｡◕‿◕｡MisoCool

七月廿三日
老闆放假，最好出去食LUNCH，食晏咗都唔緊要。

今次唔係去得好遠，去士丹利街，宜家士丹利街都好多嘢食架。
Misocool 係其中一間，

中環士丹利街11號1樓

Miso 喺日文係解面豉，Miso soup是味噌湯(面豉湯)，其實係食拉面，openrice講到好好食，
我只可以話ok，但唔稱得上好食，只是以中環價60蚊左右食拉麵算是平，我喺香港唔係太鍾意食拉麵，因為好味精，misocool冇味x咁味精，但都係味精。

帶子拉麵，有隻蛋幾正。 

另外試了大根餃子，幾特別，不過冇影相，大根在日文是白蘿蔔，個皮似係用大根做，有少少沙律醬同蟹子係上面，ok，幾好食。

中環食晏好多人，要等係預咗，不過呢間嘢好似只係for 2人入座先會快，我哋當日4個人，竟然由唔夠一點等到點半之後先入座，而好多兩人就點三嚟都早過我哋入座，安排方面好有問題，死等一兩張四人枱俾我哋，咁佢哋唔走我哋就唔駛食架啦？

究竟有冇做食店的經驗架？正常應該等啲二人枱走咗之後盡量安排「泊」枱架啦。
老老實實，呢間只係價錢算ok之外，真係冇咩特別，咁等位法，搵鬼食咩？