§莫拉菲襲港前@Pizza Hut§

星期六本身要番工，前一日又因為有gathering 而夜返+夜睡，所以當日都冇咩心機去街，原本打算黃昏影日落，不過前一兩日都估到唔會去得成，黃昏天氣會轉差，所以番鬼地方食lunch 之後去超市買嘢好了。

朝早有煙霞，不過仲有藍天白雲。

到一點放工時已經焗到抖唔到氣，雖然太陽出唔起，不過嗰種焗法好似焗桑拿咁。原來兩點幾時天文台錄得34.3度高溫，新界部分地區更高達攝氏36/ 37度，真係熱C人。

都係去冷氣地方食吓嘢，點解去Pizza Hut呢，因為之前用DBS積分換了coupon。

叫 lunch set，有湯，唔敢要忌廉湯，因為好飽又好肥，雜菜湯感覺好啲(自欺欺人)

一人一個SET 

千島海鮮pizza，加錢要芝心批。好食。因為細細個冇咁漏。

另一個SET 係豬扒天使麵，少到呢，啲麵「了」兩吓就冇哂。唔夠飽，好後悔唔要忌廉湯。

之後就同圍行吓，仲同阿媽去超市買地餸，怕打風呀，今次儲咗好多印花啦。超市好多人呀，排隊俾錢都好耐呀。俾完錢都天黑同落雨啦。涼咗唔少。

之後當晚打風真係好嘈，尤其我家住鬼地方，啲風好似鬼叫咁，又大雨又呼呼聲，好彩我瞓得著咋，因為我近呢個月轉咗床頭，床頭唔再係窗邊，冇咁嘈，之前打風次次我間房都好嘈，可能因為家住鬼地方，咩都衰啲，啲風都叫得恐怖過人，鬼地方真係冇好嘢架。

 

再者想提吓天文台今次處理掛八號風球時的手法好有問題，十一點半先掛，當時已經好大風，如果當日要番工就慘啦，我呢類犯賤的人在香港工作，家住鬼地方，偏偏遇上無良僱主要掛起八號先可以放工，由香港返鬼地方平日都超過一小時，打風應該要個半小時，那麼到了返到屋企已經要一點，但一點半就九號了，你話當時情況幾惡劣。當日新界東北部乃重災區，鬼地方就係喺東北面。十二點開始已經好恐怖，不斷呼呼聲，肯定人都吹得走，可能死在途中，咁到時可以怪邊個呢，只怪自己犯賤抵死住鬼地方仲要去咁遠番工囉。當日如果在CWB 做SALES，飲食業都係啱啱收工，番到鬼地方又係已經好大風，你話幾危險。所以住鬼地方就唔好望打風，亦都冇資格望打風，因為可能隨時死喺途中。

至於點解轉床頭，就因為我前一排唔知係唔係瞓覺姿勢有問題，條頸好痛，有幾日係未瞓醒已feel到好痛。每次瞓醒都好似受罪咁，最慘係扯到個頭都痛埋，日日頭痛同頸痛，勁辛苦，之後就試試轉床頭瞓，痛楚開始慢慢減少，宜家差不多唔痛啦。不過仍然要減少啲玩電腦，因為電腦枱個位有問題，唔適宜長期使用，一句講哂我居住環境極度惡劣，再住落去會百病叢生。