20171103-4 - ☹☹忽然發燒☹☹

11月3日星期五
中午開始，BB忽然發燒，38度幾，工人姐姐竟然唔知，係熊人回家時先知道。
其實BB雖然多小病痛，但又唔係成日發燒，只是副流感燒過半日，同埋上次勁嘢RSV先燒好多日，其他時間只是傷風同埋咳為主，所以人BB燒親我都好驚，雖然好多資料都認為發燒只是身體對抗病菌的反應，而不是一種病，不過細路仔發燒，總愛晚上高燒，而且因為唔識表達，根本唔知咩病，又唔知燒幾多日，點會唔擔心，

不過好彩見佢都好貪玩，好精靈，而且屋企又有高低燒藥，都冇去睇醫生住，先吃上個月打針健康院的低燒藥，好似低咗啲，晚上熊人原本要去夾BAND，好彩有人臨時唔得閒，BB食完低燒藥就同我瞓，感覺佢好似燒得幾厲害，一直諗俾唔俾長頸鹿佢好，不過點幾鐘時覺得佢好似個火人咁，好熱，嗚嗚，原來39.7度，要同佢食高燒藥了。叫做低咗啲。但到星期六都仲係一直有燒。

11月4日星期六

今日原本想去旺角睇水龍頭，架，或去宜家睇床，但因為BB發燒，今日唯一節目變成同BB11:50看醫生。食了高燒藥都有燒，唉，好彩問了醫生又唔認為係RSV或者嚴重的病，喉嚨有點紅，似係感冒，過一兩天應該會退燒同埋會有其他病徵，應該唔擔心，有點自責是否不應該帶BB出去公園玩。
醫生認為小朋友困在家也不一定唔會病，因為我放工衫褲都可能有菌，抱BB都會中啦。天氣轉涼，四周都係病菌，不能避免....小朋友病就當儲抗體。




原本想同BB食嘢，但見佢好攰咁，都係同佢返屋企先，之後先至同熊兩個出街行吓，其實都係新港城一帶，去了新創發附近食泰國嘢，小店近耀安，唔記得咩名，只知隔離有一間小小的店子食越南嘢。
豬手飯幾好食，豬手腍，而且啲汁都對辦，下午茶餐49元連飲品。

另一個泰色粉麵下午茶餐35元，我點了豬頸肉金邊粉，豬頸肉就麻麻地啦，不過好多金邊粉，而且啲蘿蔔好甜好食。
由於小店不會有BB凳，而且位都唔會好鬆，所以唔太方便帶BB食。不過有機會都會再嚟食。

晚上熊親戚來探BB，BB發燒狀態不好，係都要我哋抱，希望下次BB好狀態啲啦。