20180729 - § 加菲貓@青衣城 §

7月29日星期日
今日又去睇加菲貓啦，不過今次唔係去圓方而係去青衣城，其實馬鞍山去青衣城係唔方便的，應該話馬鞍山去邊度都唔方便，除了西貢之外真係想唔到邊度係方便。
有車就OK，原來青衣城假日都係19元一個鐘，難怪入停車場係要等先有得入。
青衣城的加菲貓好精彩，比較靚同有心思，起碼除了加菲貓之外仲有漫畫中的其他配角，如POOKY，ODIE等。而且係同聾貓合作，好特別。

POOKY~好耐冇見，係加菲貓的公仔，如果冇睇開加菲貓漫畫應該唔識佢。

隔離有部大電視，不停播加菲貓漫畫。

2018 年乃經典卡通人物加菲貓（Garfield）誕生 40 周年的大日子，遂趁機外遊訪港，探訪好友聾貓，相約在青衣城行街購物；之後，兩隻肥貓更會現身港鐵 5 大商場，與香港粉絲見面，齊齊打卡影相。

青衣城邀請了本地多媒體插畫師小克（蔣子軒）以其筆下聾貓為老朋友賀壽，於 2018 年 7 月 13 日至 9 月 2 日期間舉辦「加菲貓孖住聾貓 嚟青衣城仲夏鬆一鬆」，兩位好朋友以放大版的聯乘裝置「瞓」身展示其「梳乎」的生活態度。





聾貓同加菲貓賀壽。其實以朗唔識加菲貓，反而見到聾貓會叫PANDA，仲想我抱起佢摸摸PANDA。

阿的，加菲貓認為狗仔阿的是全世界最蠢的動物。以朗一見到佢就知佢係狗狗。其實ODIE俾加菲貓塞咗入大雪櫃，裡面有好多爆谷。



有三隻加菲貓，1978年的似肥狗，1996近似我們看的醒目加菲貓漫畫。仲有隻2028年的加菲貓得返隻手係咩意思呢？

電視迷以朗一開始俾電視吸引了，係咁睇電視，不過呢隻古老電視佢又點會見過呢？我都冇乜睇過呢。









呢個係靚靚影相位。









加菲貓飯兜，啲小朋友個個走哂入去跳。好似好開心，其實唔明有咩好跳。

主人阿北，由於帶住以朗好難影到相，但作為加菲貓迷的我到此一遊已好開心。其實地鐵商場的綠楊坊、海趣坊、新屯門商場及恒福商場都布加菲貓，但相信圓方同青衣城是最大規模最吸引了。

睇完一輪去食嘢，行過啲青衣城二期好似少人啲，嘢食都平少少。
其中有間新開的MEE ...lemonglass啲海南雞飯同埋海鮮叻沙都好好食，好有水準，海南雞飯雞唔錯，飯雖冇痛色但本身有味，好食，海鮮叻沙湯好濃但唔會好辣，辣度係我可以飲湯，好香，有啲水準似新加坡食的質素，由於是SET的關係都唔係太貴，

可惜當日以朗唔知做乜大發脾氣，大叫又好嘈，連海鮮叻沙都冇影相。最後要抱佢出去怕佢騷擾到人，好食的一餐，可惜冇得慢慢嘆，只可以輪流食咋，慘。
呢間可以再食多次都得。