我哋唔多鍾意南韓在日韓世界盃時收買球證，所以對南韓係冇好感，但有我直播都要睇吓。

半場左右就食蟹。好清甜呢，嚟緊三點蟹，白蟹逐一上場，可以食好多好多蟹，食到大閘蟹時間都得，今年有車，買海產好方便囉。

睇完南韓對墨西哥之後，本來有套日本戲想睇吓係乜料，點知睇咗兩分鐘左右忽然抽起播德國對瑞典，當然要睇啦。上場德國對墨西哥爆冷輸俾墨西哥真係嚇死人，呢場不容再失，結果都打得幾好2:1贏瑞典，仲未死哂。

不過我哋就大鑊了，兩點開波，睇完四點，明天要同以朗搏鬥架。不過四年一次的世界盃唔睇唔得，死就死啦。

20180623 - ✧*｡٩(ˊᗜˋ*)و✧*｡D Park 好好玩

6月23日星期六

今早熊人整的早餐，菇菇包，好食，因為我喜歡食菇。

以朗越來越大個。電力都越來越多，喺屋企同佢玩，好難滿足到佢，有時亦都會玩到唔知玩乜好，所以假期最好就係帶佢出街行吓。天氣熱去唔到公園玩，又或者好似今日咁落大雨真係冇乜地方好去。

網上找到原來D park係一個親子商場，好大地方俾小朋友玩，最重要係免費。我之前都去過愉景新城，唔知有咁大地方俾小朋友玩，兩歲或以下就喺室內的中央公園玩，有穿珠仔，或者其他平日在室內遊戲室見到的小玩意，一次過十幾個遊戲任玩，入內要除鞋。



以朗最喜歡呢個，



仲有滑梯，以朗一見到係玩的地方就自己走嚟走去。呢樣玩吓嗰樣玩吓，無事忙咁。

玩到咁上下就過去最近的Delifance 食嘢，好耐冇食過呢間，個桃撻好好味，

包包都好食，但個意粉就普通，三點幾係下午茶餐，幾抵食，撞到同事先知出面仲有個鯨魚花園，不過要排隊攞飛。

呢個餐有通粉俾以朗食，有牛角包，三文魚奄列，抵食。

呢個親子商場好多俾小朋友玩的設備之外，仲有個小朋友戲院呢。等以朗大啲可以去睇戲。


由於以朗太細，鯨魚花園未必適合佢，半戶外似係公園可以爬上爬落，三四歲以上就最好玩。如果平日少人啲會好啲。或者搵日平日少人可以帶以朗去玩。

另外仲有付費區的越野車歷險旅程，可以揸車，不過以朗太細乜都未識，唔駛玩住。

其實呢個場啲布置好多都好童心，連商場俾人休息地方都整到好靚，整到似棵樹有動物，小朋友見到都覺得靚同好玩，以朗係咁行吓個場，行咗一小部分，周圍玩吓都放哂電，唔捨得走，仲一上車就瞓覺了。