20170629 - ♨️♨️行行行+夜跑♨️♨️

6月29日星期四

 

最近成日上香討，雖然好憎香討越來越多五毛，但如果睇日本旅遊係好多資訊的，近來睇瘦身版，希望可以亙相鼓勵，好多人唔運動就行行行，每日行10000步或以上，但宜家日日趕住湊BB點會可以有咁多時間行一萬步，我宜家唯有盡人事，食完飯唔好瞓晏覺，盡量出去行，呢幾日唔落雨就玩酷熱天氣警告，我每日都行去IFC附近再過啲去埋碼頭之前影下個摩天輪，行都想搵啲嘢做，行去呢邊對我嚟講算遠架，連續幾日都有影相，

呢幾日越來越好天，即係熱到high high。

晚上又繼續跑，真係好鬼熱，但一星期跑兩次5K好過以前一星期先跑一次8K，

雖然磅數都仲係差不多，但其實我只想減6磅，如果一個月減1磅-1.5磅，4-5個月都OK啦，

只希望年底減到114就OK了。同埋希望冬天可以跑長啲。努力呀。

20170627 - ♪♬♩♫扭抱+夜晚跑♪♬♩♫

6月27日星期二

 

宜家BB好識得扭抱，每晚我返到婆婆屋企，明明玩得好開心都好，一聽到我把聲或者見到我就喊喊豬，要我抱抱，我返到屋企要洗手先，佢就喊喊，望住我喊好似好痛苦咁，有時又谷到面都紅哂，狀甚痛苦，好可憐咁，點知一抱起就收聲。即係扭抱豬。

 

喊就喊啦，點解要塞隻手入口？

宜家湊好BB豬覺仔交俾姐姐就去跑吓，不過落雨就冇得跑，跑多啲少啲背痛胃痛，最希望當然是減肥，不過要衝破120以下係好困難的事，如果一個星期跑三日係有啲可能，不過談何容易，一次大約跑4.5-5.5K，原來都只係消耗300-400卡路里，要減肥好難。

宜家由後山跑落近富安前上天橋過恆安再去海旁，海旁中段約1.5K回來，再行2,3百級樓梯，如果一星期三天係好OK的。不過試過一星期三日都減唔到磅，難道我要接受從此變肥婆嗎？

20170626 - ♥紅桑子朱古力蛋糕♥

6月26日星期一

琴日熊人整咗啲新款蛋糕，唔係平日整開的CHEESE CAKE，

呢個係紅桑子朱古力蛋糕，啲紅桑子我係喺中環間OLIVERS 買，貴貴的超市，不過有時會有平平的特價水果，即係差不多到期就會平啲，原本$33.9一盒的減價為19蚊，琴日見到好似17蚊一盒，今日已經貴咗兩蚊了。

朱古力蛋糕勁濃朱古力味，好濃厚，好RICH，應該是MUD CAKE咁的質地，有啲似BROWNIE咁RICH，不過因為太RICH唔可以一次過食太多，一次只可以食細細件，由於蛋糕面舖上唔少的紅桑子，所以係好搶眼好靚。

 

同場上演BB扭計，而家一悶一眼瞓就扭計了。成日好似想喊咁，但冇眼淚架，如果你肯俾星星餅佢食，佢仲會笑呢。

第一次坐喺廚房度，未坐過，新鮮感，又好開心。

20170625 - ♪♬♩♫買玩具♪♬♩♫

6月25日星期日

App- Patternator 整的相，係父母先會將自己仔女啲相變成wallpaper 。

宜家每次影相，寶寶都要搶手機。

今日幫寶寶穿上了日本買的浴衣，不過寶寶好似麻麻地，可能質料有少少硬。由於佢唔識自己企，所以好難影到佢著起浴衣個樣。

之後帶bb去觀塘玩具開倉。但有啲失望，可能因為星期六都俾人買咗好多、冇乜嘢揀，不過之後順便去咗工廈買尿片，平十幾蚊一包，回程寶寶眼瞓又悶，喺架巴士度扭計，仲整跌了星星餅。宜家冇車要坐巴士對寶寶耐性是一大挑戰，最慘佢唔肯瞓就自然覺得坐車悶棍啦。次次坐到尾都扭計😢

20170624 - ☆★肥小龍+行沙田+深夜跑★☆

6月24日星期六

宜家星期六唔駛返工都好開心，一瞓醒就見到BB豬，今日同佢換件李小龍套裝，係姑姐送的。BB著得好好笑，不過佢未識自己企或者行，所以好難成套衫咁影。

中午落大雨，本來想去觀塘的玩具開倉買玩具俾寶寶豬，因太大雨，所以冇出，結果就去咗沙田行一陣，去到都三點左右，就去食EURO GOGO食PIZZA~

剛剛係TEA TIME，食薯蓉，

一個百寶PIZZA，其實可選兩份唔同，每份半個，但都係百寶最好味。

BB坐BB車喺窗口，都好開心，我哋俾少少薯蓉佢食，佢即刻好開心。

 

之後路過SNOOPY公園門口影張相當到此一遊，HAHA，點知BB痾咗屎，同佢去育嬰室，新城市個育嬰室好大，有三間房而且都幾大幾舒服，換片的地方都幾好，有暖暖濕紙巾供應，原本想暗BB豬覺仔，暗著咗但太心急出嚟，結果即醒，由於冇瞓，回程就扭眼瞓了。

 

晚上湊BB豬咗之後又去跑步。終於唔落雨就要跑步了。

跑得好慢咁，不過呢啲天時跑幾跑都出哂汗了。

20170623 - ☺️☺️同表哥玩☺️☺️

6月23日星期五

 

呢個星期開始，BB日日都去表哥屋企玩，工人姐姐除了BB瞓覺，日日都帶BB去玩，雖然未識行未識講嘢。但佢對表哥好有興趣，表哥平日冇人同佢玩，都好想同BB玩玩。

表哥屋企好多玩具，BB玩厭哂屋企啲玩具，可以去玩唔同玩具，應該好開心。

呢架麵包超人車，表弟又有份玩，

其實兩個一齊玩真係幾開心，表哥覺得自己大個咗，好叻，表弟唔識嘢，可以教佢，令佢多咗份責任感。而表弟BB就可以喺表哥身上學到好多嘢，佢見到表哥識行識走，佢當然有動力想學。原本唔喜歡爬，因為表哥用玩具引佢而爬快咗好多。希望因為咁佢可以快啲識講嘢啦。

希望佢哋可以兩兄弟咁一起成長，相親相愛，識得讓對方，唔好咁自私。

成長有伴，可以互相學習，互相影響，呢個就係我想搬返馬鞍山住的原因。

20170621 -☼ ☼霸氣玩☼☼

6月21日星期三

 

BB好好動。喜歡企，爬，鍾意圍住個廳張梳化，地櫃，窗口等扶住行一周。想爬上高的地方，比較少坐定定玩，

我哋個廳有張PLAYMAT係同佢玩，有好多玩具咁，攞啲玩具敲打，敲櫃面。佢成日將啲玩具由櫃頂掉在地上。

呢啲兜兜都好有用，可以教佢將啲兜放入去，佢都聽架。

每次玩都好肉緊。仲有啲唔睇的雜誌俾佢摧殘，有時會撕爛，有時會整到好亂，搣開哂咁。

總之佢要將啲嘢飛哂落地。次次玩到咁上下，個場就會變成咁，霸氣十足。

20170620 - ♪♬♩♫賣樓♪♬♩♫

6月20日星期二

今日終於簽咗約賣樓，不過因為田土應紀錄係6月27日，所以今日簽臨約但date 628，宜家個個話樓價高，但我都要換樓，真係好煩惱，因為唔租出去就一定要賣，否則頂唔住又租又供樓。

賣完幾時買返真係冇人知。宜家怕上唔返車，或者只買到兩房。究竟可以點真係好煩惱，做人有時好辛苦，辛苦搵錢辛苦儲都係得個桔。

呢層樓持貨三年，冇住過，但呢三年發生好多事，結婚生小朋友都喺三年發生。

見到個買家好笑，上車，借九成。借成三百萬。同我借差不多。

20170618 - ※※父親節※※

6月18日星期日

今日父親節，無地方去，同bb去新港城攞蛋糕，之後熊人煮飯食。

夜啲叫哂三個父親（熊人，爸爸，哥哥）切父親節蛋糕，個蛋糕好靚，好似酒樽咁幾特別架。熊人作為新任父親第一次過父親節。

蛋糕係朱古力蛋糕，味道比較甜，個賣相好過味道。

哥哥一家人帶咗表哥來，表哥見張bb床又要企上去玩。兩個玩得好開心啊。

寶寶之前唔可以一邊拿住床欄左，一邊拿著床欄右。宜家可以了。

不過玩玩吓兩個好似大冬瓜咗跌咗喺度。

20170616 - ♣♧睇醫生♧♣

6月16日星期五

星期日寶寶有啲鼻水，有幾聲咳，同佢聞氣，滴鼻好似好啲。

星期一都係穩陣起見，預咗醫生叫婆婆姐姐帶去睇醫生，食咗一兩次藥就冇咩事。

點知星期三又開始咳，再食藥都唔好，聽到咳得比較深，所以就星期五自己請日假帶寶寶去睇醫生，朝早好大雨，好彩出門口時停雨了。

一早寶寶食粥仔個樣。

好彩寶寶唔算好嚴重，係落咗氣管，但轉過啲藥應該ok，雖然上次俾七日藥，但轉咗症都要再睇，如果等到聽日先睇，寶寶就辛苦多一日了。

帶咗寶寶睇醫生後，我叫姐姐去搞搞個電話。我就同寶寶兩個人周圍行，好喜歡兩母子拍拖呢。行店子影相，買桂花粉俾寶寶，重就重啲，少少辛苦。但都好開心。

20170615 - ☞好鍾意個鼓☜

6月15日星期四

BB有唔少玩具，但啲舊嘅玩具已經唔多玩，有啲以為佢鍾意玩嘅又冇興趣，有電有唱歌嘅都好少玩，

反而呢個看似好old school的鼓佢又鍾意，次次喺佢附近拎住都吸引到佢架，拎住都好開心。其實個鼓係中資銀行annual dinner 啲禮物，好國產，但阿囝鍾意。哈

所以有時玩具唔一定要貴嘢，可能多啲玩具任佢玩仲開心。

20170614 - ☎️☎️爸爸不在家☎️☎️

6月14日星期三

熊人由星期一朝早五點就出門口去大陸，要星期三晚先返，機又delay ， 星期三都十點先返，擔心死隻樹懶。

怕熊人掛住寶寶，所以勁影相。

爸爸不在家，唯有我一個湊寶寶，每晚8:35 左右由婆婆家返到屋企，換好衫就同寶寶玩一小時左右，佢開始悶就俾餅餅佢食，食完飲水水又玩一陣，到十點幾就沖奶飲。之後再豬覺仔。

影多啲相俾熊人6.13

星期一晚寶寶未夠十點就嘈，見到姐姐就喊，搞到姐姐九點幾接走豬覺仔，激死，不過佢三點幾嘈，嚇到佢第二問唔敢咁快同佢瞓。

一見到個餅盒就好開心。

6.14 朝早自己整早餐。

6.14 寶寶相。

20170612 - 打風✿｡◕‿◕｡✿

6月12日星期一

今日無端端打風。尋日一號風球，仲話冇咩機會三號，點知今早一瞓醒就幼稚園停課，中午三號，冇咩心機做嘢。因為個風似吹得幾正，唔八號都會大風雨。喺公司食吓同事手信咁。

個風越吹越正，下午兩點左右都估到會掛八。估唔到五點廿分先掛，完全冇諗過六月就打得成風。

諗住坐980x唔太塞，但都係塞，同埋開得晏，結果早一粒鍾放工就坐返兩個鐘車，同平日一樣時間返屋企。

今日熊人唔喺屋企，自己照顧寶寶。結婚之後未試過熊人打風唔係一齊，掛坐熊人。

BB又點會識咩打風，一樣玩得好開心。

又爬又企咁，最衰黃昏前掛咗八號，多數捱到聽日，聽日都要返架啦，如果唔駛返工同BB玩玩係幾開心的事。