20180525 - (•✞_✞•)天氣好熱食沙律

5月21日星期一及5月25日星期五
 

天氣熱到一個點，太陽毒到一個點，只係5月份已經成日上到34-35度，唔敢想像之後七八月會有幾熱，宜家好少出去食飯，除非去商場，因為一行出街已經全身濕透，太陽曬到兩分鐘已被燒燶，我自己已經頂唔到了，每朝早都要撐傘，亦再冇去過玩具反斗城同鐵皮檔買嘢，因為中環人多車多天氣好熱，亦好難撐傘，宜家只望快啲過埋九月中，仲有三個幾月，或者快啲到暑假坐87D唔駛朝朝早熱死。
 

星期一冇飯帶，試吓公司樓下的沙律，宜家樓下有Starbucks,Canteen ，超市，有賣壽司沙律同包包，價錢唔會太平，不過勝在我哋唔駛好天曬落雨淋咁出去買嘢食，53蚊250g 可揀三款沙律，其實250g真係唔夠，所以打算之後買麵包或甜品食吓，不過原來係送湯，今日係南瓜湯，幾好飲，食沙律一陣風就食完，冇湯真係完全唔夠飽架，雖然我俾錢時有個鬼佬成六尺高又大十大件都係食沙律咋，其實唔知佢點生存到。

沙律最少有5款揀，我選了紅菜頭，雞肉沙律同薯仔，三隻都好食，最正係紅菜頭，好少有又唔會整得好酸，如果唔係咁貴我食多一盒都得，宜家只好用湯頂肚。南瓜湯都好飲，唔會太甜或太重奶味。聽聞有時仲會有蕃茄湯，真係想再食。

另一天去了星巴克吃，都有沙律，歷山大廈分店之前裝修上星期開返，位少了，多咗飲酒地方同埋有滴漏咖啡，而沙律亦多咗好多款，60幾蚊可選三款，平日有凱薩沙拉，今日賣哂，但都食了貝殼粉沙律/薯仔沙律同蝴蝶粉沙律，又係好食，份量多啲可以share，但冇湯，冇吃飲，其實差不多條數。不過天氣熱到冇哂胃口都係食沙拉好。

另外也點了包包，個包包有香草好食，以後個個星期都嚟食啦。