20121114 - ╭。☆海港城聖誕報置☆。╮

11月14日星期三

熊家執得7788。
可以同熊放工就去行吓。
知道TST有個英國音樂攝影展在GATEWAY，就同熊去行吓。

 點知原來冇咩料到，好多經典相熊都見過了。
又反光，好難影呢。

 影咗一陣就走了。
去了海運影聖誕裝飾。
十一月第二個星期即是上星期已經開始有。
天氣仲熱熱，冇咩聖誕氣氛。
不過有個好處係少人啲。

 宜家大商場啲聖誕裝飾好有氣氛，反而好少人再睇聖誕燈飾了，因為得尖東有較多的聖誕燈飾，而商場的又越來越靚。仲影咩燈飾吖。

 今年好grand，紅色金色，有氣氛，唔多花巧幾舒服。

 看到這個想起Alice in wonderland。

 應該真係加咗呢個元素的。

 當日唔算好多人都咁樣，聖誕時真係不敢想像。

 影完都好早，我哋又去思思縮埋的food court食嘢。
食了印度嘢，但個餅似係擺耐咗，唔好多好食。

 仲有日本嘢個滑蛋鰻魚定食又幾好食喎。

20121113 - •●❤你快樂所以我快樂❤●•

11月13日星期二

熊今日搬屋啦。熊冇返工。
朝早十點開始搬，因為屋細了，所以要執一輪，熊因為冇戴口罩所以鼻敏感發作，要休息一下，午睡呢。
因為熊搬屋忙忙，所以我放工去搵佢食飯，試了熊樓下的泰菜。
熊宜家樓下好旺，好多嘢食，有大排檔炒餸食飯，有打冷，有泰菜等。

我哋試泰菜。

係泰國人開的。

試了豬頸肉沙律。
幾好食，不過多咗啲芹菜，我麻麻地芹菜味。

 茄子，做法好似我哋食開的廣東煮法，魚香茄子，不過有啲唔同就係有金不換囉。

 炒唔知咩菜苗，講咗幾次都冇記性，唔知叫咩菜，熊話係比較重口味的菜，有少少苦味，唔係個個喜歡，但我覺我好有菜味。
唔錯。

 仲有龍眼冰都幾好味呢。

 好家庭式，但幾好食。

之後幫熊執衫，熊家仲好多嘢未執，我只有幫到熊執衫，
熊見到我幫佢執衫好似好開心。
我見到熊開心，我就好開心了。
可以幫到熊做到少少嘢我就覺得滿足了。
雖然宜家屋的面積細了，但感覺好似冇咁空洞，好似WARM啲。
希望熊住得慣，住得開心，我就會好開心了。

20121111 - 米埔ⓛⓞⓥⓔ

11月11日星期日

因為公司有得去米埔，所以同熊報埋名去行吓，其實年年都有，不過冇咩打算去，因為係公司活動，冇咩打算參與，點知原來知道米埔自然保護區唔係話入就入到，要有PERMIT先得，平時係唔會開放，咁先知係好嘢。

瞓醒就同熊一起食早餐，
喜筷，平過大快活。
好豐富。

 

 不過啲嘢比較SALTY。

 食完早餐，熊就揸車去上水火車站。

去到十點多啲，仲有其他團體今日入去。
原來真係要睇PERMIT呢。

當日天陰陰，呢張相藍天難得一見。

 好多濕地，紅樹林。

 同濕地公園比，比較大自然，少啲人工，不過同南生圍比就，南生圍貼近更加大自然，

 今日帶大機同200MM鏡。
可以影多少少。

 有好多觀鳥亭。

不過支鏡都係打唔到雀，

 CUT 埋相都只係得一粒鼻屎咁細的雀仔。

 呢張算係比較成功的，不過都係SHARP唔到對眼。

 不過唔睇雀都仲有好多景色。

 如果好天影相就靚好多呢。

 唔好錯過中段的蓮花池，好多好多睡蓮架。

揀咗長路徑都係行咗三個鐘左右，之後再行多一陣去返中段啲有得坐的地方食嘢，我地買咗麵包去，想食埋至走，

三點走，回到家都四點，因冇帶鎖匙，要四點前爸媽未睇戲前攞到KEY。
夜晚我仲要去飲。
熊送完我就回家整新屋。
我去飲埋真係超級攰。

20121110 - o(≧v≦)o幫手:P

11月10日星期六

因為明天同熊去米埔，所以攞正牌可以夜晚去熊家。
一早天氣好熱，成三十度。
食咗早餐幾飽，
所以LUNCH 同媽媽食時點了沙律，凱撒沙律，雜錦有蝦有牛油果有雞肉，好食就好好食，不過好貴，成90蚊個。

 媽媽食SET，佢俾杯藍山咖啡我飲。

 仲有甜品，焦糖布甸。都好食。

 之後坐車找熊，點知坐錯車，好彩早發覺，話俾熊知，佢知去邊度接我。
之後同佢買少少嘢飲就做嘢，幫手油油。 HAHAH，雖然我係廢廢地，不過算係出一分力，又出埋心。都幫手油咗半個櫃架。

 搞完一輪就去返舊屋附近食晚飯，因為當日都好熱吓，所以唔想去大排檔度食。於是就去了稻香食晚飯，食了斑球兩味。

炒斑球幾好食，本身好入味，連啲翠玉瓜都入到味先勁。

 仲有蒸，我好鍾意蒸魚，不過比較多骨，所以唔係食好多。

之後去附近買埋糖水返家。

20121108 - ヾ(◍'౪`◍)ﾉﾞ病完

11月8日星期四

熊呢個星期幾日都唔得閒，又係去夾BAND。
唯有趁星期四去下午夾完之後，夜晚同佢食飯，

我SICK LEAVE 之後好返好多，
熊終於覺得攰攰。因為要車出車入，車兩轉，佢鍾意囉，我都費事出聲了。


佢話攰攰，所以食好啲，佢嗰頭都係食日本嘢比好，又係小金井。
今次食新嘢呢，食沙律，火灸吞拿魚沙律，
幾好食，不過個汁係WASABI，幾重WASABI，如果怕WASABI的人就幾大件事。

 仲叫咗個刺身定食，好似75蚊，有飯有刺身。由於怕肥，而且定食又有一碗飯，湯和沙律，所以冇再叫嘢。

 食咗碗飯，個吞拿魚沙律又幾大個，所以都夠飽了。

之後陪熊上網搞新屋水電，點知原來佢咩都未整，整唔切了，邊趕得切星期六搬屋。唯有改下星期二了。

20121107 - ☹ ☹病 ☹ ☹

11月7日星期三，
之前一日星期二已經病了，個鼻塞到抖唔到氣，
其實想下午SICK LEAVE，不過都返左公司唔抵了，
再加上如果下午SL就見唔到熊。
所以先睇醫生，唔得先算。
第二朝瞓醒幾唔舒服，再加上因為公司啲古怪嘢令我唔想返工，所以SICK LEAVE 一天。

熊夾BAND我先安心SL，

同媽媽去飲茶，之後去左BOSSINI買件angry bird 衫，之後晚飯後好精神啲就睇公司嘢。

好唔想返工，個人好唔開心。

20121102 - •●❤感激我遇見❤●•

11月2日星期五，
熊住的地方業主忽然要加租了。
所以就決定找地方搬，

不知不覺熊住在屯碼都一年了。
這個地方當中有十一個月是熊+樹懶在一起的。
也就是說我同熊也識了十一個月。
我好少搬屋，所以聽到熊說要搬屋，我又胡思亂想一番了。

認識一個人跟一個人一起多少需要點緣份，
我跟熊的前半生大大不同，我讀書時熊已經出來工作，
有時問問他90年代他做什麼，
千禧年時熊又怎過。
兩個截然不同的人忽然就在2011年相遇，
以往不同的經歷，就在相遇那一刻開始，
一起經歷...

我想說...好開心
可以遇見了熊。

20121031 - (≧▽≦)/藥膳雞煲暖暖

10月31日星期三

萬聖節，不過我哋都唔打算同人迫啦，因為OP Halloween都已經玩咗啦，老蘭又唔係咁啱我哋。年紀大了，唔同人迫啦。
去熊公司附近食嘢，幾鍾意食有木桶飯的潮皇。
因為可以食魚，上次食魚湯幾好食，可以當打邊爐咁，天氣涼涼地好舒服，
本來都想食魚，但見到有藥膳雞煲，
我忽然好想試，所以點了一個雞煲，再加其他配料當打邊邊。

雞靚靚，又好滑，仲有酒味。

 

呢個就係個湯，真係有啲藥材架，杞子，紅棗等。仲加咗啲酒，個味好濃，但好正。

啲雞本身用酒醃，所以好入味。再點了魚片頭，菜等。

由於熊堅持唔食澱粉質，所以冇點飯麵，結果又唔夠飽，點完再點。食咗好耐。

但幾好食呢。天氣涼涼，個煲暖暖。

20121029 - ♪♬♩♫ 跑了十個圈♪♬♩♫

熊星期日買俾我的波鞋，允記減價。著新波鞋跑步。

10月29日星期一

上星期因為熊要上大陸做嘢，所以冇跑步，
足足十多天冇跑了。
以為會跑唔到幾多。
一開始跑就右腳腳肚至腳跟攰攰。
諗住都唔頂得幾耐啦。
一開始跑兩個圈就行一個圈。好大風，好舒服，跑跑吓有涼風降溫，頂到再跑。
再開始跑，右腳又攰，好彩只係攰唔係痛，又頂了3個圈，
原本橫隔膜痛痛，跑到第五個圈就唔痛，步伐步速都順了許多。

飲水再行一圈，再跑三圈，一起跑左邊條筋又扯，熊叫我放鬆。
放得好鬆，又得喎，唔痛了，最尾兩個圈冇痛，右腳都唔攰，步伐暢順，仲有少少微雨，好c服
跑到三個， 一共八個圈，已好過上次七個半圈了。
熊見我未好攰，就再叫我跑兩個，
其實攰攰，跑完一個再頂多個圈，真係捱落去，真十幾步就兩個圈，
差不多跑足十個圈了，
再加行了三個圈，已經足足5km了。