20180604 - (･ิω･ิ)買平平泳衣Decathlon

6月4日星期一

今年未同以朗去游水，因為未有泳衣呢，而且我哋想揀星期一至五少人啲先去玩水，所以暫時未有下水禮。

呢排天氣好熱要買定泳衣，由於年紀尚少，盡可能包多啲肉，始終BB肌膚好幼嫩，泳池水怕會傷到佢，所以我都想買一件頭泳衣，由於冇表哥的泳衣，要自己買，好彩同同事傾開，佢介紹有間專賣平平的運動服，喺銅鑼灣，近皇室堡，我可以食飯時間去買，今日落過一陣雨冇平日咁熱，而過兩日預測會落大雨，所以趁今日去買會好啲。

兩歲以下選擇不多，女仔多款啲，呢款其實當女仔泳衣，不過藍色男仔都可以著，後面拉鍊，唔會難著。呢款最細係三歲，應該勉勉強強著到，最正係只售109，真係抵到爛，如果只買一條短褲只係幾十蚊咋。同Mother Care 及Marks and Spencer動輒二三百蚊件泳衣真係十分抵。我另外搭同事買環保游泳尿片只係幾十蚊，準備好哂俾以朗隨時去游水啦。




另外仲有好多運動用品都好平而且好齊全，如果需要買體育用品，大人細路都可以買到嘢架，有機會可以同熊人去行吓。