20170402 - ◎好立克杯◎

4月2日星期日

今日沒有姐姐，當然又是忙碌的日子，姐姐今朝出門前七點餵埋BB先走，BB食完睡到十點才醒，我哋都可以瞓耐啲。

之後同BB沖涼，瞓一陣，俾少少米糊佢食就落街，去譚仔食米線，再買餸，BB一坐BB車唔郁就扭計，有時要推吓佢郁吓，開始習慣帶BB出門，雖然辛苦啲，但都好開心。BB鍾意去街街，所以好開心，由於我哋好少買BB假，星期六日有時夾手夾腳帶BB出街，BB一出街就好開心，所以唔會勁痴姐姐。

呢兩日都同BB出街，由於出街都多數帶CON，佢開始認得冇眼鏡框嘅我都係佢媽咪。

夜晚熊人整意粉，婆婆公公，表哥都喺度，婆婆抱住BB豬，BB豬見我入房就開始想喊了，希望我飛完返來唔會唔跟我啦。

 

夜啲湊BB豬去婆婆家一陣，我哋跑半小時，今次唔去到運動場或者長廊咁遠了，近近地附近跑出好了。自從上次寫過篇BLOG話輕咗之後就好似中咒一樣，重番哂，夏天就到，要穿短袖，要快啲瘦返，但宜家要去埋日本先可以努力減。

 

跑完食咗好立克軟心胚芽甜品杯，同熊人一人一半，日日早上返工經過聖安娜都被廣告吸引。有蛋糕同埋杯，杯22蚊一個，蛋糕細個裝118元。

 

頂部係好立克慕斯同胚芽，然後下面分別係好立克軟心、朱古力蛋糕同原味奶凍。好立克慕斯加入胚芽後更有咬口，連埋朱古力蛋糕同原味奶凍一齊食嘅話味道比較甜，好立克軟心唔係好有好立克味，唔係差，不過又唔覺有驚喜，冇咩特別咁。