20181113 - ╮(╯3╰)╭跑@力不從心

11月12日星期一，
今日老闆們都出差，有同事想點下午茶，我又冇帶飯就點了，
呢間叫蝦佬，主打龍蝦湯，見佢張外賣紙好似唔錯，不過食咗就中大伏，我個係龍蝦湯蝦意粉，我當然知道只係龍蝦湯冇龍蝦肉，但佢話有蝦，點知得一隻蝦，有病，其他是翠肉瓜周埋豆，最慘個龍蝦湯油到不行，味道ok，但真係十級油，要用兩張紙墊枱，雖然份量不多，但啲油咁勁都肥幾磅，我就唔會再食了，飲品加6元點了玫瑰花蜜，呢個ok，玫瑰花味好濃。但主打龍蝦湯都做得唔好就no 啦。



11月13日星期二
今日係跑步日，不過唔知點解好力不從心，好慢，唔知係個app count唔到定點，再加上跑樓下車路真係好沉悶，又成日有曱甴，想死，唔知點解好熱，冇氣，冇力，根本唔可以半小時5k，樓下車路一轉彎調頭就屈我停，跑到好無癮，好似好力不從心，同之前比退步了，好失望呀，冇咩心機跑。
好想跑長廊，但跑完再行樓梯上來多10分鐘，再過媽咪度食飯會影響佢哋沖涼，又想早啲返去睇仔，雖然唔喜歡，但仲係跑樓下，唔知係唔係跑完即刻沖涼食嘢傷胃，定係有啲腸胃炎，肚痛肚屙。

20181105-6 - (ಠ_ಠ)跑+襯色

11月5-6 日星期一至星期二

盡量一星期跑一次，最好兩星期跑三次啦，唔知點解越跑越肥，唔通我要上返118磅先安樂？
不過我相信自己跑咗都肥，唔跑更肥，而且會周身痛，想好似之前7-8月瘦瘦冇可能，人哋明星日花兩小時運動又重訓先KEEP到靚靚冇肚腩，唔通一星期我跑半粒鐘或跳舞就可以冇肚腩咩，可能真係有人得天獨厚，但應該好少人係咁，人哋背後日操夜操你又知咩？
宜家不求好瘦，只求114-115就算了。最緊要著返哂未生之前啲衫就得。
近日唔知點解跑得好慢，成日唔夠氣30分鐘係有5K，但好多停頓，冇氣又冇力，因為唔多喜歡跑樓下，好悶，有時調頭就屈你停，邊有心機跑。是旦了，點都要KEEP住運動呢。

工人姐姐幾錫BB，但佢啲衣著品味有時幾令人頭痛。成日同佢襯哂色，之前試過經典的黃襯黃，令人咋舌，今日灰襯灰都可以，男仔灰色冇所謂。
今日BB好Hyper~











灰襯灰ok，不過另一日(6/11)的啡襯啡就有少少冇眼睇了。




其實啡色呢隻色好難著，通常用來襯衫，成套著就真係似篤屎囉。


或者我永遠都唔會明白菲律賓的潮流。

20181025 - ☹跑+ 病了☹

10月25日星期四

天氣涼了不少，跑步都跑得開心好多，宜家湊以朗越來越夜，夜晚跑步已變成夢想，與其每個星期五六都只有假希望去跑，何不的起心肝每星期搵日飯前跑，如果唔搵一日飯前跑，我估我呢世都冇得跑。

星期一其實係每星期最辛苦的一日，但我仍然想堅持每星期一跑，事實上跑完之後你係會精神好多架。跑步係一樣簡單又唔駛錢又唔駛用腦的運動，如果連呢種運動都唔肯做，就真係咩都唔駛做。

天氣涼了24-25度好好跑。30分鐘完成5K，沒有問題，因為頭15分鐘跑得快，但之後就莫氣，半停半行半跑，宜家一星期跑一日咁大把，以我的能力想操返起真的冇乜可能，想好似之前30分鐘唔停跑5K嗎，要一星期兩天，咁我究竟點先可以跑到兩日呢？宜家馮以朗黐身成咁，要等下年轉到上午校先有機會再跑多啲了。

今個星期第一日返三個鐘，第一日返屋企就有鼻水了，唉，人哋話N班係成日人病，以朗玩了三星期都冇病，以為自己咁好彩，不過我的人生又點會同幸運兩個字扯上關係？第三個星期開始病，冇燒就叫佢照返學了，都叫精神。

精神到食完藥之後都唔眼瞓，宜家放四點半，每日五點前回家沖涼，食少少麵包，六點前到婆婆家瞓覺，只瞓半小時都夠精神頂到12點先瞓。唉，即係我宜家12點之後先得閒啲。
佢唔瞓都算，仲要爬落床坐喺地下玩被，就快被激死了。宜家我對以朗瞓覺的時間又退守一步，11:15-->11:30-->12:00
12點前瞓就算了。自己的囝有無窮精力，見到我又唔捨得瞓，日日鬧又鬧唔到咁多，只好自我調節心態吧。

20181009-12 - •●❤跑步+雜相❤●•

10月9日星期二

今日黃昏跑，但力不從心的感覺，再加上GPS又有些問題，屈我一轉彎就暫停，又計少了好多km，雖然話我跑步係想少啲背痛，但如果有進步可以令我有啲動力挑戰自己。宜家個定位時得時唔得，搞到好似跑差咗好多，好灰架。

上星期放假都有跑，不過因為自己不自量力，連跑兩日，3/10夜晚跑長廊還好，但4/10黃昏又跑，不足24小時跑兩次係唔得，大脾小腿都好痛，唔夠力，好慘，之前三四月係可以連跑兩日，看來近日狀態不夠好，希望有時間可以喺今個冬天操返fit。做了陪瞓專員之後，能夠找到時間運動真的好難，以朗睡了已經11:30真的太夜了，樓下街燈又未整好，真係冇得跑
 

我心目中係一星期運動五日，兩日跑步，兩日HIIT，一日跳舞，但宜家好明顯唔得，因時間同地點關係，多數是一天跑，一天HIIT，三天跳舞。要平衡湊仔同運動真係一啲都唔容易呢，呢幾日明明係生理期後最易瘦身的日子，但呢幾日偏偏重了兩三磅，真的教人很灰心，不過當我明白到運動健康瘦身是一場持久戰時，唔運動會肥，運動咗都未必瘦，我還是要做適當的運動吧。

知道以朗今個月26日有生日會加HALLOWEEN PARTY，於是去石板街買少少嘢俾佢當日打扮，個袋仔冇咩興趣都叫做有玩吓，頂帽就真係唔會帶，一戴上頭就撥開。即係當日只著件蜘蛛網衫同拎個小袋仔就得啦。




仲有呢個星期啲相，以朗好喜歡扮書本上啲圖畫的動作，例如張開口，跳等，呢本書有人睇書，佢就即刻睇書。宜家坐梳化睇書好似大個咗好多了。









另一日係我星期五去SHISEDO做FACIAL，喺婆婆屋企食飯兩老表攬頭攬頸，兩個唔鬧交時係幾FRIEND架。




宜家姐姐上了軌道，我會去跑吓步，做FACIAL，食吓飯咁，有時返嚟見BB好似好開心，唔記得媽咪，令到我都要盡量十點前回家見佢一面，其實說到底是我唔捨得BB，而唔係BB唔捨得我囉。

20180911-12 - •●✿跑+貓貓衫✿●•

9月11日星期二，

跑過一次覺得好舒服，適當出汗對身體好，可排毒，最重要連背脊都痛少好多，所以要跑吓啦，上次係回歸跑步之作，所以小試牛刀只跑3公里，今次要跑多啲。

同自己講跑5公里，如果唔得就跑25分鐘，因為上次跑過，今次好快回復狀態，估唔到跑到5k，不過我覺得個GPS 唔太準，通常樓下會跑得好啲，跑長廊就差啲，應該是GPS問題，但總體來看都唔及今年四五月咁好咁有氣，始終經歷了六月大雨少跑，七月身體問題，八月新姐姐到來暫停。要練返好氣或者就得冬天。少雨，天氣涼會好跑啲。

宜家轉了食飯前跑對減肥的效果差了很多，宜家先搞好身體同唔好再肥落去都偷笑，要減肥我諗要跑多兩三個月先有機會。

9月12日星期三

同以朗喺屋企玩到唔知玩乜，拎件貓貓衫俾以朗睇，佢近來好喜歡貓貓，俾佢睇完仲試穿，點知穿了唔肯除，我件tee變成bb的連身裙，幾好笑，影吓佢，因為過多兩年唔會咁得意啦。大個咗高咗又冇呢種感覺了。

20180904 - (≧▽≦)重新開始跑步

9月4日 星期二

今日公公去澳門出差，由於婆婆擔心我沖涼時搞佢唔掂，所以我決定試吓早啲返屋企跑步，因為我宜家個背脊超級痛，平日在家跳鄭多燕真係唔係好得，以前冇做開運動就得，宜家冇乜用，可能又因爲我沖完哂涼臨瞓先跳唔係咗賣力跳，更加冇用。我唔敢喺媽咪度沖涼，分分鐘涼都沖唔到，如果以朗見我唔到就可能唔扭，
 

今日早兩班車返家，即係坐1817開的車，7點三左右就返到。快。 即時試去換衫，落街跑幾個字再去攞中藥(之前改早了7:30)，雖然今日都好熱，有成29度，不過可能因為我哋屋企近山邊，宜家真係涼咗少少，有啲風，唔太熱(比起7/8月)，由於都好耐冇跑步，好似近一個月冇跑過，所以唔俾自己跑太多，只跑18分鐘，但速度幾快的，唔好心急跑太多。最緊要是開始返跑步。結果跑17:16就攰了，我趕住去攞中藥同返屋企洗頭沖涼，吹吹吓頭就返到了。

以朗同姐姐返屋企好似好開心，同姐姐有講有笑，之前打俾媽咪問以朗點，佢話以朗冇扭，冇公公的情況下好跟姐姐，姐姐餵飯食好多。HAHA，見我唔到其實冇嘢，咁即係我間中遲返一日都得啦。所以我決定每個星期都搵一日去跑步，再加埋星期五跑，希望可以跑兩日。

昨天本來都想跑，因為好清涼，專登唔除CON，諗住跑完最多沖多次涼。點知以朗又玩唔瞓，成十一點九先瞓，嬲死我，忍唔住鬧佢，不過之後又好後悔，因為諗吓佢仲會同我瞓多幾多年？其實冇同佢一齊瞓而俾姐姐同佢瞓已經錯過了許多，之前乜都交俾姐姐已經錯過了以朗成長好多事，難得以朗想我陪，以朗眼中只有媽咪的日子唔會好長，長大了唔會記得自己曾經只有媽咪的日子，想到呢度我次次都偷偷掉眼淚，打BLOG呢一刻都不例外，佢唔瞓咪唔瞓囉，唔應該勁鬧佢。如果唔係自己想跑步就唔會咁心急要佢瞓囉。

宜家希望轉成黃昏跑，重新執過啲時間令湊仔運動BALANCE就完美了。






我其實宜家更加珍惜同以朗一起的時間，好愛好愛以朗，以朗黏媽媽，其實媽媽也很黏以朗。

20180601 - (ಠ_ಠ) 天氣好熱都要跑

6月1日星期五
五月下旬天氣得很，真的熱到難以忍受，熱到冇朋友但都要跑跑跑。
因為要減肥，好像進入了平台期，做同等的運動唔識瘦，減少運動就重，好難搞，再加上有啲將運動變成習慣，唔跑身痕。
近來星期六會同熊人一起跑，熱熱的天氣跑得慢。又跑唔夠5K。慢咗好多因為夜晚都28度，好熱，熱對我來說係最大的敵人。唔夠耐力，唔係好跑到。6分鐘1K，好有挫敗感。

 

另一日更熱，歐聯之前跑跑，真係好努力跑，但因為速度頗快，跑4K都莫氣。4K後要行而唔係跑，所以有暫停時間，真係好失望，點都跑唔到5K，雖然時間上可以30MINS 5K，但紀錄上只有4.63K，而且自己真係唔夠氣跑，好攰呀，真係好失望。

雖然係咁，依然無阻我跑跑跑的決心，WEEKDAY都會跑3K左右，有一晚30度，冇跑，另一晚29.7度，去跑，落到樓下好想縮返屋企嘆冷氣。29.7度同30度只是數字上之分別，根本跑起上嚟都係熱到死，18分鐘3.13K，真係慢，但算啦，熱到咁，跑3K都係死頂，完全冇力跑，熱死人，真係肯跑都偷笑。另一個大敵係樓下好多曱甴，好大隻，一路跑一路避一路驚，唉。唔鍾意跑樓下，但近近地跑吓唔想搞到太夜沖涼呀。





6月 1日 星期五，

見涼返少少，27.5度，唔知幾時開始俾酷熱天氣TRAIN到覺得27.5度係叫做涼。

落長廊跑竟然覺得舒服，平時呢啲溫度已屌哂鬼啦，宜家覺得好跑呀，真有病。

一低兩度即刻又可以30MINS內5K，原來我冇退步，而係天氣真係太太太熱啦。

我要KEEP住跑，捱得過夏天，我相信今個秋冬一定大有進步呢。

20180430 - ♣♧三四月跑跑♧♣

三月底開始懶跑步，因為復活節假期，之後又去旅行，之前說好的一星期10K呢？

點解會跑得咁差呢，因為天氣開始熱，我耐力唔夠。

三月底，easter前都仲可以，因天氣唔算熱，而且盡量一星期跑10K，有操開，仲可以，成績不俗。唔算快，但跑得長。

原本復活節假期想跑一次，點知M到跑唔到，之後就去了五天旅行，去完旅行好攰，攰到冇哂力，係日日都好想瞓嗰隻，但都諗住勤力跑樓下，點知跑完就大件事，已經只跑4.5k，但跑完之後瞓唔著，其實已經唔止一次跑完之後瞓唔到覺，但今次因爲去完旅行之後特攰，再瞓唔到真係死人。

咁星期三跑完之後就打算星期五又跑，當晚天氣好熱，開始入夏，晚上都25度，慘啦，熱到死之外可能前幾日瞓唔到本身冇乜氣力，跑幾跑就熱到冇氣力，停咗幾十次先跑到5公里，成績雖然仲好似幾快，但我一唔跑就按停，當然唔慢啦，跑完呢次之後真係冇哂信心，原來一入夏就大跌。


跑完一次係咁停之後又成個星期先跑，點知狀態又可以呢，幾快啊，冇停到，不過當日天氣又涼返少少，冇咁熱，但比起之前冬天時跑少了5分鐘，草草跑夠5公里就收檔，天氣熱好難頂呀，唔知點先可以提升返呢。

4月27日星期五本來想跑，點知扭到條腳筋，休了一日始終想跑，同熊一起跑，點知我原來宜家已超越了熊人，除了比之前速度快了之後，長度亦不俗，熊人跑了三公里都要抖一抖，我就為了熊人也慢下來，其實另一原因是天氣好熱25/6度，熱到我都想慢下來。所以31.44才5公里，成績是近來最差的一次，不過其實比好多人好，我呢幾個月的努力是沒有白費的。


最後是51前自己跑，當日好熱，熱到開冷氣，耐力不夠，慢慢，但都可以30分5公里，宜家入夏成績會下降，要操返密啲，希望可以提升返。宜家跑完唔會腳痛，因為肌肉是有的，只是太熱成日好似抖唔到氣，而且跑過了5公里之後真係唔多夠氣。近來見自己唔太肥又怕跑完睡不著，而且有時又落雨，一星期只跑一次咋，要努力跑返多啲啦。

20180315 - ♨♨努力跑♨♨

3月15日星期四

3月是一個好月份，因為竟然可以一星期跑兩天。
宜家希望自己可以一星期跑到10K
3月2日星期五，
終於30分鐘跑到5K，對女仔嚟講算不俗，好多都係6分幾鐘1K，我希望跑多啲，可以慢慢加長時間同增加距離，之前夏天同熊人跑得多，都跑到半小時5K，但宜家我覺得好辛苦呢，即係話宜家狀態未係最好囉，仲可以上。
當日天氣廿度，要著背心了。

3月7日星期三，
M尾段，又冇雨，再跑。
今次輕鬆5K，一樣30MINS，但5.17K，而且每公里不用6分鐘。
好大的進步。但跑完瞓唔到。
天氣稍涼，18-19度，但都全身濕透，其實除了跑步的卡路里之外，仲要行300級樓梯先返到屋企，跑步當日一定係IN TAKE細過OUT TAKE。


3月9 日星期五，
又跑，得11.1度落街跑，一邊出汗對手一邊覺得冰冷赤赤凍。
著住羽絨落街，最後只剩吓短袖衫。
每公里比上次慢，但跑多了少少，希望一星期跑兩次，逢星期五要跑多啲。


3月12日星期一
放假同BB interview，5點鐘同BB姐姐過婆婆家，落樓下跑。近近地跑半小時，竟然跑到6K，5分幾鐘1K，好快呢，因為樓下路只係直路來回，比較均速，會耐跑一點。

當日食好多嘢，減到452卡個心先舒服啲。


3月15日星期四，
HEA跑3K之後去媽咪度飲頭痛藥。
跑3-4K就近近地，一星期跑兩次3-4K +一次5-6K。
或者兩次5K，由於試過跑完睡不著，所以如果唔係星期五跑就只跑4K。


如果下雨就只可以跳鄭多燕了．
鄭多燕跳33分鐘唔及跑20分鐘出咁，因為想早少少沖涼瞓覺。
宜家希望可以十點半開始運動，十一點左右沖涼，十一點半沖完，
十二點半就睡覺。

雖然磅數沒有下降，體脂仍是22%，但我希望最少唔好增磅啦。

20180226 - ◇◆狗年第二跑◆◇

2月26日星期一
今日巴士有新班次呢，我坐早班7:30 回到家，結果咩都早哂，早食飯，早回家，玩多了，又早點睇YOUTUBE同食奶奶，22:35搞掂BB，今日本來要去飲金銀花，但我同媽咪講跑完先飲。

今日天氣唔錯，16.6度，風幾大而且夠乾，要抓緊冬天的尾巴跑多兩次，一踏入春天，雨紛紛，想跑都冇得跑架啦。

不過宜家一個人跑其實要踏出家門一刻要有無比的勇氣同決心，邊個唔想坐吓休息吓？想跑得開心啲，唔想跑樓下咁悶同車爭路，都係去長廊跑，宜家有IPHONE一齊跑，想知自己跑幾耐同埋想KEEP 住速度。

大約都係30MINS 5K。今次又唔夠5K，但都好攰吓，好差，因為要趕住返媽媽度飲金銀花。冇跑遠啲先調頭。
KEEP住呢個速度跑，希望慢慢加到6K。