o(︶︿︶)o呻吓

上星期同幾個同事同埋一個舊同事食飯。

其實佢唔舊同事，而係以前喺「衫」度做時同宜家呢間公司啲人交手時識嘅。原本應該係有啲敵對關係，不過可能佢份人好nice，都傾得吓兩咀，到佢走時就問我過唔過嚟，就係咁成就咗我嚟呢度做，一做就幾年了，當年好似同佢見過一兩次面咁大把，有時就係咁奇妙，好少見都好似幾熟吓。

佢話呢度做幾多嘢年尾就會出番幾多bonus，同埋其實以我個profile可以做到宜家呢個post係算好。其實佢唔講我都覺嘅。所以點解就算辛苦都仲想喺度做，事實上宜家好hea的AM是BIG 4出身仲比我多兩年exp，人工同我差唔多，不過workload就。。。

我最唔想成日都講到睇起你先俾咁多嘢你做呢啲嘢，我只想安安樂樂咋。開支大到死，俾完屋企同必要駛費最少要皮幾一個月，如果無錢儲會好無安全感。所以係人都想有多錢架。

講嚟講去最唔開心就係點解自己要多咁多嘢做，啲人日日9點鐘番嚟先落街買早餐食，一個月sick leave 幾日，或者9點3,4先番嚟慢慢食早餐，放工又準時，最嬲係仲要同人研究點先可以六點鐘sharp拍咭走人，真係好激氣囉。本身Expect 年尾bonus可以compensate到，但宜家經濟唔好，好影響bonus，所以近來心情當堂灰哂，好唔想返工。

當日去鴻星食咗個set有翅，有龍蝦，有片皮鴨，最後仲有壽包，最後先有影一幅相，個壽包有成隻蛋黃，好好味，唔及東海咁大個包，咁仲好，因為影得個鹹蛋黃大啲。 哈。個set 8:30之後食先有特價，放工都晏，去食就fit哂，食完成11點...原本想sick leave，因為條氣唔順，最後都冇sl....因為唔想詐病，做唔出。

同好多人都呻過之後又好少少，宜家唯有等埋year end睇佢加幾多同埋個b仔有幾多先算，我入嚟3年，annual income加了>60%，(本身人工好低)，真係好難抗拒個錢字囉。

呻完。希望開心啲捱多幾個月先算。