20180602 - ♣♧玩具反斗城買玩具♧♣

6月2日星期六

我九點起身就過咗媽咪度食早餐之後去染頭髮，唔想俾以朗睇住我出門口，所以九點半就買個包去媽咪度食，十二點幾整完頭髮，熊人已經帶埋以朗一齊等我啦。

我哋今日去又一城，因為有玩具反斗城，我哋想買啲教育玩具俾以朗，又一城好大地方，一去到就同佢食麵包，之後去行反斗城，上次嚟仲係冬天，識行冇耐，今次就滿場飛，見到好多玩具都自己行去玩，行去按制，好開心呢，樣樣玩具都玩吓，我哋又揀吓嘢。

以朗係咁玩啲玩具，但又冇話要攞走，可能因為唔會次次出街都買嘢俾佢，佢未識要擁有啲玩具，佢可能當呢度係個大PLAYROOM，有好多玩具，玩完就要走，反而佢見到啲毛公仔狗狗就成日要攬住上身要拎走呢。

最後買咗四百幾蚊，因為呢有張coupon減50，結果仲買多咗。呢部機似係電腦，但返到屋企先覺得以朗未識玩。

Color, shape, number, counting， 在家教學先。

仲有彩色的英文字，不過要有磁石板好啲呀。一次過買好多嘢，但慢慢先拎出嚟俾佢玩。成個月不用貫玩具了。

回程坐馬鐵，買咗件東海堂綠茶卷，78蚊，同媽咪share一半。一般咋，唔係以前138隻綠茶卷，蛋糕綠茶味唔夠香濃，綠茶Cream不錯，但唔夠多同香，同平日西餅的綠茶卷一樣，不過78蚊一條有大約5-6件，抵過散買。

回程以朗瞓咗，但一返到屋企又醒咗唔肯瞓，只瞓半小時晏覺咋，激死，早啲帶佢去表哥屋企玩。

次次去到舅母家就睇電視，我哋平時唔睇YouTube 以外的嘢，所以佢次次都睇到好開心。要埋枱食飯，唔埋枱唔肯食，激死。