20180717 - ( ´•̥̥̥ω•̥̥̥` )自己上堂

7月17日星期二

以朗入到間比較好的幼稚園我真係好開心，但諗起佢十月比人細幾個月就返學都幾慘。十月先剛剛兩歲，人哋起碼都兩歲半了。人哋可能識講嘢已戒片，再加上本身好黐身，好擔心佢第日返學會喊，趁上星期上哂堂，打算再報，但星期六日啲堂好多已開班，唔係好夾到佢開學時間。所以同佢報咗一堂試堂，兩小時冇家長陪。

快圖美影的學生相，一面正經。乖孩子。

報了今日星期二下午一至三，報完之後有啲後悔，覺得咁細個要佢自己單獨上堂好殘忍，21個月乜都唔識，要佢喺唔識人的地方上兩小時堂，好可憐。

當日熊人帶以朗去返學，由於佢喺度上咗十一堂，其實好喜歡間學校，一去到就衝入班房。熊人見佢咁開心。佢就走咗，等兩小時先接佢。

返嚟接佢又冇點，老師每個同學俾comment，以朗冇喊過，但成日要黐住老師搵倚靠，由於其他同學都過哂兩歲，識講嘢，好多指令都明，以朗就好多嘢唔識，老師讚以朗好定，都幾聽話，返學應該唔會喊。

當晚返去都比平日黐身啲，姐姐叫佢沖涼佢唔肯，要攬住我，我唔知係心理作用定點樣，覺得佢係嚇親。

一星期後，我喺學校download 咗啲相，佢冇乜點笑呢，個樣真係有啲驚，有啲無助有啲呆，
由於個樣冇咩笑容，好似好乖好聽話，同我哋平日上堂個樣唔同，我覺得佢好可憐，好心痛。對佢嚟講真係幾殘忍架，媽咪喺你開學前唔會再俾你自己一個上堂了。到時開學先習慣啦。