20160610 - ❤照結構❤

6月10日星期五

今日放自己一日假照結構，

約咗11:30，點知好多人，去到勢色好唔對，坐滿人，好多男士都冇位坐，等登記唔算耐，但等照就好耐，人太多好迫，唔夠冷氣，我好辛苦，可能又因為又驚又擔心，雖然如此我的血壓都偏低，63/96， 初初有時有7x下壓架，點知三個月之後打回原形。

咁多人係因為間診所係孫錫鴻醫生，呢個醫生好出名，我唔係搵佢照都一樣等等等等，等咗成兩個鐘先入到去照，部機好清楚，好細緻，高醫生好細心一開始話我羊水足夠，胎盤沒有前置，偏後，之後再講解各部位，例如心臟見到四個心室，腦又見到啲腦區，橫隔膜，手指骨，有冇兔唇，腎臟，肺等等，佢好健康，醫生都讚佢好合作，可以睇到哂所需部位，仲幫佢影咗幾張相。知道了健康之後真係鬆一口氣，我同醫生講過有時陰陰痛，都唔駛擔心，我終於放下心頭大石。可以想像下寶寶的樣子了。

最後等report DVD 都等咗超過大半小時，仲送咗幾張4D相俾我，個樣尤其嘴同下巴都似足熊人。個鼻就好似兩個都似似地，如果用何醫生個預產期，當日應該是20w4d，但bb 啲頭骨大脾骨就度到21w4d，看來是偏大碼。我都唔駛擔心養唔大bb 。

走得兩點半，足足三小時，去深水埗泰潮食飯，好想食泰國嘢呢，下午茶餐包泰式飲料。吃了海南雞，肉一貫嫩滑，油飯亦整得好食，

另外下午茶的炒金邊粉，比較細碟，好惹味，好夠水準，似足喺泰國食啲味，仲有咸檸水，青檸水飲，呢啲質素咁高只需98元，如果在金寶嗰啲要成200元了。

由於折騰大半日，大家都攰，返家五點幾午覺到七點半，都好，夜晚三點有歐國盃法國。瞓定都好。

今日好開心呀。同親戚可以好肯定咁講吓啦。