╭。☼台南之旅 (5) - 墾丁遇見彩虹☼。╮

第三天會去高雄，未去過沙灘行過，所以決定先去沙灘行完先坐車去高雄，當日一早個天灰灰，我又灰埋一份，九點前已經食完早餐，仲落咗幾滴雨，慘！民宿嘅人帶我哋左穿右插，好快就到海灘，近民宿個海灘唔靚，不過可以沿海一路行，甚至可以去到夏都酒店個海灘，一路行一路開始好天，我又影影影，之後忽然間天陰又落雨，又近海，好鬼大風，搵地方避雨，一路避雨一路又影相，不過幾雜亂唔係好影到，其實果度啲沙唔夠幼，直情係好粗吓，好彩啲水好綠，再加上有陽光都幾靚！

  不過真係不斷時晴時雨，民宿啲人話墾丁啲雨是一陣陣的，果然真係，一時刮起風連埋砂打埋嚟好痛，不過呢個時候俾我見到彩虹呀．．．咁大個人第一次見到彩虹，好細個時阿媽話見過，但我冇印象，好開心呀，又影影影啦，不過隨住太陽嘅出現，彩虹好快就消散了，之不過好快又落雨，仲幾大呢，呢個時候又有彩虹，就係咁，我竟然一係唔見彩虹，一係就一日見兩次，其實之前卜友都喺墾丁見過彩虹，再加上當地人話墾丁啲雨是一陣陣的，所以我相信，墾丁係成日可以見到彩虹呢～所以大家有機會去墾丁就留意吓啦！冇咩樓，唔係咁易見彩虹好完整架～

不過最後都冇行去夏都酒店，因為好遠而且有啲地方會好濕，而且約好十點半要上車去高雄啦～

墾丁，再見啦～