•●✿小肥牛火鍋活魚專門店✿●•

四月廿九日(星期二)

同衫嘅舊同事去咗太子間小肥牛活火鍋活魚專門店到打邊邊，其實我唔喜歡打邊邊，因為我幾次打完邊邊都會腸胃炎或者胃痛，呢個係自己腸胃問題，完全唔關啲食物事，不過衫嗰班友比較鍾意打邊邊，我又懶係順得人，冇辦法，照去。

原來呢間嘢幾出名架，真係失覺哂，同事預早一星期訂位，所以一定食到，如果唔訂位就唔知啦~

我哋一去到就係咁問我哋飲咩，嗰度好多特價啤酒，連茶都唔俾杯我哋，直到我哋問佢要茶先唔再問，有好多材料任你用嚟整d汁，好味，我因為怕喉嚨痛，忍手只落了十粒辣椒仔。

嘢食方面，先點咗個活魚剌身拚盤，$198好大碟，仲有條魚係咁郁，個咀係咁開合，嚇到我唔敢食，因為覺得幾恐怖，其餘刺身就好似下圖咁(from openrice.com)，其他刺身都好新鮮，得。

唔知咩安格斯牛肉做特價，10蚊一碟，二人先可以叫一碟，不過一碟都有十四片，我唔食牛肉，所以no comment。 

以下呢個超好食，一定要試，好似三十蚊一碟。

墨魚滑同鯪魚滑用個杯裝住，自己「不」，墨魚滑有埋啲蟹子，好爽口同彈牙，好食。

  

當然仲有點其他食物，例如菜，雲吞，蟹柳等，全部都ok，overll 每人食了$158，算係抵食，
不過環境就麻麻，因為嗰度好嘈，同埋唔知係唔係因為成日sell啤酒，所以有一班人係咁飲酒仲玩骰盅，嘈到呢，嗰班友坐正我哋隔離已經夠慘，最大鑊係之後仲食煙，乜食店唔係全面禁煙嘅咩？