（*－.－）McCafe差差差

一向對McCafe啲咖啡冇咩好感，一味以平取勝，有啲$12-15的咖啡都算抵飲。
如果想飲咖啡，我還是喜歡最愛的星巴克。

不過奈何我住的鬼地方乃是鄉下地方，邊有星巴克？想飲杯咖啡就飲McCafe，點知見到兩杯咖啡真係嚇一跳。

中間pat白色嘢究竟想點？
haha，根據宣傳照片，應該係心型嚟架。呢個心好明顯冇heart，因為落單買嘢時見到個沖咖啡個姐姐塊面黑過包公，個樣西到呢，等緊落單時，成個McCafe只有呢個西樣姐姐，佢沖緊咖啡，見到冇收銀佢唔打算幫手落單，只擺出一副黑面樣。

我之前都上過吓咖啡班都大概知道點拉花，拉個心，應該唔難，佢個心型係最易拉架啦。拉花拉成咁，不如唔好拉啦。

味道....帶燶味(McCafe的咖啡一向如此)

其實呢間麥記差已經唔係第一次，唔知係唔係因為鄉下地方服務一向好差，唔好話McCafe，連一般買個包都肉酸過人，試過有一次買咗個魚柳包，兩塊包同塊魚柳甩皮甩骨，塊芝士飛咗去個盒邊，難聽啲講，個包似跌過落地執番咁囉。大佬我唔係要食山珍海味，見到個咁嘅包真係呆咗兼倒胃，最後真係頂唔順叫佢哋換過個。

McCafe又長期冇人收銀，試過有兩個人去沖杯咖啡都唔落order，要我好大聲咁問:「唔該有冇人落單呀？」先有個經理過嚟咋，收銀態度一般都唔差，好少西西面，不過冇人落單嘅McCafe喺鬼地方間麥記係經常發生，十次裡面有八次係咁，我估如果呢啲事發生在中環呢....呢班人應該好快消失。可惜嘅係，一路鬧一路會去食，因為麥記啲廿幾蚊一個餐喺現今通貨膨脹嘅情況下始終係好吸引