在高雄最後一天也就是在台灣的最後一天了，可惜當日天色奇差，又係灰灰暗暗
，個天好似白色咁，無癮
，一早先去舊振南買手信，台南冇咩出名手信，呢間係出名買手信，亦非常之貴
，但點都要買俾公司同事同朋友，其實我係好討厭買手信呢個環節，每次都好似交差咁，我自己本身好少會去旅行時購物，不過偏偏要買手信，儘管我唔喜歡，不過我係公司嘅小薯，幾無奈都要隨波逐流．
當日去咗打狗英國領事館即前是英國領事館，打狗＝高雄，打貓＝嘉義，是譯音來的，打狗英國領事館位於西子灣，不過唔係太近捷運站，上半山之餘，仲要行成百級樓梯架，
由於地勢較高，所以可以望到旗津燈塔同西子灣嘅日落，當日天陰陰，又唔會留到日落，所以個所謂海景只係樣衰同灰暗咋，
行完百級樓梯見到間廟，覺得好奇怪，點解係間廟嚟架，原來再望右手面就係打狗英國領事館，好傳統嘅歐陸色建築，加紅磚，有啲似淡水紅毛城，直情好似～
早餐都未食，所以一去到就食，有間café叫舌尖舞芭蕾舞團咖啡，可以對住海景，Tea time 時更可以食英式傳統的high tea set，我叫咗蝦卷，芝士蛋糕同埋一杯Latte，環境好似唔錯，可惜當時環境其實係非常差，好多蚊滋仔飛來飛去，由於好細隻
，唔留心都唔覺，不過眼利嘅我（其實係怕昆蟲嘅我），啲嘢食放喺枱時，就即刻有好多嘢飛來飛去，真係想嘔
，搞到極速食完就拎起杯嘢起身啦！
嗰度因為係歐陸式建築，拱門位，長廊少不免，所以係一個拍照的好地方，唔少人仲影人像呢，
少不免有英國旗，Paddington係英國熊，所以佢寧舍開心，
有紅色的英國郵筒，好多年冇喺香港見過了，個郵筒係真係可以用嚟寄信架，我當日買咗個木牌寄空郵返香港都係放在呢個信箱就可以了，只需要NT80連郵費，留個紀念都幾抵！
沒有留言:
張貼留言