20181111 - ✿｡◕‿◕｡✿城門水塘

11月11日星期日
天氣幾好，秋高氣爽，以朗冇咩事，當然係仲未好有胃口，最慘係有鼻水，鼻水唔多，食咗藥就ok，唔食又唔得。返學之後真係好多病痛呢。
由於佢有少少唔舒服，同佢去郊外走走，吸吓新鮮空氣就最好。
於是行吓城門水塘，不過宜家左邊落閘，一般車上唔到，於是就行右邊，即係壩嗰邊，好好太陽，同以朗曬太陽都幾好，不過我就怕曬，今日推bb車，佢初初都坐得幾開心，不過之後就自己行吓跳跳，有時仲會幫手推bb車-__-"

呢邊唔近百千層，湊住bb又好難入到去百千層個位，喺個壩度hea咗啲時間，食吓嘢，呢個位唔太多馬騮，見到一兩隻咁，反而見到好多狗狗，不過以朗依家見到狗狗又不太熱情了，見到人又怕又唔講嘢，激死。

今次唔算係行山，城門水塘根本冇行過，只經過個壩來來回回咋，諗返起以前住維京時，秋天開始差不多一個月一定會去一次城門水塘，行上路，行下路，行一圈先走，水浸百千層個位見個高水位水塘滿滿，見過乾哂塘都有，留下不少的回憶和腳毛，宜家再嚟就帶埋以朗一起，另有一番滋味在心頭。

返到屋企同以朗瞓一陣就過媽咪度，熊人開工，今日啲雲好令，同以朗一起看日落呢，以朗再大啲可以同爸爸媽媽上山，看日落看風景呢。期待。