20180312 - (◍•ᴗ•◍)人生第一次面試

 

3月12日星期一

 

十七個月大人仔第一次去面試N班，8:45要去到學校，全部都係9月1日至12月31日出世的細B, 去到五個小朋友一組，我填問卷，爸爸陪玩，去到陌生環境天然呆，不過見到玩具都會玩。

 

老師問佢叫乜名當然唔識答，之後有幾款玩具俾佢哋玩，任揀嚟玩。

用匙舀「不」珠仔，呢個個個都識玩，

仲有開樽蓋放珠仔入樽，個樽蓋應該幾難開，

砌積木，應該個個都識，

積木穿線，有玩過但唔識，

入錢去money bank, 屋企有玩開，佢入得好快，入完仲自己拍手，呢款玩具少人玩。

見老師有計分，以為成功在望，點知玩完叫佢行過去聽故事聽歌仔，佢係都要玩，得佢一個扭玩。🤦🏽‍♀️🤦🏽‍♀️🤦🏽‍♀️🤦🏽‍♀️

 

最後拎埋玩具過去聽歌仔，外藉老師唱head shoulder knees toes,諗住以朗日日都聽應該得米，冷不防天然呆又發作，唔拍手零反應。

老師拎個公仔叫小朋友指eyes and nose, 繼續零反應。明明喺屋企係識架。

 

好彩最後老師有本大書講故事有貼紙叫佢哋貼，有小朋友貼完要再貼，唔俾貼就喊，另一個攞咗張貼紙唔肯貼喺本書度，我鼓勵以朗拎張貼紙，估計佢貼落自己塊面，點知佢天然呆的情況下都識得貼去老師手上本故事書度，我感動到想喊呀。😭😭😭

 

之後再唱歌就完啦，因為細B,我只報咗兩間N班，另一間冇叫佢in,佢冇上過playgroup,本身對佢零期望，今日的表現已經好過我預期，無論結果係點都覺得冇乜所謂，今日忽然覺得佢大個咗好多，忍唔住又眼濕濕，唔想以朗大得咁快。