20180618 - ★☆端午節☆★

6月18日星期一

連續三日假期，阿姐昨天冇返屋企，我陪以朗瞓，半夜醒過要一起瞓，六點唔夠就要食奶，唔駛咁餓呀，

好彩飲完奶都肯瞓，同爸媽飲早茶，又係去豪宴，不過冇特價飯食。都幾貴，最後仲係爸媽請，呢排以朗好痴身，飲完茶見我行開去廁所就喊到淚流披臉，喊得好慘，同佢瞓過一晚仲黐身。豪宴啲腸粉幾好食，可以再食，

飲完茶之後，爸媽就返家，本來想同媽咪行一陣，但佢哋又趕返屋企，咁我就同以朗兩個人行，熊人就攞車去嫲嫲家，因為爺爺少放假想見吓個孫，咁我見以朗都係剛剛病完，唔好去多人地方都好。

同以朗在馬鞍山廣場世界盃公仔行吓玩吓。

竟然肯乖乖企定定影相。

之後同佢行明創優品。有熊熊遇見你啲嘢賣，好得意，不過啲嘢唔係樣樣啱用，本來想買熊熊遇見你隻熊貓俾以朗，點知以朗又係睇中狗，唔肯擺低，其實隻狗唔靚。幾肉酸，但係新寵，夜晚仲一齊瞓。


入到元朗，爺爺話臨時唔得閒，唔見人，咁都有，不過我哋幾個同嫲嫲食吓，以朗有新玩具玩都可以，回程時架車好熱，我同以朗一齊喺車度瞓，熊就慘慘要揸車。

晚些食通粉，以朗竟然食好多，可能因為喺嫲嫲度玩嘢唔食，佢宜家食嘢好飄忽，一時食一時唔食，又唔係真係唔食某種食物，基本上好多嘢都食，係玩嘢。

夜晚交俾姐姐佢又喊了，因為跟咗三日，又同我瞓咗一晚，我都好想日日同以朗一齊呀。