20190918 - 結婚五周年@嵐石 Ocean Rock Seafood and Tapas

2019年9 月18日
無寫BLOG一段時間，有十個月冇寫，再寫返係因為呢篇......

今日係結婚5周年，今年唔訂蛋糕，因為唔想訂美心或東海堂。熊人今個月唔做包月，所以有啲時間同我食飯，今日撇下BB，得我哋兩口子，有想過去葵芳食，但我其實唔想坐黨鐵。所以當熊人再提議赤柱都好開心，不過赤柱貴貴呢，宜家有小朋友之後真係好少食貴嘢了。

揸車入去就方便，平日晚上係好少人。好清靜，今年春天同以朗一家三口嚟過一次，2017年星期六放工冇帶BB又嚟過一次，次次嚟都好開心，可能始終好遠路，少嚟，而且又係我哋第一日拍拖去的地方，嚟到都係好開心，間GOD係近年先開，赤柱廣場的燈籠應該係因為中秋節吧，

仲記得差不多8年前嚟Seafront食seafood platter，大家都有點腼腆，感覺好似唔係好耐的事。呵呵，其實今年12月就8周年了，7年之癢話過就過，宜家仲有個就快三歲的小人仔。

13年生日嚟呢度食西班牙嘢，宜家轉咗餐廳都係西班牙菜。
好彩今日唔太熱，想坐OUTDOOR，睇住海景都值回票價。平日人很少，得4-5枱客。

點了飲品，熊人的是冇酒精，我杯cocktail有tequila, rum等，顏色係綠色似漱口水，不過冇MINT，而且係好甜，都幾好飲。

食物就點了魷魚，好似同我咃去英國食的唔同，整法係沙律咁，都OK，好腍，以前去英國吃的有海水鹹味，唔同食法。

另一個係菠菜卷，好好食，即刻整，好鬆脆的酥皮，牛油味好香又唔會有酥味，好食。

主菜係西班牙海鮮飯，即叫即整，有四隻好大隻的帶子，四隻蝦，也有青口等，炒飯融入了海鮮的精華，好味，不過我哋覺得有樣不足就係唔知點解冇西班牙腸？

我哋食食吓聽到有一下爆炸聲，好驚，好大聲，嚇到附近啲雀仔都飛走哂，原來不遠處有BBQ餐廳爆炸，消防好快就救熄了。食完飯差不多九點，想去McCafe/ 星巴克飲咖啡，點知剛剛關門，唯有去7-11買支茶飲吓，發現自己冇八達通，再喺海邊行一陣點知忽然落好大雨，好彩我有遮，架車都泊得好近，由於好似倒水咁大雨，只好敗走，揸車返公司拎一拎八達通，好彩真係喺公司，如果唔係熊叫我請佢飲茶我都唔知自己漏咗喺公司，第二朝返工冇八達通就麻煩了。雖然又落雨又漏八達通，但都幾開心的一日，終於似返以前拍拖的日子。

返家問吓BB有冇燒，點知BB忽然醒了，要我抱同埋攬住，雖然搞了差不多一粒鐘先瞓，但可以見佢一面同佢瞓都好呀。

20190901 - ☹婆婆再見了☹

9月1日星期日

星期五細舅父打電話來說婆婆情況好差，因為肺部感染了葡萄金黃菌。

其實至今年年初跌倒了，唔行得要做手術之後身體都弱咗好多，唔係好有記性，唔行得，入了老人院，好慘，見佢老咗好多，都好擔心，原本想叫媽咪中秋🥮探吓婆婆，點知收到電話話情況嚴重，都大概估到未必過到大節。

星期六我同阿嫂媽咪都去睇婆婆，當日精神一點，但其實係要靠呼吸機，不能進食，只掉營養奶，又講唔到嘢，好心酸，媽咪同細舅父，阿姨都話佢好過星期五，但其實佢眼皮都不能合上，連瞓覺都唔肯定有冇瞓到，真係替佢辛苦。

到了星期日凌晨，收到電話，哥哥同爸爸俊廷都去見最後一面，我都有去，其實仲可以加大氧氣俾佢吊多幾日命，但大家都知作辛苦，只是續命，所以醫護說吊完一包強心針之後唔會再吊大家都冇異議。

大家幫婆婆頌經，梳頭，好平和，婆婆一生湊過好又多孫，係冇湊我，但其實有恩於我，我出痲疹入了法國醫院，出院冇錢找數都係佢找數，一年班第一次去海洋公園都係婆婆請客，當日有細舅父婆婆等，合照不多，婆婆一生人都好辛苦，冇享福，最大打擊是五年前舅父先行一步，白頭人送黑頭人，自此以後，婆婆好唔開心，好彩佢最錫個內孫好錫佢，請咗個姐姐照顧佢，也算是苦中一點甜。

婆婆最後在九月一日中午離開，享年87歲，希望來生有緣再見，今世辛苦勞碌了一世人，來生要好好享福呀。

九月總是令人傷感的月份，每年9月都會有離別，五年前舅父離世我也一直放不低，未能見他最後一面始終是我的遺憾。今日婆婆走了，婆婆舅父有在彩虹橋上再聚嗎？

20181122 - ❁夾紙紙❁

11月22日星期四

練小手肌有好多種方法，學校有練習係揸紙球，以朗都好喜歡玩，玩完揸紙球，啲紙球仲有其他用途，仲可以用啲玩具醫生套裝夾夾紙球，佢好有興趣夾紙球，由於手仔未靈活，所以初初開始唔係好夾到，間中夾到時係非常之開心架，夾紙球唔係學校要球做，但我自己做步，相信用吓較剪用吓夾都可以練到手仔啲力，練到手仔靈活啲。小手肌好，第日先可以寫字架。

20181121 - ☎中環聖誕報置巡禮☎

11月21日星期三

又到聖誕，又到聖誕♪♬♩♫，香港天氣一年比一年熱，但聖誕氣氛唔會因為天氣熱熱而減少，各中商場的聖誕報置反而一年比一年早，有啲十一月中已經有聖誕報置，而中環各大商場就十一月下旬都陸續出爐大。

LANDMARK將於星期六開幕，好似麻麻地，不過好多好多汽球，有人應該好喜歡。

以朱古力為題的中環置地廣場將帶你走進搞怪得意的可可怪獸朱古力國度，繽紛多彩的糖果散佈在可可森林各處，朱古力河流翻騰滔滔不絕，還有70隻可可怪獸周圍走，包你拍照拍到不願走！大家可以觀賞每30分鐘的朱古力工廠音樂燈光匯演之餘，到中庭購買一系列可愛聖誕商品，包括可可怪獸毛公仔、手提袋、鑰匙扣等。





商場與商場之間都有朱古力裝飾架，不過唔俾返工經過都未必會特登去影。

另一個商場IFC ，FC與美國聖誕老人學院「Northern Lights Santa Academy」合作，在商場中庭建造一所「Santa Academy」聖誕老人學院！在溫暖的北歐木屋裏，學院分為「聖誕郵局」、「禮物工場」等六個區域，各位學員能透過互動裝置一嚐當聖誕老人的滋味！

成個AREA係北歐木屋裏，好清新，可以坐吓，寫寫聖誕卡，跟佢指示玩完啲負遊戲，收集齊六個電子印章就可以攞到POSTCARD，其實張POSTCARD係張貼紙，仲可以印到自己同屋企人個名架。








有幾間小屋，小朋友可以走嚟走去，幾好玩架。

20181118 - ◆◇大埔海濱公園◇◆

11月18日星期日

今日又打算去大埔海濱公園玩玩。但之前發生了一段小插曲，朝早以朗想搞罐奶粉，我同佢講唔好搞，今晚開奶粉時我同你一齊開，佢好似好乖咁放喺枱面走咗去。

過一兩個鐘後，熊人落街攞車，我就準備同以朗著鞋，執好個袋出門口，見有兩隻杯未洗，就順手洗埋，洗洗吓聽到有啲怪聲，即刻出嚟睇吓，見到奶粉蓋開咗，啲奶粉一地都係，佢有一執頭髮變成白色，衫褲都有奶粉。

真係火起，大鬧咗一餐仲打咗一下，仲話想趕佢走，

嬲咗幾分鐘，係時候要收拾殘局，我搵塊布抹咗個地先，廢事印到成地都係，入廁所濕水抹地，出嚟見以朗喺度抹地，唔知好嬲定好笑，點嬲都好，仲要同佢洗頭沖涼，差不多著好衫，熊人回來幫手收拾埋啲手尾出發。

唔知係唔係俾我鬧得緊要，佢當日唔係好黐我，同埋玩得開心但都好靜。宜家玩泡泡，要自己整泡泡，但又拎得唔好，倒瀉了好多。



今日見好多人走入去結婚的場地，以朗又走入去，同佢影心心。

自己行上南瓜車坐，不過原來係唔入得，可能要租場地先入得。好彩同佢影咗幾張相，







佢見人哋小朋友玩又想玩，不過佢唔識點同人玩，下次我哋帶個足球俾佢踢先，今日我哋食麵包咋，仲買咗啲魚蛋食，以朗當然有食，胃口都可以。
今日好多時間同熊人玩，佢即刻多啲叫DADDY，haha，要多啲玩同親子呢。

20181117 - ◐ MOSTown ◑

11月17日星期六

今早去interview K1，昨天家長日已經知佢唔出聲冇咩希望，但估唔到今日表現差成咁，乜都唔做，乜都唔理人，唔講嘢就預咗，但佢直情玩都唔玩，一次表現差過一次，懷疑佢係唔係有自閉症。好嬲好嬲，忍唔住鬧咗佢一大餐。
不過宜家諗返我唔應該咁鬧佢，好多嘢迫唔嚟，以朗只得兩歲，兩歲至三歲發展有快有慢，我要俾啲耐性，俾啲信心佢先得，佢最愛自己個媽咪，最信任我，偏偏我又成日忍唔住鬧佢，以朗好可憐，對唔住呢，我要好好檢討一下自己，要好好提升自己的EQ。

INTERVIEW完之後同以朗去海港食飯，再去新港城行，冇入去萬花筒，不過佢周圍走都好開心了。呢個好似噴雪咁，好多小朋友都好鍾意睇。

DISCO自己跳舞。






大酒杯，幾時先好似酒杯咁高大呢？






其實以朗都好乖，一邊玩一邊等熊人去買餸，佢跑嚟跑去好開心，到差不多時間玩完叫佢走，佢好聽話，冇扭計，雖然間中都會情緒失控，但其實唔多，可能幾個月先會一次失控，因為太眼瞓，所以我哋成日帶佢去街食玩都無問題。

至於讀書方面，有時唔可以強求，唔係個個可以迫到，又或者可能佢宜家比較慢，但三歲左右會追到，如果讀書迫唔到都冇法，最緊要乖乖地身體健康就夠了。

想佢開口講嘢，我相信首先自己努力同佢講多啲，佢吸收了，聽多了，俾信心，俾愛佢就自然會講，媽咪會俾多啲心機同愛對你的，

對不起，我愛你。

20181116 - •●❤家長日❤●•

11月16日星期五

今日以朗下午家長日，我請了一天假陪佢，都好忙架，因為佢返學之後鼻水長流，啲收鼻水藥都差不多食哂，所以趁我喺度都帶佢睇睇醫生，由於佢唔跟姐姐，我一個帶就算，佢係鼻敏感，唔係傷風，所以下星期可以照打流感針，佢喺醫務所係咁玩玩具，搞到我好擔心佢會惹到其他病，佢乜玩具都玩。煮飯仔，戴眼鏡。 雖然診所唔多人，不過有啲係勁病，真係越玩越擔心，玩完之後唯有同佢噴手手囉。



之後帶佢去新港城三角形隧道內將折射出不同的繽紛萬花筒圖案，玩呢個萬花筒有多面鏡，有唔同圖案，限時5分鐘，人唔多，但等一個都要5分鐘架，好彩以朗大咗都知道要排隊要等待。

入到去好HYPER 自己跳舞。同仲有一分鐘時，同佢講就夠鐘要走，佢好似識聽咁，自己唔玩行出嚟，好感動呢，忽然好似聽話了。









聖誕節裝飾四周圍開始了，又係集郵時間，周圍去玩周圍去影相。MOSTown以浪漫香檳金色作主要色調。兩隻大酒杯，大禮物盒，disco，唔係好聖誕feel，但幾特別。

行埋去隔離的馬鞍山廣場KEROPPI，好鍾意呀，可惜以朗四圍走，冇企定定影相，同埋有個入去睇嘢的房維修，冇得同佢入去玩。



玩完一陣回家叫以朗食午飯，嫲嫲都到了探以朗，我同熊人就去意樂食TEA，再去GF。
老師話以朗返學唔肯講嘢，唔跟老師讀字，不過都唔會走出座位，除了初初唔明白指令唔識做之外，一般都聽話，有時會自己唱歌，但唔會好百厭，算坐得定，聽到好擔心以朗唔識講嘢跟唔上進度。我要努力啲同佢講多啲嘢，希望GF唔好踢佢出校啦。

20181115 - ヾ(◍'౪`◍)ﾉﾞ玩水水

11月13日至15日星期二至星期四

今日中午去了玩具反斗城睇玩具，宜家涼咗會去嗰邊睇吓嘢，見到just like home系列8折，我好鍾意just like home啲煮飯仔系列，好正好好玩，靚又安全，係貴啲，但以朗仲細，玩具係要安全啲好。
有兩套玩具都想買，一係afternoon tea set，好多蛋糕，不過怕熊人覺得好女仔，另一套就係洗碗玩具，可以用真水玩，

我跑完步返嚟開光，初初唔知點解冇水，以為壞了，之後又得，入電加水之後真係好sink盤咁水喉有水出，sink盤會去水，近日以朗成日想洗手手玩水，呢個真係有水的玩具佢玩得好開心。

不過佢成日玩到周圍都濕哂，要準備一條大毛巾俾佢一邊玩一邊抹，第一日冇準備大毛巾真係抹到我high high。佢真係好喜歡玩水，可以玩足個幾鐘。







玩係好好玩，不過善口工作都一樣攞你仲三千，玩完要倒哂啲水，抹乾哂啲杯碟，由於唔想佢朝早冇人睇住自己玩水，所以次次玩完都要收埋佢喺櫃，要抹到乾透先可以收埋，所以玩一次真係要抹抹抹，抹餐死，最慘嚟緊天氣凍，唔可以濕住水玩啦。冇得玩啦。早知早啲買呢套玩具啦。