20181006 - ☆★甜品@A1bakery★☆

10月6日星期六

嫲嫲今日探以朗，我哋今晚唔煮冇飯食，所以趁嫲嫲喺度，我同熊人落街買吓餸。近來以朗識食蛋糕，我因為咁都得閒買啲蛋糕可以一起吃，不過宜家啲蛋糕越來越貴，動輒三四十蚊件，東海堂係平啲但件裝蛋糕就普通囉，

好彩仲有A1，A1麵包好味，但比較貴，反而蛋糕比較平，大約30-32元一個，而且佢係高級版Chateraise同集團，所以唔太差。
 

呢兩個布甸杯係山竹襲港前買的，16蚊一個，OK啦，北海道牛乳杯OK，但不及東海堂的好似食緊雙皮奶咁，冇咁濃就冇咁漏，而抹茶杯又係唔太濃的抹茶味，係有抹茶味，但又係唔夠香濃，唔係太差，因為價錢只是16元，東海堂就24，所以味道只有2/3。東海堂的布甸杯係好好味，好重味，但就好漏。

今個星期六就買了兩件CAKE，一件朱古力蛋糕，另一件抹茶千層蛋糕，朱古力蛋糕好RICH，濃濃的朱古力MOUSSE夾住朱古力海綿蛋糕，香濃而唔會好漏，熊對呢件蛋糕讚不絕口，可以再食都得。


另一件係抹茶味千層蛋糕，口感方面唔夠軟熟，亦好乾，並無想像中一層creamy一層厚身CREAM既感覺，味道方面都真係幾淡，並無濃濃既抹茶味，雖然比起東海堂大件好多，不過味道同質感就冇得比啦，東記係好軟好滑，好似食CREAM咁，呢件真係冇咩抹茶味，而且不夠多CREAM，所以呢件蛋糕試一次就夠了。