20181020 - ✿｡◕‿◕｡✿ 西貢遊

10月20日星期六

今日同以朗去西貢行吓，順便買啲海鮮夜晚打邊邊。
一早同以朗玩玩，佢煮嘢食俾我食，不過係煮提子同薯仔俾我食呢。

你睇，好認真架。

好耐冇同佢玩梳頭頭，又梳頭頭又搽潤唇膏。

今日冇乜太陽，有啲風都幾舒服，泊好架車就行一陣，見到個住西貢的朋友，落街放狗，其實是以前YAHOO BLOG 年代的BLOGGER，冇正式見過面架，雖然我喺中環見過佢，但佢好似見我唔到冇打招呼。以朗見到狗同鳥都好開心，不過當佢見到真狗狗可以摸摸時又變得天然呆，好似又驚驚唔敢掂咁。

以朗今日中午唔食飯，去程又暈車浪嘔嘔，真係激死同嚇死。
同佢行一陣先食嘢，但佢都係唔多食。
今日去西偲名屋食，好似係新開冇耐，原來係詹瑞文開的。
點了提子酥，幾好食，一拎嚟已經好香，因為有吉士，啲吉士整得幾香。

自家製的Blueberry cheese cake就好普通，個餅底唔好食，面唔夠金黃。熊人會整得好食過佢。

煙肉蛋BAGEL整得幾好食，個名幾好笑，叫做煙消雲散肉蛋鼻哥包，BAGEL有益又少食到，幾好食唔會硬，蛋整到有汁的，好食。

仲點了花茶，冇蜜桃味，只有士多啤梨味，好彩都好飲冇藥水味咋。

餐廳外內環境都好別緻，裝修同餐具都好歐陸式，店內有畫掛係牆，杯碟都好異國風情。Cafe 環境好舒服。

食完同以朗行多陣先去買餸，經過酒樓個魚缸佢當然睇得好開心，叫佢唔好睇啦，走啦，就發哂脾氣，尤其熊人叫佢做乜都嬲，好彩最後我走佢都好乖咁走。




之後同佢行長廊佢都好開心，因為佢見到好多好多狗狗，起碼見到成廿隻不同的狗狗。有大有小不同種類，有長毛有短毛有柴太有貴婦狗，其他小朋友又係見到狗好開心，最好笑BB睇緊狗時，有個同BB差不多年紀的女仔摸BB件狗狗外套呢，好搞笑。
 

20181018 - ◐Beef & Liberty◑

10月18日星期四

同同事食晏，佢哋想試Burged，佢哋話呢間BURGER有豬又有素，我唔食牛嘅人都可以去食。
SET LUNCH 有三款， 1)是手撕豬，佢哋有人食過好似比較鞋，所以我唔揀，3)是CHEESE 漢堡。2)係牛/素漢堡，冇芝士的。

SET 包一杯特飲，我選了LEMONADE，酸酸地幫助消化，問佢有冇得轉奶茶或咖啡，係冇嘅。

Falafel burger
這是素漢堡，炸鷹嘴豆餅漢堡，雖然係素，但都幾濃味，我覺得味道可以，不過好乾身，當然，食burger都係牛最好食，想食豬或素burger一定係爭啲。
據餐單標著說明，每售出一個將會向香港大自然保護協會捐出８元，
用餐之餘又可以做善事，何樂而不為呢？


看過open rice好多人推介蕃薯條，所以我揀蕃薯唔揀薯條，食過蕃薯條真係令人想追吃，炸得好好食香口脆口，蕃薯比馬鈴薯甜，特別好吃，我唔太鍾意食炸薯條都勁欣賞。如果再嚟食，一定再食蕃薯條。

另外呢間的茄汁好甜，比一般甜。

20181017 - ☂┋大埔海濱公園 ☂┋

10月17日 星期三

重陽節假期，趁天氣好，要多啲同以朗去郊外玩。
宜家以朗返學之後嫲嫲好難夾到時間嚟探以朗，趁今日假期嚟探以朗。
呢排天氣涼咗，因為落雨，中午時出車係冇雨，
諗住同佢去大埔海濱公園玩泡泡，飛機同埋踢波，帶咗唔少嘢，又買咗啲蒸包去食。
一去到時好開心，因為好大地方，大埔海濱公園係全港最大的公園嚟架，有草地，有回歸塔，以朗見去到公園都開心走走，點知去到無耐就落雨了，

見到有幾個姐姐吹泡泡，當然吸引了以朗，玩泡泡真係玩極都唔厭呢~

初初都照同佢玩，因為唔係好大雨，就同佢換件風褸，買咗隻蜻蜓俾佢玩，因為附近有小食部會買啲風箏，吹泡泡，飛機，唔怪得呢度咁多人玩風箏，如果第日好天都要買隻玩玩。不過呢間嘢賣得好貴，所以買最平的蜻蜓就算。
點知之後真係好大雨。唉，仲要冇喺架車度拎遮出嚟。四個人只有嫲嫲有遮旁身。後來超大雨，落起雨嚟由公園中心行出去攞車真係唔惹少，嫲嫲俾咗僅有的遮我哋三個用，佢要淋雨呢。




而以朗個衰仔因為有我喺度，唔多SO嫲嫲，真係搞到幾無癮，今日媽咪煮晚飯食，兩個工人姐姐都冇放假，幾好，他條好多。

20181016 - ♡❤狗毛Infinity Thai Restaurant & Bar❤♡

10月16日星期二

近日以朗成日都唔肯瞓覺，日日起碼十一點半先瞓，作為陪瞓專員的我有時真係身心俱疲，但諗心一層，陪子女瞓覺其實是父母的責任，除非佢想同姐姐瞓，否則點解要假手於人呢？

不過責任還責任，如果有朋友約食飯，我都會照出去食，間中一日俾自己輕鬆一下才有動力走更遠的路。

本身係狗毛同Beef & Liberty 之爭，但我剛約了人星期四去食，所以又去多之狗毛度食，其實同上次都距離近三個月了，呢間店員服務好，有禮貌，環境不大，枱唔多，有波枱，有飛鏢，有電視，有得飲，有得食，有得玩，確實不錯！

由於佢啲cocktail 都好特別，未必個個接受到，所以都係揀啲正常啲的Long Island ice tea就算。

今次點了三樣嘢，我地叫咗，無骨鳳爪沙律，泰式拼盤同埋大蝦金邊粉，
無骨鳳爪沙律好多好多鳳爪，反而冇咩菜，只有少少生菜同車厘茄，無骨鳳爪是酸+辣的，不過其實不是太辣，起碼怕辣的我都食到。

大蝦金邊粉　$148
餐廳細心地將調味粉放於碟邊，分別為砂糖、花生粉及七味粉，讓食客自行調節喜好的味道。如果怕辣，只混入了砂糖和花生粉，已經很美味，金邊粉以蛋絲包裹住，十分精緻，拌勻後蛋絲亦增添了金邊粉的甜度。大蝦以BBQ方式烹調，較乾身而且更鮮。

泰式拼盤 $148
有春卷、蝦餅、魚餅、香葉包雞、雞塊，份量頗大，每樣都有三四件，應有盡有，小食類單點和最人氣的食物都幾乎在拼盤中出現。


由於今次兩個人點了三樣嘢，其中泰式拼盤好大個，所以食唔哂，朋友打包了食剩的泰式拼盤及金邊粉。

店名：Infinity Thai Restaurant & Bar 狗毛
地址：中環蘭桂坊8-11號昌隆大廈3樓


最後九點五才走，回家已是十點半有多，以朗都同姐姐入房，本身陪瞓專員諗住休息一日，點知返屋企開燈有隻大曱甴由房跑出廳，涼咗咁多啲曱甴都仲可以爬到上四樓，真係嚇死我，我唯有叫陪緊以朗瞓覺的姐姐出來殺曱甴啦，由於以朗未瞓著，俾佢見到我，我又逃不掉了。我洗過面就叫姐姐自己沖涼先，陪瞓專員今日休假不成了。

20181014 - •●✿濕地公園遊✿●•

10月14日星期日

今日去濕地公園，因為想早啲出發，所以十點幾落街食早餐，但近來佢屋企食同出街食都食得好少。唔再係吃貨，有時又專同爸爸作對唔俾佢餵，好唔聽話。

食完早餐就坐車去濕地公園，Google老點去了後備停車場，行好遠先到，入場費30元，可以買年票，入到去參觀有人好開心，雖然是假的動物模型，對以朗嚟講已好開心。





仲有魚睇呢，一睇到魚就好興奮。

原來有個兒童館，可以睇書，玩拚圖，配對，類似文化博物館咁有啲室內嘢玩吓，由於啲嘢俾小學以下啲小朋友玩，所以以朗都玩得好開心，不過室內地方都係容易中招，所以都係同佢去戶外走走。







以朗出去出面戶外行得好開心，睇怕醜草，又有睇到貝貝，但以朗就唔多識睇啦。不過佢行吓啲木橋已經好開心啦。好行肯，好乖，好多鳥都要用望遠鏡睇，所以以朗唔識睇了，但行吓睇吓植物，望吓啲水水都開心豬。



我哋帶咗麵包嚟食，行到咁上下就食麵包，椰撻，飲嘢，之後唔知行咗去邊好似個塘咁，好靚好南生圍FEEL~

不過兩邊都冇欄杆架，所以要拖實，佢都幾乖肯拖實。



最後行返出去先知道我同我好耐之前去的行法唔同，上次去係由鱷魚貝貝行入去，人多啲，有荷花池，不過宜家當然冇荷花啦，而我哋今次由後面行就多啲樹木，不過山竹都破壞了一條橋呀。尾段以朗行到老遠唔肯一齊行，原來屙屎屎，好彩宜家用學習褲都方便了。

走的時候，熊去停車場攞車先，我同以朗影貼紙相睇魚魚睇水水，好開心，其實佢已經幾攰，車到了就上車啦，以朗竟然捉實架車唔俾我關車門唔想走呢，好彩最後上了車之後佢知道冇法子都冇再喊了，開一陣車之後仲瞓覺了。


點知瞓醒食蛋糕好唔聽話，周圍FING啲蛋糕，晚上食晚飯又唔要我餵要公公餵，我餵佢唔食，公公餵就大口大口吃，可能因為TROUBLE TWO，好鍾意同人作對，激死

20181013 - ♪♬♩♫眼高手低--無雙♪♬♩♫

10月13日星期六
今日嫲嫲姑姐姑媽都嚟睇以朗，我哋乘機去睇場戲。無雙。

佢哋嚟之前同以朗去新港城行一陣，今日天氣涼涼，著牛仔衫，好型仔好smart。

因為轉季去uniqlo 。買啲褲同衫俾以朗。順便同以朗行一陣同放電，佢哋嚟到我哋成三點幾四點先食下午茶餐。

故事簡介

偽鈔畫師李問 (郭富城 飾）在泰國失手被擒，香港警方引渡回港。律政司檢控前，國寶級畫家阮文(張靜初 飾）前來保釋，雙方達成協議。只要李問供出偽鈔集團主腦「畫家」(周潤發 飾）真正身份，便轉為污點證人，李問無奈作證。

九十年代，溫哥華，李問和阮文本是對畫壇情侶，可惜畫作寂寂無聞，窮困潦倒。李問偷偷製作假畫維生，卻被阮文識破感情破裂。可幸作品卻被「畫家」看上，高價邀請加入偽鈔集團。李問為支持阮文而答應加入，和一眾專家穿梭歐亞北美，解破九六年新版美鈔所有防偽技術，造出幾可亂真的「超級美元」。與此同時被捲入集團一次又一次血腥屠殺，李問多次逃走，都逃不過畫家天羅地網，最後更被陷害入獄。

李問向警方和盤托出，可是「畫家」已人間蒸發!

好多人講到呢套戲好好睇。不過我同熊人睇完就覺得個結局有啲一頭霧水，好多網友話同博擊會、非常嫌疑犯、鬼眼一樣咁好睇，我就覺得莊文強同大衛芬查差好遠，無論故事同剪接手法都係，可以話眼高手未夠高，唔合理的情節實在太多。

當最後好似爆出個驚人結局，畫家就係李問本人時，成個故事好多犯駁，淨係個加拿大警官單人匹馬去交易已經離譜，喺酒店有槍戰殺咁多人可以話走就走？金三角有啲整容技術可以整到同阮文一樣？如果李問係畫家本人，心狠手辣會救一個三唔識七的女人？

《無雙》製作無疑非常精良，美術、道具、資料考究仔細程度驚人，聰明地用偽鈔偽畫說偽故事，創作野心很大，令人看到目不暇給，長知識了。最難得是，雖為合拍片，卻全無陸味，而且「舊式」港味很濃（如一面對金三角毒品軍閥就要呯呯嘭嘭亂戰），演員也有親切感。幾場槍戰，拍得迫力十足，火力強勁（雖然跟影片走精密細緻路線的風格有點不搭調和過度炮製），看大爆炸有手榴彈火箭炮，看發哥有雙機槍Mark哥，《無雙》驟變戰場版《賭神》、《喋血雙雄》、《英雄本色》，仿如對發哥致敬一樣。

20181009-12 - •●❤跑步+雜相❤●•

10月9日星期二

今日黃昏跑，但力不從心的感覺，再加上GPS又有些問題，屈我一轉彎就暫停，又計少了好多km，雖然話我跑步係想少啲背痛，但如果有進步可以令我有啲動力挑戰自己。宜家個定位時得時唔得，搞到好似跑差咗好多，好灰架。

上星期放假都有跑，不過因為自己不自量力，連跑兩日，3/10夜晚跑長廊還好，但4/10黃昏又跑，不足24小時跑兩次係唔得，大脾小腿都好痛，唔夠力，好慘，之前三四月係可以連跑兩日，看來近日狀態不夠好，希望有時間可以喺今個冬天操返fit。做了陪瞓專員之後，能夠找到時間運動真的好難，以朗睡了已經11:30真的太夜了，樓下街燈又未整好，真係冇得跑
 

我心目中係一星期運動五日，兩日跑步，兩日HIIT，一日跳舞，但宜家好明顯唔得，因時間同地點關係，多數是一天跑，一天HIIT，三天跳舞。要平衡湊仔同運動真係一啲都唔容易呢，呢幾日明明係生理期後最易瘦身的日子，但呢幾日偏偏重了兩三磅，真的教人很灰心，不過當我明白到運動健康瘦身是一場持久戰時，唔運動會肥，運動咗都未必瘦，我還是要做適當的運動吧。

知道以朗今個月26日有生日會加HALLOWEEN PARTY，於是去石板街買少少嘢俾佢當日打扮，個袋仔冇咩興趣都叫做有玩吓，頂帽就真係唔會帶，一戴上頭就撥開。即係當日只著件蜘蛛網衫同拎個小袋仔就得啦。




仲有呢個星期啲相，以朗好喜歡扮書本上啲圖畫的動作，例如張開口，跳等，呢本書有人睇書，佢就即刻睇書。宜家坐梳化睇書好似大個咗好多了。









另一日係我星期五去SHISEDO做FACIAL，喺婆婆屋企食飯兩老表攬頭攬頸，兩個唔鬧交時係幾FRIEND架。




宜家姐姐上了軌道，我會去跑吓步，做FACIAL，食吓飯咁，有時返嚟見BB好似好開心，唔記得媽咪，令到我都要盡量十點前回家見佢一面，其實說到底是我唔捨得BB，而唔係BB唔捨得我囉。