20121208 - ✈✈清邁遊(11) - 海鮮晚餐✈✈

12月8日

睇完長頸族都黃昏，我地唔睇都要等，再返清邁都要幾個鐘。
返到去都八九點，成日坐車好攰呀。
所以我地近近地喺清邁夜市食夜晚。
清邁夜市近我地酒店附近有間食海鮮，仲有好多中文字的，可能係華人開嘅。
啲嘢都唔算好平，不過熊之前都話想搵日食好啲，於是就去食吓。
一人一個椰青。

 咖哩蟹，好好食呀，啲蟹都幾靚，唔係好辣，好多蛋碎，配料洋蔥入哂味，用嚟送飯或麵包一流。
不過喺街食蟹就食到個人污漕啲。

 燒大蝦，超級大隻的蝦，好鮮甜。

 堅持要食啲菜。

 炒飯，清清地，夠地道，唔算好濃味。

 魚，之前好難搵到唔係燒嘅魚，廣東人都係鍾意食蒸魚，呢種明爐蒸魚喺泰國唔容易搵到。其實係唔係地道泰菜？定係經過華人改良過？

 食到飽飽之後，熊仲想食嘢。 =___=" 汗。
陪佢再去local夜市搵雞翼，因為已經成十一點又係賣哂，於是喺大街附近車仔檔買咗碗粉食，好似幾正，雖然好細碗，好少粉，不過我已經冇咁大個胃再食嘢啦，只食咗一啖試吓味就好了。熊成碗食哂，再次滴汗中。