20171031 - ♫♬自家製餃子+萬勝節跑♫♬

10月31日星期二

以朗祝大家萬聖節快樂，

嫂嫂用APP幫BB整到咁。

BB宜家越來越叻自己不飯食啦。

我作為佢個媽咪，咩都教佢唔到。

 

近來唔瞓晏覺啦，只係朝早行完返來大約12點瞓兩小時左右，之後捱到晚上，所以食完晚飯佢已經好攰了。多數唔肯行返屋企。

昨天知道爸爸今天不回來吃，就叫媽咪弄餃子，好似好耐冇食餃子了。自家製的好好味，皮薄又滑滑的，菜又多，味道較淡唔會好濃味，我食咗廿幾隻，原來想叫姐姐煮麵加少少餃子🥟俾以朗吃，點知佢又一早嗌肚餓，結果表哥俾咗啲飯佢食。

食咁多唔怕，因為晚上湊以朗瞓咗又去跑，因為佢攰，一入房就瞓覺。我哋趁天氣涼要跑多啲，36分6公里？因為有一公里是落斜，跑跑吓有幾滴雨，原本想休息下結果冇休息，直接跑回來，一口氣跑咁多係冇乜試過，所以好攰。但都只減到466卡咋。

20171028-9 - ★☆星期六日食玩★☆

10月29日星期日

星期六是重陽節，是公眾假期，也是工人姐姐的假期，見bb開始大個，食嘢方便了。就試吓唔買工人姐姐假，自己湊足兩日，睇吓點。

宜家開始訓練bb自己食嘢，呢個碗係有吸盤可吸住個highchair面，可以方便bb自己食。

宜家食完早餐之後唔會咁早瞓，

會同佢落街，叫以朗拎住架學行車行吓，之後去公園玩一陣，佢好喜歡瀡滑梯，玩完一次又一次，叫佢拎住架車行就麻麻地，有時行一陣就扭抱，有時又係要衝入百佳揀橙。

星期六中午，熊人約咗佢個客去旺角傾偈，我就同bb豬，初初唔肯瞓，要用孭帶先肯瞓覺，由點鬆玩到點九至瞓，但瞓咗成兩個鐘，起身就同👶🏽食午餐，朝早食字母粉，中午又唔願食，我食緊薯蓉佢又食，食完洗完嘢都四點幾，我自己單拖帶佢落街。原本想去草地。但我行落街已經好熱，於是去千色店玩具部涼一陣冷氣。見好多歲幾小朋友都部落地玩啲玩具，我又放佢落地，點知好臭，佢💩💩。即刻去返老遠的換片間換片，一放低就扭，又要出動星星餅，手忙腳亂一點，都ok，只係我都滿頭大汗，所以同以朗去香港地食吓嘢算了。

食米線，食食吓都嘈。激死，自己玩殘自己。

好彩熊人都回程中，到餐廳會合再買唐記返家。

星期日又帶佢行啦，點知。

唔肯行

要我抱，玩一陣瀡滑梯就肯行一陣。又用星星餅引都唔多想行，行完又返去瞓成兩個鐘，之後食完bb的lunch我哋去市中心買海鮮，冇咩想買，於是都係去耀安買。

 

買完拎啲海鮮俾哥哥佢哋，佢好開心留喺度玩，唔駛理我哋，我哋都休息一陣。

 

今日打邊邊，bb依咗唔少嘢，有烏冬，豆腐，蝦，西洋菜，粟米，魚，仲有第一次食牛肉，宜家bb真係咩都食。

星期六晚趁bb豬了就油了Jackson storm黑旋風，我好怕用黑色，為了表哥要求先畫，用了蠟筆，易上色，但好污糟。

20171027 - ♥2017 Wine and Dine Festival♥

10月27日星期五。

 

今日熊不用夾BAND，又知道有2017 Wine and Dine Festival，而且明天兩日公眾假期冇姐姐，BB日日對住我，所以今日就放棄BB同熊人兩個出去拍吓拖，

放工SHARP走，行到過碼頭都6:35。

 

熊買咗SUBWAY SHARE 食先，可以先飲酒，三十元入場費，今次又買200元8個TOKEN的，有一百元5個TOKEN，只係小小膠杯，酒的份量好少，如果200元8個TOKEN係酒杯，酒的份量會多好多。

由於熊唔飲得，我哋多數飲有果味的甜酒，所以八個TOKEN可飲八款，都夠架。

今次有啲COUPON送，可以去有嘢食啲COUNTER排隊攞小食。

有雪糕，

芝士粒。樽裝水，卡樂B避風塘蝦條，龍島朱古力，杏仁等等。

送的芝士粒幾好食。

排隊拎雪糕時，見到有買豬手同埋PIZZA/鵝肝等，

我哋50蚊買了一份豬手，好好食。

之後開始試酒，行到去西班牙區買了TAPAS係COLD CUT(50元)，都幾好食，不過太少，底下有麵包粒墊底。

之後又去八度酒店買了芒果拿破崙。40元一件，啲custard幾正，酥皮鬆脆。

之後我哋去咗小舞台那邊坐下，有本地樂隊表演，天氣好，好乾爽少少涼意，飲酒聽歌，sanrio都有counter，影咗張相，同埋買咗兩支甜酒，一支係菠蘿味，另一支係荔枝半甜酒。

最後仲有一個token剩就試呢個要排長龍的出煙甜酒，雖然是藍色，但不是薄荷或漱口水味，而是椰子菠蘿味。

大約九時半左右走了，之後去ifc坐681返家，今日都幾開心呀。

20171019 - 26 - ♪♬♩♫行街街♪♬♩♫

10月19日星期四

以朗已經一歲仔，但佢好唔鍾意行，好似冇咩興趣行路，好多歲左右已經開始識行，佢呢?扶住嘢都仲可以，但一放手就唔肯行，即時坐喺地下，之後就爬。

我個工人姐姐宜家開始食完早飯就會帶埋架學行車同BB喺屋企樓下個空地度行行。

有時過去婆婆家都帶個去俾佢行吓，希望佢感覺吓行路，佢初初都好開心。

可能因為行路同坐車，抱住唔同FEEL，佢行得好小心架，佢似係謹慎型，成日怕趺。

由於有個BB推住架學行車行行吓，都幾得意，喺屋苑附近行都幾吸晴架。

點知到星期日，我同熊人帶以朗落街行，佢唔想行，仲嗚嗚嗚扮喊，無眼淚嗰隻，要我抱，熊人話BB只要見到我就乜都唔肯做，唔肯行，扭計，如是者星期一，二都唔多想行，不過工人姐姐比較強硬，照帶以朗落街行行。

 

到咗今日即係10月26日星期四

工人姐姐影咗啲相同片返嚟，佢肯行，仲快咗好多，行行仲會笑，識推住架車轉彎。

行路姿勢好咗好多。

仲有遇到另一個小朋友想同BB玩，好熟手咁玩佢架學行車。

 

佢宜家推住行已經好好，唔知佢幾時先會夠擔放手呢。

20171026 -♪♬♩♫ 曇花一現♪♬♩♫

10月26 日星期四

 

今日食完飯由婆婆家行返去屋企時，見到啲人喺我新屋樓下的花糟位起哄，好多人圍住，我以為有人捉精靈啦，原來唔係，係有人影花。

啲人話有曇花，其實我冇見過曇花，只不過成日聽人講成語「曇花一現」，當然知道係時間短，比較難得，所以我又影吓，

 

街坊話最難得係好少兩棵曇花一齊開，咁都俾我見到，係唔係會有好運呀？

第二朝街傳來的照片---原本令令的花已凋謝。

「曇花一現」指美好的事物出現的時間很短。曇花是仙人掌科植物，原產於南非、墨西哥等地區，是屬於熱帶沙漠裡的旱生性植物，花朵非常美麗，但是開花時間卻隻有3至4小時，可謂十分之短。
人們用曇花一現來比喻美好事物不持久。曇花一般在夏季開花，開花的時間在晚上20-24點左右，花期很短，盛開為白色 ，因為曇花多在夜間開花，且開花的時間不長，隨後便逐漸枯萎凋謝，所以人們要看到它開花，似乎不太容易。

20171025 - ※爭嘢玩※

10月25日星期三

以朗宜家未識行，又未識講嘢。

不過有兩樣嘢佢係最叻，

 

1)食，大家個個都知道佢係家中的小吃貨，仲俾婆婆叫佢係食物焚化爐。

BB只要一見人食嘢就會爬過去扭食，有時啲嘢太熱要等陣，佢就會喊住要。

總之宜家唔可以喺佢面前食啲唔健康零食，否則佢又喊住要。

 

2)玩，繼九月底發覺佢自己識揀玩具之後，宜家我喺屋企搵嘢執嘢佢都會爬過來八卦一番，只要見到彩色嘢又覺得有佢份，有時拎啲圖書返屋企，俾佢見到又要睇，

拎牙刷出來，因為好彩色，又想玩。

 

今日嫂嫂(舅母)買咗個南瓜籃返家，係俾表哥學校萬聖節用。BB一見到個南瓜就好開心，以為又有佢份╮(￣▽￣)╭，佢好開心，雖然唔識啲糖係食得，但就當係自己啲玩具咁。

係咁玩，

表哥當然都想玩啦，而且佢哋兩個近來最興玩「瘦田冇人耕，耕開有人爭」。只要有人抱其中一個，另一個即刻又痴埋去扭抱。邊個玩玩具，另一個又要玩。

表弟見玩開個南瓜俾人搶了，佢又走埋去要攞，喊豬仔。個樣好肉酸。

最後又要婆婆出動麵包俾佢食先平息到件事。

食完飯之後表哥又玩個南瓜，BB當然想玩啦，但個南瓜係表哥架，咁我唯有拎今日喺永安買的吸盤新碗俾BB摸吓。點知表哥又走個來想攞佢個碗，仲係咁迫BB玩個南瓜，但BB已經唔玩南瓜啦。HAHA。

20171024 - ★☆盪韆鞦@馬鞍山公園★☆

10月24日星期二

熊人不用上班，見天氣不錯，以朗食完晏之後就帶他到公園玩。

市中心公園有好大片草地，可以俾佢喺草地碌，上一次去草地係一月份，當時只係三個幾月的BB，咩都唔識架，我哋想喺草地休息一下時佢就喺度扭眼瞓，結果又要抱又要氹，好快就要走人。

宜家佢已經一歲有多了，不過佢唔記得哂咩草地，起初都驚驚地，不過鋪咗地墊，又有熊人陪住都開心呀，如果BB識行就好，可以俾佢行吓草地唔怕跌。

 

其實鋪了地墊，應該帶埋少少食物有啲嘢餐FEEL，佢會開心啲。

BB之後見到雀仔好開心，啲雀仔行佢想跟住架，可惜佢自己唔識行。

之後熊人同BB玩盪韆鞦，佢初初都唔知做乜，冇乜表情，不過佢喜歡人肉機動遊戲又點會唔鍾意，呢款鞦韆俾BB玩好安全呢。星期一至五公園少人啲幾好，星期六日好多人，而且個個都大過BB，BB好難成日霸住玩得耐架。

20171023 - ✿Insomnia✿

10月23日星期一

今日同BUDDY 食LUNCH，臨急去了蘭桂芳的Insomnia食lunch，因為唔怕冇位，雖然好易有位，但唔代表唔好食。

於蘭桂芳斜路的Insomnia，夜晚係好熱鬧架，午時就唔多人，個個都坐高的BAR枱食LUNCH~

 

中環嚟講食個LUNCH 都只係一百左右而且質素不錯，值得推介，

冇LUNCH SET，要散點有PASTA/ SALAD/ 三文治等。但有免費DRINKS，例如檸茶之類，

因為我唔食牛，所以沒有點BURGER

點了海鮮意粉餅蕃茄醬，好入味。有青口，蝦，魷魚圈，唔錯。

呢一樣係雞三文治，呢個好好食，好大份，有薯條，啲薯條好好食，我好少食薯條都喜歡食。三文治好勁量，有菜，雞，火腿，蕃茄同埋蛋，其中蛋係成隻有蛋汁的，合我心意。

由於太大份，兩個人食完個包都食唔哂啲意粉，聽聞有ALL DAY BREAKFAST，下次再嚟食吓先。

 

 

另外補返星期日晚啲相。

熊整了OREO CHEESE CAKE，今次個蛋糕係朱古力，唔係成個CREAM CHEESE了，好食，呢排之所以瘦，係因為少了晚上甜品，如果有返甜品應該冇得瘦，事實上呢兩日又重返，嗚嗚嗚。

我想減返5磅呀。

另外由上星期開始整羊毛氈公仔，今次呢個係自己創作，因為唔想再買，又想用緊啲材料，怕自己唔用就會浪費哂啲嘢，自己創作就簡單啲，因為湊住以朗冇咩時間，只靠星期六早上BB瞓覺同埋平日夜晚BB瞓咗先有啲時間，我仲要抽時間去跑步呢。所以唔會買新材料，用哂啲舊材料先算。

熊人有俾意見我，例如頂帽底個邊要夠闊，有啲意見我先會整好啲。

同埋上年臨生前買的鬼鬼奸夫一起影相，先發覺我應該整奸夫的眼咀會得意啲。

20171021 - ♪♬♩♫金坊泰國美食♪♬♩♫

10月21日星期六，

 

想行吓AEON，但冇乜地方近我哋，反而黃埔有地鐵之後都算方便，於是第一次坐地鐵去黃埔行吓，熊人話黃埔外圍多嘢食，我初初只見到老茶。

 

去到民泰街就發現好多嘢食特別又唔貴，有CAFE，有日本嘢，有韓國嘢，有餃子。其中呢間金坊泰國美食有BB櫈，而且下午茶餐平平，三十幾蚊個咋。

於是入去食，由於以朗中間呢餐已戒奶，所以點了雞絲扎肉河粉俾佢。河粉比平時既粗同大條，好滑身，配料有通菜，芽菜，蘿蔔。湯底唔會好鹹，BB都可以吃。

熊人點了泰式燒豬頸肉配咖喱汁蒜蓉包 ，黃咖哩濃稠度適中，味道帶甜，唔會太辣又香，配蒜蓉包一起吃，好味! 蒜蓉多士外層塗滿了滿滿的牛油及蒜蓉，經烤焗後，外層香脆，但內層依然鬆軟。GOOD~可惜豬頸肉的份量卻少得可憐，唔夠喉呢。

仲點了一個SET係芒果糯米飯，白色的好甜好漏，不過三十幾蚊唔算貴，都可以。三個SET三杯飲品，BB有杯檸水呢，我就咸檸7，熊就青檸梳打。

之後行入黃埔AEON，以朗要換片，發現換片地方好多BB都細個以朗了。佢開始大個豬，玩具部竟然冇咩好買，想買衫，熊人又話BB有好多衫，咩都買唔到。我自己就買了一件格仔恤衫同BB的格仔衫母子裝。 XD

12蚊店有Halloween頭飾，同BB玩吓，開開心心，仲申請咗AEON卡，第日十二蚊店有平啲？禾輋有，可以去買吓嘢。

本身想睇傢俬，床櫃，但熊人好似麻麻地，唔多鍾意，仲未買主人櫃同床呢，好煩惱。

走時去超市買了樣餸，但唔好食，BB眼瞓又唔肯瞓，好彩有貼紙星星餅都頂咗好耐，頂到最尾先嘈嘈，近來冇唔舒服又大個咗之後，出街頂5-6小時都唔瞓覺啦。

今晚趁BB豬了就去跑步，見天氣涼咗要跑多少少，由屋企跑去利安再經雅典居跑出長廊到2KM回頭，應該都跑到5-6K，天氣涼了跑步好正，要跑長少少先得。希望跑密啲身體好啲。當然想減肥啦。同埋想減體脂。

20171020 -☎☎講電話☎☎

10月20日星期五

食午飯時間去昭隆街附近睇中醫，睇完第二日就攞藥，琴日攞完藥就去了GAP買咗兩件BB衫。

今日因為收據有問題又要去多一次，去完之後今次行利源東街見到有玩具店就去睇吓。

我睇吓睇吓又買到嘢，宜家自己唔買嘢都要買嘢俾個仔，

今次買個電話☎俾佢，因為呢排以朗見親我喺屋企打電話都要搞個家居室內電話，有幾次婆婆同佢講嘢，佢又好興奮，宜家成日都想爬去搞個電話。(-_-")

有色及此就買個電話俾佢，以朗唔喜歡一個冇得開關的玩具，所以買個VTECH嗰啲my first phone都冇用，肯定玩兩玩就厭，我買個電話係想佢模彷吓咋。

點知表哥見到係反斗車王電話又想要......

於是俾個新電話表哥，表弟玩表哥個舊電話。BB都識識地，知道係電話，會對住講嘢，但唔太識放在耳邊聽。

20171015 - ♥ 第一次用杯飲水/刷牙+8號風球♥

10月15日星期日

 

秋風起見以朗之前病好耐，好返了都想佢有多啲湯水，除了洋蔥水之外，仲會煲雪梨湯，因為秋天最好係食雪梨，但如果就咁俾雪梨佢食又怕涼，所以煲煲佢就可以唔怕涼。

我呢個小吃貨好喜歡食嘢，只要我哋喺餐枱附近坐低，佢就會留意我哋係唔係食嘢，一見人有食物就會9秒9 爬過來搶食。

佢係非常之喜歡飲湯，可以飲成個大人碗咁多，而且次次飲哂就喊豬。

所以我哋都放心整好多嘢食俾佢，因為佢好少唔食架。

 

飲雪梨湯飲到津津有味架。

今日又8號風球，星期日先八號波，我哋邊度都冇得去，由困馬鞍山，表哥都冇地方去，佢哋三點幾過來屋企玩，剛剛前幾天喺宜家買咗條隧道俾佢玩，有啲似PLAYROOM。

以朗唔多識玩，反而表哥就玩到好開心，加埋成百個波波，呢兩個小朋友玩得好開心。

表哥唔想返屋企呢。

最後表哥五點要返屋企，BB就瞓一陣，我同佢一齊瞓到成七點，之後食麵囉。咁又一日啦。

另外，以朗已經滿一歲，唔再係嬰兒了，係嬰幼兒，其實大約歲半至兩歲就開始戒用奶樽飲奶。

有啲人話用杯俾佢飲奶，但佢宜家係用緊飲管杯飲水，飲奶如果用飲管杯就唔多妥，因為啲奶如果績喺飲管好難洗好臭，所以我哋依家俾湯或者洋蔥水俾BB飲都係用飲管，好唔環保。

 

於是同佢試用杯飲水，佢因為見我哋成日用杯飲水，佢好有興趣，俾個玩具杯佢飲，佢都好似識用，於是俾佢試用杯飲啦，佢好開心，不過好易整瀉。

 

今日仲試同佢用牙刷擦牙，佢又鍾意啊，因為今日我喺屋企搵到啲親戚朋友送的0-3歲牙刷牙膏，佢見到彩色又以為係佢啲玩具，又想玩，到夜晚見到支牙刷就好開心囉。

開始刷牙好似更加大個仔啦

20171012 - ♥ 一歲針♥

10月12日星期四

原本同以朗約好10月6日去健康院打一歲針，點知佢十月頭有傷風咳唔好，問過醫生意見要好返哂先打針，咁我見佢星期一開始冇哂事好返哂，所以再打去健康院補約，好快有期，星期三打，即日有，但我唔得閒，就約了第二日下午，熊帶佢打。

打針之前在家食壽桃牌BB菠菜麵，開心豬。

 

去到健康院一見到好多人就好開心，成日想撩人玩。

又玩吓貼紙，成日想同人講嘢，一見到人飲奶奶就想飲，明明食咗麵先出門口，為食到不得了，真係失禮死人。

 

一歲的以朗識啲乜

1. 今日磅重係9.64KG，算好正常，冇度高，自己度大約77-78CM，
2. 唔識講嘢，但不停對住姑娘講BB玩。
3. 唔識行，但肯扶住嘢企同行都收貨。
4. 食嘢方面佢最叻，三奶二固，有時二奶三固，一歲之後要轉成三固二奶，由於佢身高體重都正常，姑娘都唔會點理佢食乜，要自己攞星星餅呢啲小測試當然冇問題。
5. 要開始用牙刷擦牙。
6. 近日成日都手指指。
7. 拍手/拜拜/HELLO動作都識做。
8. 識切切蛋糕。
9. 識疊一兩件積木。

BB宜家食嘢如下。
6:00                 200ML 奶
10:00-11:00    爛飯(1種肉，1 蔬果，1菜)
14:00-15:00    麵包+150ML (將會轉為麵/飯/通粉)
18:00              少少爛飯  (將轉為麵包/水果)
19:30              食大人飯  (由少量轉為一碗)
22:00              175-200ML 奶


今日原來打三針，
1)MMR麻疹、腮腺炎和德國麻疹混合疫苗（Measles, Mumps and Rubella）
2) 水痘
3) 肺炎13價
好似話MMR好勁，有機會引起自閉症，水痘針又可能會在5-12日先發燒同埋會出紅疹。

由於以朗由九月病到十月頭先病完，所以好擔心佢身體弱會高燒，但唔約打針又怕整整吓唔記得咁。好彩又好似冇乜嘢，其實只要佢健健康康我就開心啦。

20171011 - ♥ Euro gogo♥

10月11日星期三

同熊人去沙田宜家傢俬睇嘢，同埋睇吓燈飾咁，

於是兩口子就丟低BB去行吓街。

去睇嘢之前就食吓嘢，我哋去連城廣場的EuroGoGo 食嘢，今次有食好多嘢，點了一個平日少食的芝士茄汁海鮮意粉好足料， 有魷魚，龍利柳，蝦，帶子。酸酸既蕃茄汁好開胃，加埋一絲絲既芝士好滿足，闊條麵平日很少煮，比較特別。

必食的蜜糖雞翼。一客有五隻，雞翼嘅肉好滑，蜜糖味唔太甜，個面有少少香脆！正！

次次都食的半份百寶pizza，有幾款肉，同埋好多芝士，蕃茄，酸酸甜甜，PIZZA 薄薄脆卜卜45蚊半個已經算好抵喇！

另一個平日很少吃的牛油果PIZZA，我係牛油果控，之前食過麥當當的牛油果包，真係好難食呀，呢個只有牛油果同茄醬，好似比較寡。一般。

今日冇同BB吃飯，不過佢喺婆婆家都好興奮，一樣玩得好開心。

我哋睇咗啲燈同櫃，但都係未決定好。仲有啲精品都好吸引，想買啲飾物點綴吓屋企，但要搬咗先。而且筆直有限，唔可以亂洗呀。
想冬天擺張地氈喺屋企，又想買啲架呀，靚靚碗碟，花樽，水果盤咁。哈哈，搬咗先再睇。