20180702 - (◍•ᴗ•◍) 海洋公園

7月2日星期一

今日生日，香港人去海洋公園唔駛錢，同行有四個人可以85折，以朗三歲以下免費，於是我哋一家三口花408蚊就可以到海洋公園玩一日。

因為以朗好鍾意動物，有時喺酒樓見到魚又好鍾意，所以趁海洋公園生日免費可以同以朗睇吓動物。

七點幾就醒了，好彩再瞓返，瞓到成十二點，落街食嘢先，點知落好大雨，又雷暴又黃雨，不過自己揸車去都可以，出門時開始細雨，去到又冇乜雨呢。

一去到睇魚，好開心啦。

魚缸又大至細，每一個對以朗嚟講都好新奇。

魚的數目又多品種又多，真係睇到佢好開心。睇魚都睇咗一大輪，最大的魚缸佢就普通，唔算好興奮，最興奮係睇細魚，啲蟹呀蝦呀唔係好郁，佢都唔多識睇，唔會話好開心。
我哋之後就去睇安安，

未入場前見到好多假熊貓佢都會叫PANDA，由於安安都好老了，好少會現身，隔離就住了金絲猴。

之後再去另一個館有小熊貓同盈盈樂樂。

當日樂樂好生猛，出嚟好耐，食好多竹葉，由於都幾近，BB都應該識睇，應該睇到真熊貓。

睇完哂以朗睇到啲卡通就仲更加興奮，當去了跳舞機咁玩。之後再睇金魚，又係好開心，可能金魚啲色靚，佢都好鍾意睇。



再行多陣就坐海洋列車登山，過去睇雪狼，企鵝，BB未必知係乜嘢嚟，但都好開心。睇得好入神





不過最開心都係有間店舖出面有個吹泡泡不停出泡泡，以朗好開心，係咁追泡泡，由於今日成兩點先到，好快又四點幾5點，食咗個難食的豬扒飯，之後就都打算走。



其實仲有水母館同埋鯊魚館未睇架，不過已經五點幾，我哋想坐纜車走人，以朗臨上纜車前瞓咗，連自己坐過纜車都唔知。



本來想俾以朗騎木馬或者去行吓香港老街影相睇懷舊嘢，不過因為遲入場而且以朗都瞓咗，所以只睇到少少嘢，不過都好過上年十二月去迪迪尼，連半場都未過就返歸了。

今次玩唔哂就下年生日再嚟過啦。