20181031 - ლ(❛◡❛✿)ლ 食糖+ Gap 大減價

10月31日 星期三

話說阿仔上星期五學校生日同萬聖節party交換咗好多糖返嚟，咁我俾咗其中一粒雪糕形嘅糖俾佢食，佢食得好開心津津有味，好似食緊雪糕咁，好開心，好滿足咁樣。尤其是坐喺沙化度嘆雪糕，慢慢食慢慢嘆。

笑得好燦爛，好似食緊啲咩好好食咁。

見佢好似食得咁開心，咁好食﹛咁我叫佢請我食吓。食咗一啖真心覺得

好

難

食
啲質地好似食發泡膠咁，好膠，得個甜字，點解咁難食佢都食得咁開心呢？可能因為佢本身喜歡食，又似食雪糕，細細件又可以自己拎住食。


另外我平日LUNCH HOUR 好喜歡周圍去睇吓嘢，最喜愛睇MOTHER CARE 啲衫仔，不過今年貴咗好多，唔係好買得落手，男仔衫又唔易搵。表哥又冇乜俾衫，所以都要自己買吓，

今日行去GAP見到減價LAST DAY，買5件65折，特價都可以照65折，結果買了5件，
有恤衫

有厚厚外套，可拆件背心著。

裡面有少少毛毛的JACKET。

冷衫。

TEE


5件夾埋只是562，初初以為要600幾，因為差不多件件都有減價再65折好平呢，冷衫折咗幾十蚊件，雖然香港唔凍，可能只係著一兩次，但都要買定到凍起上來時可以有衫著。
早知平成咁，買多件令啲的型仔褸啦。

20181029 - ◇◆星期日hea + 杯緣子◆◇

10月28日星期日

昨天去完長洲玩足一日，大家都要休息吓，而且以朗仲有鼻水，所以今日喺馬鞍山HEA 同休息一下好了，今日買咗姐姐假，但佢唔知，佢以為我哋叫佢唔好出去，佢真係留喺屋企大模斯樣講電話，我知佢係誤會了。

我哋同佢去超市買完嘢就去意樂食嘢，不過以朗好似食得唔多，唔知係病病冇胃口定點，次次未病好就出街玩會搞到好耐先好，但佢又唔可以唔出街玩WOR~

你睇鹹蛋超人。

原本熊人想早點開工，點知佢琴晚揸車到半夜爆呔，今日想早都唔得，
去新港城行一陣，買咗幾件東海堂蛋糕

最好食都係呢件。好多層次，有芝麻有綠茶有MOUSSE 有啫喱。好食，今日BB都好攰，唔知係未病好定係佢昨天太攰了，同佢4點幾未夠5點瞓晏覺。我就開始睇跳躍生命線。點知睇到咁上下佢又醒了，要陪佢瞓。最後都陪佢瞓到夠鐘都冇跑步。

去超市買嘢見到LIPTON限量版奶茶套裝，十杯奶茶點6包金裝奶茶+2包港式奶茶+2包台式凍頂烏龍奶茶)一盒40多元，送Line friends 杯緣子一個。屈熊人送一盒俾我，

勁好彩係熊大杯緣子，而啲奶茶都幾好飲，幾夠味，再加少少花奶仲正，有時冇買咖啡可飲呢個。

20181027 - •●❀長洲遊❀●•

10月27日星期六

今日同哥哥一家去長洲，因為大姪仔去長洲比賽風帆，我哋一起去打氣，不過因為熊人遲起身，去到佢已經比賽完畢。

上次到長洲是三年前的事，剛剛失去了，打算到長洲走走，散散心，三年後再來已多了一個兩歲的以朗，真係好開心，呢幾年冇白過呢，有以朗的日子過得好甜呀。

今日以朗第一次坐船，佢有暈車浪嘔的經驗，我好驚佢坐船會嘔，不過好彩快船多人一早滿了，坐慢船，坐了樓上豪華坐，走出去甲板上睇風景，兩個小朋友勁開心。

乜都玩一餐，50分鐘的船程好快就過了。

落船食茶餐廳，幾好食，之後喺街再食大魚蛋同蝦丸，原來以朗好喜歡食魚蛋，佢上船之前已經食了4粒魚蛋，一買大魚蛋佢就眼都唔眨了，由於買了兩串，哥哥又只吃一粒，JAYDEN又唔吃，結果以朗食咗成粒大魚蛋，人仔細細點食咁大粒魚蛋，離譜了，上船前有俾燒賣佢唔食，蝦丸佢可能食少少，一見到大魚蛋就只吃魚蛋，佢宜家開始挑食，唔似以前咩都食，開始有自己的喜好了。

長洲有好多大魚蛋，但最好食係甘永泰大魚旦，魚蛋大大粒$20，炸起熱辣辣，脹卜卜，金黃色咁。一口咬下去十分爽口彈牙，有魚鮮味，唔駛點醬汁都好好食。

之後去了長洲唯一的酒店找大表哥，呢兩隻嘢二話不說又跳床了。







之後就去了樓下的公園玩，玩到好開心，因為呢度唔係太多人，唔駛點排隊，任走任玩，人少啲希望少啲菌，始終小朋友都係喜歡去公園玩，可以跑跑跳跳，以朗細個豬，仲可以訓練上落樓梯，攀爬之類的體適能。









玩完一輪就上酒店飲啖水休息吓，之後食晚飯，啲嘢麻麻地，但好平，由於之後趕船，連糯米糍都冇買到，其實仲想食沙冰同埋薯片架，不過真係玩唔到咁多嘢，或者遲啲再嚟過啦。
以朗冇瞓晏覺，以為上到船七點幾會瞓啦，又係唔瞓，唔捨得瞓，仲爬來爬去，最後差不多落船先瞓，抱落船抱上車，抱死我了。

20181026 - (◍•ᴗ•◍)2018 Wine and Dine

10月26日星期五

今日本身係去Wine & Dine Festival 2018 ，由於夜晚不返家吃會見不到以朗，咁見自己有假剩，今日佢又生日會放3:30pm ，所以放假湊佢返學放學一天，同埋順便去醫務所攞藥，由於怕以朗見到我唔俾我出門口，所以一早起身過媽咪度再去攞藥，之後等以朗乖乖食完飯先回家湊佢返學，由於今日係生日會加halloween party，不用著校服。

唔知係唔係見到我想玩，又唔著校服，佢唔知自己係要返學，搞到擾攘了一陣先出到門口，我同佢行返學校條路一路同佢講返學校啦，開生日會，食蛋糕，諗住佢知道自己要返學應該開心豬，因為平日佢好喜歡返學，一見到套校服就唔理熊人。但當日佢係完全唔肯落地，仲要一路行越攬越實，去到到學校仲死攬住唔放，企喺課室前好耐都唔肯落地，後來有個老師捉走佢，叫我交俾佢，以朗就大喊，唉，睇嚟我真係唔可以湊返學了。佢喜歡返學，但應該更喜歡媽咪。

湊放學唔知邊個班房，3:30到咗等到啲人走哂3:40先接到佢，見bb呆豬，好似好可憐，一見到我就攬實哂，原本好可愛帶住生日環即是除低，不過老師話佢唔冇喊，今日唔嘈，之後同佢去STARBUCKS坐一陣，睇吓今日有咩食物拎返屋企，好多食物呢，又有生日玩具，之後同佢買麵包，佢好開心，又唔想返屋企，好彩見到公公就一起坐小巴。返屋企之後想叫佢沖完涼過媽咪度，佢可能扭眼瞓，死要攬住我，唔肯跟姐姐走，佢可能想我同佢瞓晏覺呢。最後熊人做壞人抱走佢，佢喊得好慘呢。好彩去到公公度見到表哥就唔喊了。
原本好開心的湊仔返學放學，最後都係搞到以朗喊哂，其實我係唔係應該消失呢？

之後就坐681去Wine & Dine，今年同哥哥一起去，都係食subway打底先，之後一開始又係拎哂啲贈品。 hahah~
free ice cream~，也有卡樂b的豆豆，齋雞粒等

free cheese~ 也有免費水。

有哥哥喺度佢會食牛，我吃了春脾，好食。

平平的20元試食價的36個月火腿。

差不多次次都吃的豬手，好食。

好唔抵食，好細件又鹹鹹的鰻魚。

仲有要支持一下八度酒店好抵食40元而且大件高質素的芒果拿破崙。

 今年都係200元8個token，一開始飲乾冰出煙酒影吓相，之後後排隊買嘢食時，DL APP 試了一小杯free白酒，因為天氣好熱，所以好想飲嘢，於是用3 Token買了一大杯的BAILEY 咖啡酒，哥哥也用3 token買了柚子味的，可以share飲都OK，

之後哥哥佢哋買海鮮食排了一小時，由於我今日都走了幾次去新港城，熊人又唔夠瞓，我哋去了B區坐地坐，又買多杯GIN TONIC飲，今次冇點試酒，而係用2-3個token換一杯飲品。

最後佢哋買海鮮等了一粒鐘，等到發哂脾四，我哋俾埋兩個Token 佢哋用6 tokens 買4款手工啤盡快走人，原本打算行多陣買支甜酒/冰酒飲，因有人發爛渣走都走唔切，嘥氣了。

20181025 - ☹跑+ 病了☹

10月25日星期四

天氣涼了不少，跑步都跑得開心好多，宜家湊以朗越來越夜，夜晚跑步已變成夢想，與其每個星期五六都只有假希望去跑，何不的起心肝每星期搵日飯前跑，如果唔搵一日飯前跑，我估我呢世都冇得跑。

星期一其實係每星期最辛苦的一日，但我仍然想堅持每星期一跑，事實上跑完之後你係會精神好多架。跑步係一樣簡單又唔駛錢又唔駛用腦的運動，如果連呢種運動都唔肯做，就真係咩都唔駛做。

天氣涼了24-25度好好跑。30分鐘完成5K，沒有問題，因為頭15分鐘跑得快，但之後就莫氣，半停半行半跑，宜家一星期跑一日咁大把，以我的能力想操返起真的冇乜可能，想好似之前30分鐘唔停跑5K嗎，要一星期兩天，咁我究竟點先可以跑到兩日呢？宜家馮以朗黐身成咁，要等下年轉到上午校先有機會再跑多啲了。

今個星期第一日返三個鐘，第一日返屋企就有鼻水了，唉，人哋話N班係成日人病，以朗玩了三星期都冇病，以為自己咁好彩，不過我的人生又點會同幸運兩個字扯上關係？第三個星期開始病，冇燒就叫佢照返學了，都叫精神。

精神到食完藥之後都唔眼瞓，宜家放四點半，每日五點前回家沖涼，食少少麵包，六點前到婆婆家瞓覺，只瞓半小時都夠精神頂到12點先瞓。唉，即係我宜家12點之後先得閒啲。
佢唔瞓都算，仲要爬落床坐喺地下玩被，就快被激死了。宜家我對以朗瞓覺的時間又退守一步，11:15-->11:30-->12:00
12點前瞓就算了。自己的囝有無窮精力，見到我又唔捨得瞓，日日鬧又鬧唔到咁多，只好自我調節心態吧。

20181021 - ☼☀馬鞍山公園玩 ☀☼

10月21日星期日

近日秋高氣爽，最好出去玩吓，行山，由於熊星期六晚都開工，我一早同以朗睇一陣電視就過媽咪度坐一陣先返屋企，煮麵俾以朗食，唔食，激死。
本想去到次大埔海濱公園，不過要揸車去都幾煩，咁不如近近地去返馬鞍山公園啦，今日都幾曬幾熱，帶了飛機去同佢玩，點知玩唔名一陣俾佢見到遊樂場，其實唔係好想佢玩呢啲，因為公園好多人，呢輪開學好多人病，公園人多好易中招。但既然佢都見到，唔玩唔得啦。

好多人帶咗啲嘢吹泡泡，一見到泡泡就好開心。

有人俾一支泡泡我哋玩。

之後自己又玩呢個，其實呢個欄杆唔係要嚟玩架，師兄。不過佢玩又有個哥哥同佢一齊呢。

玩滑梯，半年前IN完幼稚園都仲玩BB滑梯，宜家唔玩個BB滑梯了，要玩啲大少少的滑梯，嗰啲一級高好多，以朗剛剛兩歲其實有啲吃力架，不過就係咁不停爬上爬落就可以同佢放到電呢。又上落滑梯，又吊喺欄杆上，可能因為玩到攰攰，叫佢走都冇投訴呢。
玩完坐埋一邊冇太陽曬到唔太熱，食少少麵包就返屋企沖涼瞓覺。


由於今日朝早中午都冇乜食嘢，夜晚去到公公度好肯食飯，食得幾快。終於有個星期日唔駛勞氣佢食飯了。