╭∩╮_(︶︿︶)_╭∩╮中環皇上皇--把火

 

年初四,幾個老闆都不約而同放假,老闆請食嘅開年飯就順廷到年初五,

咁我哋一班小薯連同IT班同事都照去食開年飯啦~個幾星期前訂咗好近嘅皇上皇,一向都知呢間麻麻,不過貪佢近,訂一點,十二點十到,不過呢間嘢訂位其實係冇意思嘅,訂幾點都冇用,  因為都係要等,先到先等,訂枱號碼先後係冇意思架,邊個去到先,就邊個號碼排先,非常混亂,到中後段連個知客都唔見埋,訂咗枱最後都要一點四先入座,有啲枱喺正門口,真係唔知點食,入座只係俾張枱你咋,冇凳架,十六個人分兩張枱入座,其中一張枱得兩張凳,六個人企哂喺度,逐張凳搵俾你,最後先坐低嘅同事係差不多一點九,有啲直情要坐茶几.....離譜嘅係,冇碗,因為洗唔切,冇匙羹,用碟食..... 兩點三打算埋單時先送上最後兩碟點心,我哋大約點半落單架....呢間酒樓真係不知謂,食到把幾兩把火,blacklist佢之餘,直情要公告天下,大家千祈唔好去呢間衰嘢,把鬼!!!!!!

 

 

最後我哋返到公司叫蛋tart王嘅下午茶好過~雙皮奶蛋tart + 奶茶~

•●❀奇幻逆緣❀●•

奇幻逆緣 The Curious Case of Benjamin Button

人的一生應該是從嬰兒時代到小孩子，再到年青人，中年人，老人，如果人的一生是從老年人開始，倒轉地變得越來越年青，是不是一件好事？

片長166分鐘，以劇情為主，由型男Brad Pitt主演，本人不是其粉絲，會比較客觀，覺得他其實演得不太好，只是故事可取，當中亦有不少精警對白，
　
例如老太太所說的：我們注定會失去所愛的人，否則你不會明白他們對你多重要～

❤花市@維園❤

一月廿一日(星期三)
放咗工同朋友去行花市，始終都係鍾意行維園呢，不過估到星期五一定會好多人，所以都係早行早著，七點由公司出發，先去茶餐廳食飯然後就去維園啦，

其實我係廿幾歲之後先第一次去維園行花市，因為以前阿爸阿媽都唔肯去咁迫嘅地方，再加上以前係九龍人，宜家係新界人，真係唔會特登去香港行花市，不過工作之後基本上都成日去香港返工，所以會趁放工去行～

由於早行，所以都唔係太多人，今年啲人話雞蛋仔好特別，不過我就覺得唔係啲咩咁靚，基本上對吹氣嘅嘢都冇興趣，因為只要一離開維園就會覺得買呢啲嘢好阻訂，好笨七，對公仔又係冇興趣，因為我已經有成百仔隻公仔，唔想再買，

當日好多都係公仔同吹氣，比較吸引嘅係一個牛角包頸枕，坐長途機一流，如果我肯定自己三個月內會坐長途機就會買囉，但我鬼知自己會幾時去長途旅行喎～唔買！

鴨仔浴帽好得意，尤其是個御用model（鴨仔）演繹得非常好，不過廿蚊一頂浴帽就．．．．算啦！影咗當買咗～

結果都買咗少少嘢嘅，就係呢啲好似路牌咁，但又幾有意義，主要又夠平，大牌十蚊個，細牌仔十蚊一袋，有三至四個不等～個concept幾好吖！當日好多人買呢！

行完買完叫做完成咗今年要做嘅嘢，十點左右走時，開始好多人，不過我哋先去starbucks飲杯嘢先返歸呢～

而星期五就返而冇出街，不過為慶祝一連五日嘅長假期開始，再加上當日好肚餓，買咗兩件Cheese Cake，今次係McCafe出品，Blueberry幾好食，而另一個芒果夏威夷果仁嘅就夠特別，下次會再幫趁的！

不過就肥爆啦～好快會肥婆啦～
在此預祝各卜友農曆新年快樂，牛年行大運呀！

•●✿ 福到滿城賀金牛--Plaza Inn ✿●•

上一篇嘅八福遊園匯其實未show 哂啲圖，不過因為最多廿張相就冇辦法啦！我覺得最靚係中間個桃花，

仲有豐盛有啲好似米咁都幾得意～ 

當日我好快手巡咗一圈，搵哂啲圖案，又問佢哋攞咗好多張遊戲卡，係咁就儲咗幾套貼紙，啲貼紙好靚，仲有新年貼紙都好靚，見人就問人攞，可惜仍然爭Pluto，下次再去搵先！ 

去Plaza Inn食午餐，午餐$175一個人，最少要兩個起，全年通行證八折都可以接受，原本想試農曆新年餐，不過要$3XX一個人（好似 $375）又係最少兩個起，嘩！我覺得貴得好離譜，兩個人要成七佰幾八佰蚊，食自助餐咩，最終都唔食新年餐，有錢都唔係咁嘥法囉～

今次坐中間啲位，係咁影會變色嘅燈籠，幾靚， 

個餐幾多嘢食，乳豬，油雞拼海哲（好味）， 

有榆耳鮮蟹肉羹（一般），

西蘭花彩椒帶子（得）， 

竹笙露荀蝦餃（好味之餘剩係個賣相都已經殺死人啦），

極品廚師炒飯（好食）， 

最好食係個甜品米奇凍糕(咖啡糕)，超好食， 

之後又周圍行吓，影吓shop啲公仔，當然唔少得牛年嘅公仔，仲有其他嘅擺設，幾靚呀， 

上一篇排隊影chip n dale時影吓個廚窗啲精品，竟然俾我發現有暇疵，

就係攞禮物個Minnie耳朵係崩咗架．．．估唔到呀～

最後仲同高飛佢哋合照，因為佢哋套衫同上年唔同架， 

走嘅時候，當然影埋歡迎同再見嘅牌啦～ 

•●✿ 福到滿城賀金牛 ✿●•

2009年未去過迪迪尼，趁開始有農曆新年活動就去玩啦．

今次算係好早入到去，十二點就到啦！因為我住喺鬼地方，要好耐車程，十二點都算係有史以來咁早啦，一去到就見到好多農曆年嘅裝飾，將啲五代同堂整成個燈籠咁幾得意，

最開心係見到公仔有換衫，Donald Daisy件新衫好清新， 

其實應該年年換衫啦，聖誕節唔換新衫真係離哂譜！ 

除咁同公仔影相之外，當然唔少得去米奇大屋同主人家影相啦，米奇福氣大宅 其實間大屋已經係上年嘢，有幾個月冇咗，聖誕節重新包裝過出嚟，所以已經冇咩驚喜，只係由聖誕裝飾變成賀年裝飾，糕點， 

最靚係呢兩條魚， 

其餘分別唔大，可能因為咁冇咩人排隊，一點左右，直情冇人排隊，係三四點之後先開始有人排隊，

不過點都要入去行一陣，因為可以同主人家米奇影相，真係好醒目呀，新衫呀，

不過一ｐａｉｒ影相要去番幻想世界，而且係上年衫，失望！ 

另外有個節目係龍騰鼓舞迎福陣，啲衫好靚，喺美國小鎮大街上表演好似出巡咁，由於唔係一個ｓｈｏｗ　咁距離個台好遠，所以可以影得好開心，好ｃｌｏｓｅ，可惜我去到時，打頭陣嘅美妮已經出咗場，所以影唔得靚，美妮係跳扇子舞架！ 

米奇就好好多啦， 

最鍾意呢張

高飛扮財神就好好笑啦～ 

今次有個遊戲卡係儲貼紙--八福遊園匯，不過要搵齊八種福氣及所屬嘅圖案再配對先得，拿拿淋搵哂，順便影相都ｏｋ架！