20130302 - ♪♬♩♫ Bee Two & Harlan's ♪♬♩♫

3月2日星期六，又要返工，

夜晚仲約咗同事食生日飯慶生。

熊坐車出來接我放工，天氣涼咗好多，熊咩都未食就出門了。可憐。
又想去睇吓蕃茄通多唔多人，又係成世都咁多人，唔駛食LU，九如坊附近多咗間----
叫Bee Two French Baguette & Coffee，主要售賣越式法國包及咖啡，還有熱狗、意粉、沙律、薯蓉、小食等。

我同熊都喜歡食法包架。所以想食吓。
又想食熱狗，點了個蜂狗，也是用法包夾著法蘭克福腸，腸皮脆內軟都幾好食，整起熱辣辣的，個汁都唔錯。

 

 個SET可以配港式奶茶+沙律，估唔到個奶茶幾好味。真係幾夠濃。

 仲有點了一個單點的三文魚越式法包，個包幾好食，呢間的法包好得意，全都是越式的料子，
如果唔要三文魚就係一個淨的越式法包，不用傳統地的生菜來做伴餡，用上了酸甜味的胡蘿蔔絲，仲有扎肉帶少少胡椒味，幾特別。

有幾款特別的餡料例如醉雞或豬頸肉，我地穩陣起見要三文魚就算啦。
幾好食。
原來呢間係由太子搬過來的，仲有甜品，不過今次冇食到，下次都可能再食，因為都唔錯，

 之後同熊搵啲結他音樂嘢，再周圍HEA，在佐敦KFC坐吓，一齊打Candy Crush，平平淡淡都開心，
因為我約了同事食飯，咁熊都約了朋友夾band，七點左右我就去the one，見有時間剩就行吓。
影吓相，好多鴨鴨。

 最開心見到加菲貓。

 原來the one 有間賣小克x 加菲的產品，我都買咗少少嘢支持一下。

 

去19/f的Harlan's ，貴貴啦。但朋友生日冇法，以前未同熊一齊食吓貴嘢，(幾個中女fine dining)都冇咩所謂，我宜家唔駛食咁貴啦。

寧願同熊/女王大人食好過。haha

 

 呢啲fine dining 同熊食就差不多，又或請女王大人食等佢開心吓。

 餐前麵包。

 頭盤都2,3百蚊一個。沙律同一般的冇咩大分別。

 呢個都係頭盤，today special 係尋龍魚，都幾好食呀，但份量好少。

 磨菇湯好濃味，都幾好飲。

 龍蝦湯，個味太濃啦，真係頂唔順，西湯比較濃味，但可憐的是加埋龍蝦味好勁，好似獻汁咁勁，要嚟撈飯就好。

 

parma ham pizza，都唔錯，parma ham ，無得輸。

 

 

 龍蝦意粉，都幾好食，少少辣，幾惹味，個意粉唔同平日的，有啲似油麵，龍蝦得個殼咋，好少肉。

 好好view，原本book了外面，不過當日下午落過雨，所以冇開到外面。

 預定了蛋糕，因為外面的蛋糕要100元切餅費，所以同4/f的同名餅店order蛋糕就唔駛切餅費，
拿破崙，好鬆化的酥皮，吉士都幾滑，但不夠香，但都唔錯。

整體嚟講唔太值，都係係上年的spasso好好多。