✿｡◕‿◕｡✿樹懶的日記✿｡◕‿◕｡✿: 6月 2013

2013年6月29日星期六

20130629 - ♠♤娘惹廚房♤♠

6月29日星期六。

以為熊會接我放工在中環行一陣街。
點知佢瞓到12點至醒。
自己坐車，但我成兩點至走，
我又未食嘢佢又未食嘢。
又去銅貓咖啡食豬扒包同飲啡。
熊嫌個豬扒包太多汁，多咗沙律醬，太多汁。

加12蚊有煙肉批，不過麻麻地。

之後同佢行咗一陣ZARA H&M等，之後再去小欖摸蜆。
上星期見到有同事去長沙摸蜆，我都想去，聽聞要潮退先有，初一十五是潮退，即是要下星期至係，
但熊又話小欖有，又話潮漲都有，結果咩都冇，而且啲石好UN腳，好唔開心，因為想去長沙乾淨啲。
最後又求求其其去小欖，好唔開心，點知熊仲鬧人....

最後都冇咩事。去了娘惹廚房食嘢。

青善街算係好多嘢食，間泰菜永遠都好爆。
又唔想買返屋企，於是就試吓印尼菜。

試了幾樣比較出名的菜色。
加多加多，即是印尼沙律。
有蛋有蝦片有菜，有豆有芽菜，啲汁酸酸地，有少少辣幾惹味但一樣好清新，夏天食最正。

試了雜錦黃薑飯，是周末假期限定的。

有雞肉，有豬肉，豬肉好似東坡肉咁腍。幾好食呢。

仲有娘惹印尼燒雞，有半隻份量，等咗幾耐至有，熱辣辣，味好濃。

OVERALL味道不俗，幾特別，但好濃味，我食慣清淡，所以只會間中食。

今日熊趁我未到時抽了LINE的熊仔，之前一次抽到個石兔，好樣衰，熊自己抽番熊呢。開心。
食緊包架，個咀仔因為食緊包而谷谷地。好精緻。

熊送我回家時，送了首佢自己作的歌俾我，因為呢首歌而通宵，所以冇精神同我周圍去呢。
我即時忍不住喊起上嚟。

20130628 - ヾ(◍'౪`◍)ﾉﾞ跑海濱長廊

6月28日星期五

好熱的天氣，但真係好想減吓肚腩，
一直都知道唔做帶氧運動係好難減。
其實我真係好怕熱，好憎運動，
不過有跑步之後覺得身體好咗少少。
同埋冇咁怕熱。
所以想KEEP住跑。

宜家六月份，七月份，八月份都會好死熱。
一係落大雨，要跑就預咗熱。
去到球場，竟然閂咗門，想哭。
原來因為維修呢，星期一開始了，直至七月三日。
一場來到，一定要跑，熊起初想跑番上山。
不過最後就跑咗去海濱長廊。
好正喎。
熱就好熱架啦，但有時都有少少風。
又帶住濕毛巾，熱唔死的。
來來回回跑吓都唔錯，跑一程都幾遠啦，
條路算直又平坦，幾正。
又近住個市鎮公園，一熱就可以借洗手間洗吓毛巾。
又有水機飲水。
望住個海景跑吓，再行路返家。
不知不覺都運動了個半鐘有多。
流好多汗架，但唔覺得好辛苦

2013年6月25日星期二

20130625 - ✿｡◕‿◕｡✿California Pizza Kitchen

6月25日星期二。

同熊睇吓波鞋同埋其他鞋。
所以就去旺角行吓。

除咗星期五好多人之外，其實星期一至四條街唔算多人。

今日星期二都唔算好多人。
去家樂的California Pizza Kitchen竟然唔駛等。
而且仲見到有幾張空枱。

薄薄PIZZA我倆至愛。
辣肉腸+雜菇，比較淡味但都好食。

呢個熊已經係第二次叫了。
食咗好多澱粉質，所以食兩樣嘢就夠了。

個幾月之前睇對波鞋唔買，冇哂了。
另外之前喺WALKER SHOP見到對特價鞋又冇哂了。
宜家香港買嘢好似要搶咁。
熊成日考慮考慮...咩都冇得買了。

2013年6月22日星期六

20130622 - •●✿自家製蘋果酥蘋果批✿●•

6月22日星期六。

放假，可以HEA HEA 地。
今日熊整APPLE PIE。
上次整過幾好食。
今次再製多少少蘋果餡。
加咗啲以前買落的現成酥皮，
將啲蘋果餡放入切好了的正方形酥皮，接埋，用叉在邊皮壓少少花紋。

在酥皮叉幾個洞，以防焗的時候過熱會爆開。

啲酥皮之前買咗好耐啦，個邊好乾身。好彩最後焗好都好OK。

夜晚冇食飯，食哂蘋果酥之後就去睇戲。

睇咗「非常盜」。
一直令FBI束手無策的「四騎士奇藝坊」，以快閃幻術表演享譽全球，四位技藝超凡身份神秘的成員，專向貪婪的財閥埋手，盜取他們的鈔票送贈普羅大眾！多次哄動「演出」後，警方仍無頭緒將其繩之於法…
幾好睇，故事係有犯駁架啦，但係幾好睇，用魔術貫穿套戲，魔術好型。同埋情節有啲係估唔到，唔錯，幾驚喜。

睇戲之前焗好個PIE，放涼。
熊鬼鬼馬馬唔知整跳跳虎定貓定熊。
HAHAH~

2013年6月21日星期五

20130621 - ￣▽￣差咗的一壽司

6月21日星期五。

星期六不用返，開心。
同熊去食壽司，仲懷念緊日本。
元氣好多人。
不如試吓一壽司。

一壽司冇咩人，唔駛等。
幾年前一壽司新開時，得覺得好好食，再加上個大魚缸，一邊食一邊睇魚。
好正。

見到MENU，overall都比元氣貴，最緊要好食，都冇所謂吧。
今次點三文魚

上燒鯖魚係季節推介，但好腥，痴線，唔好食。
下面的是燒三文魚腩，好正。

吞拿魚三食，都唔錯。

加州卷幾好食。唔差。

佢叫海鰻，其實係穴子，麻麻地，大件都冇用，我哋唔喜歡食穴子啲味。係有分別的。

炸軟殼蟹手卷。麻麻地呀，啲軟殼蟹冇味，而且炸到好乾身，我好喜歡食元氣的軟殼蟹手卷，但呢間唔得。

芥辣墨魚仔，太多wasabi，邊有多成咁，似食緊辣辣壽司。

仲點了燒銀鱈魚，等咗好耐，好好食，不好5x元好細件，好薄身呢，用日式燒汁燒魚，好好味。

唔多夠飽，再點多少少嘢。
鰻魚貴貴，但好食，食過日本的鰻魚都好貴，所以接受了鰻魚係貴嘢嘅事實。

呢個係全餐飯最抵食的一碟，19元的甜蝦加蟹棒，幾好食。

食完先係九點八左右，見好多人排黑夜壽司，黑夜壽司半價，係十點鐘開始，係幾抵食，不過如果唔係黑夜壽司就麻麻地了。
overall 貴過元氣，但冇因為貴咗而有較好質素，唔抵食。

20130620 - ☼ ☼好熱跑步 ☼ ☼

6 月20日星期四。

自從4月15日跑步之後，
冇跑過啦。成個5月份都落雨，5月9日有飯後散步。
到了5月中下旬又無端端左邊腳趾公痛。
痛到好多鞋都著唔到。仲跑鬼跑馬咩。

好彩六月時腳趾公又唔痛，但見差不多去旅行又唔想跑傷隻腳。
結果足足兩個月冇跑過啦。
宜家又再跑番，正正炎炎夏天，真係熱死人。
唔知自己可以跑到幾多。盡力就算啦。
由於天氣好熱，要準備毛巾，熱嘅時候可以吸汗，
或應該濕咗條毛巾降降溫。

由於太耐冇跑。
對腳唔聽話，跑跑吓唔係呢邊腳痛就係嗰邊腳痛，
咁都不特止，再加上好熱好熱，
熱到冇咩耐力。
最後只跑了十個圈，比起冬天時跑十七個圈真係好差。
但係流嘅汗就多好多。

由於兩個幾月冇跑。
啲肌肉好差。跑完第二日好痛，有少少似第一次跑步咁痛。