20181007 - ♣♧香港公園+動植物公園♧♣

10月7日星期日

諗住同以朗睇雀，專登放假都出中環。坐681去到公園唔太耐，亦唔係太熱，有蝴蝶影，勁靚，冇帶大機，但可以好近影都唔錯，蝴蝶吸花蜜，停咗喺度好耐都唔郁，所以用手機都可以影得幾好呢。

想去觀鳥園，點知冇，要維修，直至2月1 日才重開，心諗，觀鳥園係年中無休，點會要CLOSE同維修咁慘，咁黑仔，原來因為山竹整冧咗棵樹，所以個鳥籠都爛了，

去唔到睇鳥就不如去溫室，都有啲嘢睇吓。

好多花花，最正係有冷氣，因為今日都幾熱同埋好曬，以朗都幾乖肯自己行樓梯，斜路，



溫室好多款植物，例如蘭花。另外有個位係仙人掌，嗰度會比較熱，但啲人仙人掌比較少見同埋好多好多鮮人掌，有啲可能要喺沙漠先見到。



由於冇鳥都冇咩睇，唯有轉場去動植物公園，佢以朗開始唔聽話，最慘同熊人鬥氣，唔俾佢抱，要我抱，由香港公園行去動植物公園都幾遠吓，仲要抱住佢，真係超辛苦。途中經過視覺藝術中心，入去睇一陣，其實想慢慢睇耐啲，但怕咗以朗搞搞震，只能快快睇睇，急急走人。

去到動植物公園見到噴水池好開心，想我抱佢想去睇，摸水水，唔抱佢又發爛渣，真激死人，最後同佢睇人吹泡泡，熊人去小食亭買了魚蛋食，再買了另類吹泡泡，以朗未見個呢隻吹波波，好有興趣。其實其他小朋友都好少見呢隻波波，個個都好好奇，想過嚟摸吓或攞個波。



由於今日天氣都幾熱，都有啲攰，所以坐喺度玩完波波就行返去長江中心食TEA，原本想去香港公園睇雀，冇，想去動植物公園睇雀？又冇，原本打算睇雀之行，只在香港公園睇到一兩隻咋，不過小朋友在戶外走走，見其他嘢，追泡泡，玩泡泡已經好開心啦。最後佢上車坐681回家都唔想瞓架，不過架車一開冇耐就頂唔住瞓了。

去到總站竟然又自己醒，今日熊不用返工，因為四星期做夠程數，所以回來馬鞍山街市買海鮮食，有想食好耐的青口，但係原來呢個SIZE係太大隻，好難煮得好食，好易煮到好UN架。熊人用三色椒同菜一起炒，好味。

仲有塊面咁大隻的蟹，88元斤，四隻TOTAL180元，但真係好好食，宜家啱時候好大隻好好肉呢。