20180523 - (ಠ_ಠ) 發燒

5月23日星期三

去完沙田博物館當晚以朗竟然唔肯食飯，真係未見過佢會見到啲飯唔育行埋位食，再餵佢都唔食，當時大家以為因為我放假，佢專登扭我，特登引我注意要我抱抱同錫佢，

而我返到屋企同以朗玩時開始覺得佢有少少熱，但我探熱又似有燒同無燒之間，因為呢排天氣熱，以朗成日都好似興興地，好多時飲完支奶都好似成身熱辣辣，假發燒咁。我朝早都有啲擔心，睇CAM又見佢好生猛同埋好大聲，唔似有病，點知中午姐姐又話佢燒，都燒到38.3架。
屋企有高低燒藥就俾佢食低燒藥，退了一陣，到午睡之後近六點又燒，之後雖然佢冇乜燒，但我都有俾佢食退燒藥先瞓，佢都有玩有食，但有燒的情況下活力都打了八折，食都差咗，我一放工就扭我抱，真係好可憐。

第二朝6點之後就再冇俾藥佢食，因為打算朝早或中午睇醫生，如果唔係高燒就由得佢俾醫生睇吓咩事，點知佢一直都冇再燒，咁BOOK咗時間都冇睇醫生啦，佢又冇鼻水，冇乜唔妥，又食飯，所以冇理佢了。

後來同同事傾開，可能因為當日坐架車太熱焗親了，可能幼兒體溫調節比較差吧，但我都會留意吓佢仲有冇其他問題。