20180402 - ♡❤晚飯@潮江春❤ ♡

4月2日星期一

六點先有晚市，去到剛巧六點，帶埋工人姐姐一齊食會食得舒服啲，呢間潮江春入口有個大大水晶燈，內部裝修幾靚，始終是中環區，不過呢間潮江春在中環嚟講唔算好貴。

叫爸爸點菜，爸爸點了碧綠川椒雞球，雞肉用油泡的方式處理，肉質還是嫩滑，加上醃得惹味，送飯吃一流。配著雞球的是炸得鬆脆的珍珠葉，沒有配這葉的可不算正宗潮式。

想點鹵水豆腐俾媽咪，但唔太抵，反正鹵水鵝片都有豆腐喺底，158元，好過玩雙拼要198啦。切得好薄，啖啖肉又唔un，鹵得入味，鵝味濃。

炒三絲，有雲耳，豆腐，珍珠蛑，好多料好味又唔算太油。好。

上湯浸菜。這味純粹想食菜。

媽媽最愛的梅菜扣肉，梅菜好濃味，扣肉肥瘦適中（當然怕肥豬肉的朋友定覺得肥），而且肉好腍，入口即溶。梅菜好多又入味送飯一流。

我同媽咪期待的兩面黃又叫醋麵，呢度叫潮州黃金煎麵。好正，加糖加醋，一面煎得香脆，另一面保持濕潤不會太乾，好正。

點少得工夫茶，好濃好苦，唔係人人受，但我鍾意。

爸爸好想食的反砂芋條，好多人都頂唔順好甜，因為好似食砂糖咁，但其實宜家出面好難食到。因為芋頭要炸過先，再點炒過的砂糖。要即刻整先熱辣辣架。